BIIBILIYA ONNIRUKUNUXA MIRIMA SA ATTHU

Miyo kuupuwela wira kaanipuha okumi aka

Elavuliwe ni Pawel Pyzara

MWAAKHA OYARIWE AWE: 1982

ELAPO OYARIWE AWE: POLÔNIA

MWAHA ENE: KAARI MUTTHU OOTAKHALA, KAANILYA MIRETTE SOOHAPALA NI KAANIPHAVELA MUTEKO WOOVUWA

MWEETTELO AKA WA KHALAI: Kiyariwe muttetthe mwaamukhaani, oPolônia, waattamela efronteera ya wAlemanha. Miyo kaarina okumi woohakalala ni naahikhalana imatta ni inama sinceene. Anamuyari aka yaari oophenta ni yaanikitumererya okhala mutthu ooloka, oowiimananiha oxikola ni ophavela muteko woovuwa.

Mixankiho saka saapacenrye nuumala orowa osoma universidade epooma ya Wrocław. Anamuyari aka yaahirakamela, nto kaahipatthana ni atthu oohiloka. Kaanisiveliwa ni boola, masi mwaha wa apatthani aka asya, kaahipacerya osiveliwa boola mootepana. Ekiipa aka yaari ya oVarsóvia. Wanikisa wa esumana, kaanirowa opuro yoole yaarowa aya omuttikha boola. Mikwaha iye, naaniwurya vanceene, olya mirette soohapala ni ikwaha sikina naaniwana ni anamakhaliherya a ekiipa ekina. Kuupuwela wira mweettelo ole, wammaliha mixankiho saka; masi kaanisuwela-tho wira kavariwa ni mapoliisia kaamuhonona muteko aka.

Hoothe ni apatthani aka, naanirowa odiskoteekani weiwo naamakela ahu owana ni atthu akina. Ikwaha sinceene kaanivariwa ni mapoliisia ni otthukweliwa, masi kaanisyaka okhalana mulattu, maana ikwaha sikina kaanivaha makhwankwa. Kuupuwela wira kaanipuha okumi aka. Masi, kaanisuwela wira ele yaari etthu yootakhala. Nto ittiminku sotheene kaanirowa okerexa kimananihaka okhalana yowuupuxerya ya murima yooloka.

MOOTA BIIBILIYA ORUKUNUNXE AWE OKUMI AKA: Eyaakha ya 2004, Anamoona a Yehova anli, yaahikixukurya, ni nivaanela voohimya sa Biibiliya. Okathi kaatepa aka oxutta itthu maKristau anitthuneya aya osyaka, yowuupuxerya ya murima aka yaanikuulumela. Kaahoona wira kaahaana ohiya ohapaliwa, olya mirette soohapala ni weetta ni atthu yahaamwiiwelela Biibiliya. Nave-tho kaahaana oturuka mweettelo aka wa owali ni wootakhala. Hata vari siiso, kaahivikaniha opaka itthu soohiloka.

Nkinliyala ele yaakhumelenle ohiyu omosa vaavo kaawana aka ni alopwana 8. Kinnuupuwela wira yaahikimoroxela vathi ni yaahikimanakasa muru. Kuupuwela wira kaamookhwa, nto kaahinvekela Muluku wira: “Koovara metto Yehova, mukilevelele, mwaha woohiiwelela Nuulumo nanyu. Kaahikhwe vale kinootthikela omusoma Biibiliya ni Anamoona ni kinoorukunuxa okumi aka”. Tthiri nkaakhwiiye. Nto kaahitthikela omusoma Biibiliya, ntoko kaaleihenrye aka.

Eyaakha ya 2006, kaahithaamela wInglaterra. Kaaphavela ophwanya musurukhu ni otthikela oPolônia wira kampake kursu pós-graduação em Direito. Masi kimusomaka Biibiliya, kaahiphwanya yoolepa emosa yaakivanre murima. Murummwa Paulo aalempe so: “Etthu enònaka yulupalexa t’omusuwela Yesu Kristu, Pwiy’aka. Mwaha wa yowo, itthu sothene korihela osalani, kònaka seiyo ntoko ikokhola, wira kimphwanye Kristu”. (aFilipi 3:8) Ntoko miyo, murummwa Paulo aahiixuttihiwa nlamulo; nave, aari mutthu ootakhala. (Miteko 8:3) Masi, aahoona wira enamuna yooloka ya orumeela okumi awe waari omurumeela Muluku ni omutakiha Yesu Kristu. Okathi kuupuwelela aka ntakiheryo na Paulo kaanoona wira muteko woovuwa ni mweettelo wootakhala, khoniphwanyiha okumi woohakalaliha. Kaahiweha-tho wira Paulo nnaamwi aari ootakhala, aahiwerya orukunuxa mweettelo awe. Nto kaahithanla okhala wInglaterra ni ohirowa-tho osoma universidade.

Vaavo kaatepaka wiixutta itthu sinceene voohimya sa Yehova, kaanoona wira kaanimwaattamela yena. Kaahikuxeya murima osuwela wira Muluku onnaalevelela yaale anittharuwa mweettelo aya woohiloka. (Miteko 2:38) Osoma yoolepa ya 1 Yohani 4:16 yeeyo eni: “Muluku ophentá” wookiiriha osuwela nthowa naya Muluku oninyokha awe otakhala.

Mweettelo wa Anamoona, waanikisivela. Kaahiweha wira awo annimwiiwelela Biibiliya. Nto kaaniphavela wiirela mpantta emusi yowiiraana ya anna a olumwenku wotheene wira kihakalaleke nave. Nuumala opaka marukunuxo manceene mookumini mwaka, eyaakha ya 2008 kaahibatiziwa khukhala Namoona a Yehova.

MOOTA OTTOTTENLE AKA MUREERELO: Khalai kaari mutthu a nrima, ootakhala, oolya mirette soohapala, namuhapaliwa, ni mutthu oosiveliwa ni boola. Masi Biibiliya ookikhaliherya ohiya itthu iyo. Vano kinniwiixuttiha akina ihapari sa Biibiliya. Nlelo onnikisivela onweha mphira, masi vano kinnisuwela othanlela okathi wootthekula.

Koohakalala omuthela Esther, murumeyi ooreera a Yehova. Ninnihakalala vaavo nnaalaleerya ahu atthu anilavula ePolonês, epantte enikela nsuwa, wInglaterra. Tthiri koophwanya ohakalala wekeekhai, yowuupuxerya ya murima yooloka ni kinnisuwela nthowa naya okumi opattuxiwe aya.

[Eponto yuulupale epaaxina 11]

Kaaniphavela wiirela mpantta emusi yowiiraana ya anna a olumwenku wotheene wira kihakalaleke nave