Omurumeela Yehova ti Murette Awe!
Okathi mapioneero manli yaalattuliwe aya okela empa emosa oKeniya, awo yaahitikinihiwa nuumala omoona mulopwana mmosa mwamukhaanixa ammaathaleene vakhaamani. Erikittili awe yaari yooyeva, nto miyoono sookhuveya. Vaavo vaamuleelale aya soolaiherya sa Muluku soowi ‘alipa-òtuthunya anotupha ntoko nahe’, mulopwana ole aheemererya masu awo ni otteeliwa murima wuulupale.—Yes. 35:6.
Mapionero ale yahileeliwa wira Onesmus, yoowo vano orina iyaakha sinivikana 30, aayariwe orineene oretta oniitthaniwa osteogênese imperfeita, wala oretta oninyaanyasa makhuva. Makhuva awe tootepa woolowasa, tivonto weeteteya vakhaani paahi, anninteya. Okhala wira oretta ola khonivoniwa, Onesmus onnisuwela wira okumi awe wotheene onrowa okhala wowereyasiwa ni weettaka ni ekhattera ya maroota.
Onesmus aheemya yoosoma ya Biibiliya. Masi, amama awe yaahimukhoottiherya orowa mithukumano sa muloko, yoovaka wira eyo yamwaacerya oretta awe. Nto anna yaanigaravari muthukumano wira Onesmus awiriyaneke owaani. Nuumala omusoma Biibiliya miyeeri mithanu, Onesmus aahilakela orowa omuthukumanoni nnaamwi aasuwela wira opaka eyo yanwerya okumiherya owereya.
Niireke orowa omuthukumanoni wahaaceererya oretta awe? Yookhumelela aya yaari yoovirikana. Onesmus aahimmye so: “Ohaawa waka waahivukuwa okathi waari aka omuthukumanoni”. Owo onuupuwela wira nlipelelo naaphwaanye awe ti naamwiirinhe okhala saana. Amama awe Onesmus, vaawehale aya otteeliwa wawe murima, yaahitepa ohakalala mpakha weemererya omusoma Biibiliya. Tivonto vaahimmya aya wira “omurumeela Yehova ti murette wa mwanaka”.
Voohipisa Onesmus aahikhala namalaleerya oohibatiziwa. Moovira wa okathi aahibatiziwa, vano owo murummwa oorumeela. Nnaamwi Onesmus ohiweryaka orumeela metto ni miyoono sawe, owo onniimananiha opaka sotheene siniwerya awe wira omurumeele Yehova. Owo aaniphavela okhala pioneero masi khiyoovelela. Mwaha wa xeeni? Okhala wira owo aanisuwela wira aarowa waalipanaka atthu akina wira axoveke ekhattera awe, okathi woolaleerya. Vaavo vaahimeryale awe anna akina yoolakela awe, awo yaaheemererya omukhaliherya. Nto anna ale yaahimukhaliherya Onesmus okhala pionero ookhaliherya.
Okathi aaphavela awe okela opioneero wookilatheya aahipacerya-tho woovelela. Nto nihiku nimosa, yoolepa ya nihiku yaahimukhaliherya. Nto yoolepa eyo yaari Esalimo 34:9 yeeyo eni ‘Mwererye, mone orera wawe murima [Yehova]’. Nuumala otthokelela saana yoolepa ele Onesmus aahikela opioneero wookilaattheya. Owo onniwerya olaleerya mahiku maxexe vasumanani, ni ookhalana atthu anceene anaasomiha awe Biibiliya yaawo anirowa ohoolo momunepani. Mwaakha wa 2010 aahirowa Exikola ya Muteko wa Opioneero. Tthiri vaari voohakalaliha wa owo woona wira munna aarowa osomihaka, aari yoole aamuxukunrye nihiku noopacerya!
Anamuyari awe Onesmus ahookhwa, vano owo onikhapeleliwa ni anna ni arokora a mmulokoni. Owo onnixukhurela mareeliho otheene aphwannye awe ni aniwehererya awe muhoolo vaavo vanirowa aya waakhwanela masu ani: “khavo-tho onkela ohimya wira: ‘Miyo ki muretta’”.—Yes. 33:24.
[Elatarato epaaxina 15]
[Elatarato epaaxina 15]