ALE ANISOMA ILIIVURU SAHU ANNIKOHA . . .

Niireke ti vootthekeya omuupuwelela Natali?

Okhuma khalai atthu annimuupuwelela Natali ntoko efesta enitthapela oyariwa wa Yesu. Soolema sinceene sinipakiwa okathi wa niira nlo, sinniniiriha wiikohaka so: Itthu iyo sipacenrye sai ovarihana ni oyariwa wa Yesu?

Mwa ntakiheryo, nithokorerye ehantisi ya Papai Noel. Muupuwelo okhanle olelo ti woowi Papai Noel ti mulopwana oohakalala owanre ereru yootteela, ni ikuwo sooxeerya, yoowo onimulaleya Natali aakumiheriwe ni empresa ya nakoso ya wAmerica do Norte mwaakha wa 1931. Iyaakha sa 1950, atthu akina a oBrasil, yaahimananiha omurantteliha Papai Noel ni mutthu mukina ephattu awe okhanle oBrasil, nto khunvahaka nsina na Vovô Índio. Nto exeeni yaakhumelenle? Moovarihana ni Prusoore mmosa onisomiha universidade Carlos E. Fantinati, Papai Noel khahiyo paahi aamuxinttale Vovô Índio, masi-tho “aahimuxintta mwanamwane Yesu, nave khukhalaka mwaneene efesta ya 25 ya Dezembro”. Niireke paahi yoolema ya Papai Noel teri yootthekeya nihiku na Natali? Wira niphwanye waakhuliwa nrowe nuupuwelele voohimya sa eKristau yoopacerya.

Encyclopedia Britannica, enihimya wira iseekulu piili nuumala okhumelela eKristau, waahikhumelela olupatthiwa wuulupale, nto vaanixankiha osuwela saana nihiku yaayariwe aya atthu yaale yaaiviwa, ohela muhina Yesu Kristu. Mwaha aya? MaKristau yaakupali wira ifesta sa otthapela oyariwa wa mutthu saavarihana ni soolema sa epakau, nto saahaana osyakiwa. Ti maana aya Biibiliya ohinihimya awe nihiku oyariwe awe Yesu.

Eseekulu 4 EC, nnaamwi maKristau oopacerya yaheemererya otthapela soolema sa oyariwa wa mutthu, ekerexa katoolika yaahipacerya owiixuttiha atthu omuupuwelela Natali. Makatoolika yaaphavela olipiha mukhalelo ni okhulupale aya vaavo yaakumihale aya itthu saaxankiha, eyo piiyo, wuulaana wa itiini sa epakau sa oRoma ni ifesta saya sa solstício ya eyiita. Khuta mwaakha, okhuma nihiku 17 a Dezembro mpakha 1 a Janero, aRoma anceene yaanitthapela ifesta, owiira ajooku, ohakalala, wiipa mustaraatani, ni otakaaha ni ifesta sikina ohela muhina waapakela efesta amuhavinre aya. Nto nihiku na 25 a Dezembro, aRoma yaanuupuwelela oyariwa wa Nsuwa Nihinxintteya. Mwaha wa Ekerexa ompaceriha Natali nihiku nlo, waahiwiiriha anamunceene a oRoma wuupuwelela oyariwa wa Yesu ohiya oyariwa wa nsuwa. Eliivuru Santa Claus, a Biography yeeyo elepiwe ni Gerry Bowler, eni: “ARoma yaahivikaniha wiirela mpantta soolema sa ifesta saya sa eyiita. Tthiri, awo yaanuupuwelela niira nlo na niinano erumeelaka soolema sa khalai”.

Mwekeekhai, onnuupuweleliwa Natali sirumeeliwaka soolema sa khalai soohaaxa. Eliivuru The Battle for Christmas, yeeyo elepiwe ni Stephen Nissenbaum, enihimya wira Natali ti “niira na epakau nenlo nintthapeliwa ni maKristau”. Tthiri Natali onninveeha Muluku ni Mwanawe Yesu Kristu. Niireke vannireerela wiirela mpantta niira nlo? Biibiliya onaakhula so: “Muhatàneké n’ale ahinamini: nyuwo khamunlikana ni yawo. Exariya enwerya sai watàna ni sotakhala? Vanikhala sai warya okhalaka n’epiphi?” (2 aKorinto 6:14) Moolikanasa ni mwiri oninnuwa okhoropanaka, Natali ti niira noothanyeya vanceene ti maana aya ohikhanle awe mutthu “onwerya wokolola”.​—Musuweli 1:15.