MWAHA WOOPACERYA | NIIREKE SATANA OHAAVO?
Niireke Nihaana Omoovaka Satana?
Epheyo yootakhala eniitthaniwa monóxido de carbono, ti yoovila osuwela. Maana eyo khenooneya ni kheninkha. Eyo pooti waaphwanya atthu moohisuwela. Waaniheryasa atthu anceene annookhwa mwaha wa omumula epheyo eyo yootakhala. Masi khivanitthuneya woova. Sookhala inamuna sinikhaliherya oweha epheyo eyo ni wiikasoopa. Atthu anceene mwa miruku, annikhalana aparelho oniwehaweha. Nto aparelho owo onniruma yakhumela epheyo eyo.
Ntoko epheyo ya monóxido de carbono, Satana khonooneya ni towoopiha. Masi Muluku khonihiyale siiso. Khivanitthuneya omoova Satana akhala wira munoottottela mureerelo soovaha sa Muluku sinittharelana:
Hiyo pooti othanla. Yakobo 4:7 onihimya so: “Mmukhotteke Satana: Satan’owo onimotthyawani”. Nnaamwi Satana aryeene oowerya, owo khonrowa wookhanyereryani opaka itthu muhiniphavela anyu. Nyuwo pooti othanla omwiiwelela wala omukhoottela Diabo. 1 Pedru 5:9 onihimya so: “Mmukhotteke Satan’owo, mulimpene mowaminini”. Satana aahimuhiya Yesu nuumala oxintta soweeha tthaaru. (Matheyo 4:11) Nto ni nyuwo munoowerya omukhoottela Satana.
Opatthana ni Muluku. Yakobo 4:8 onninitumererya ‘omwattamela Muluku’. Yehova onnoolattulani opatthana ni yena. Nto munrowa opaka sai eyo? Enamuna yooloka, ori wiixutta voohimya sa yena mBiibiliyani. (Yohani 17:3) Ele munrowa anyu wiixutta enoowiirihani omphenta ni omwiiwelela Yehova. (1 Yohani 5:3) Nto akhala wira munoomwaattamela Tiithi anyu a wiirimu, exeeni owo onrowa awe opaka? Yakobo onnivikaniha oriki: “Muluku onowattamelani”.
Yooleiherya ya okhapeleliwa. Miruku 18:10 onihimya so: “Nsina n’Apwiya [Yehova] namukattha òlipihiwa: naxariya atthyawelá weiwo, onophwanya wopowa”. Masi niireke masu awo anitaphulela wira nsina na Muluku niri ntoko ekhulula? Nnaari. Eyo enitaphulela wira ale aniroromela nsina na Muluku ni enavuwiha, annikhapeleliwa okathi wotheene.
Ntakiheryo noovareleya Muteko. Miteko 19:19 onnilavula sa atthu yaakenle eKristau wÉfeso oriki: ‘Nave atthu akina anjene, yapaka maxitta, yahiruha ilívuru saya, khupaha oholo w’atthu othene. Esisapo aya ilívuru iya yahiphiyerya musurukhu wa paratha ntoko ikonto miloko mithanú’.a MaKristau ale yaahipwetexa itthu sotheene saavarihana ni maxitta, hata saari sa musurukhu munceene. Ntakiheryo nlo pooti onikhaliherya. Olumwenku ola woosareya okhwiri ni maxitta. Hata itthu sa maxitta wala soowiira nnoona ahu okhala soohitthekeya, pooti owiitthana axetwani. Nto nihaana opwetexa itthu sinivarihana ni okhwiri hata siryeene sa musurukhu munceene.—Otumererya 18:10-12.
Rogerio, oromoliwe wanipacerya aahimaliha iyaakha 50 ohikupaliki wira Diabo ohaavo. Masi aahuupuwelela saana mwaha owo. Owo onihimya so: “Mwa ekwaha yoopacerya mookumini mwaka, kaahimusoma Biibiliya. Osuwela Nuulumo na Muluku wookikhaliherya okupali wira Diabo ookhala. Nto Biibiliya onnikikhaliherya osyaka ohapuxiwa ni yena”.
Niireke munniphavela woona nihiku nenlo Satana ohinrowa awe okhala? Biibiliya onnilavula sa okathi Diabo yoowo oniwoototha atthu onirowa awe ‘oriheliwa mphareya mwa moro ni sófiri’. (Wisupulula 20:10) Niireke mooro ni sófiri [enxofre] onoowerya ohaaxa yoopattuxiwa yomunepani? Nnaari! Nto ephareya ya mooro enithoonyerya opwetexiwa moomalela. Satana khanrowa-tho okhala. Tthiri okathi owo onrowa okhala woohakalaliha wa ale animphenta Muluku!
Nto nvikanihe wiixutta sa Yehova ni iphiro sawe.b Nkahaya muupuwele muryeene valaponi nto khiyahimya wira: “Satana khokhanle-tho!”.
[Inoota]
a Akhala wira musurukhu ola wa eparatha waari wa edenaario ya oRoma, nto waari musurukhu munceene. Maana edenaario emosa paahi yaaniphiyerya omuliva mutthu aavanre muteko nihiku nimosa.
b Wira musuwele soohimmwa sikina voohimya sa Satana ni moonelo wa Muluku voohimya sa maxitta, moone muru 10 wa eliivuru Biibiliya Oniixuttiha Exeeni Tthiri? Munvekele Namoona a Yehova wira oovaheeni eliivuru ela wala musome va www.pr2711.com/vmw.
[Eponto yuulupale epaaxina 7]
“Osuwela Nuulumo na Muluku wookikhaliherya okupali wira Diabo ookhala. Nto Biibiliya onnikikhaliherya osyaka ohapuxiwa ni yena”