Muteko Yoowo Ori Wootepa Ohakalaliha
1. Muteko xeeni onivariwa olelo yoowo onaakhaliherya atthu omusuwela Yehova?
1 Atthu yaale yoonale ovonihiwa wa aretta eseekulu yoopacerya, yaahihakalala vanceene. (Luka 5:24-26) Olelo-va, ninnihakalala ni muteko wowaakhaliherya atthu omusuwela Yehova. (Wis. 22:1, 2, 17) Tthiri, ti voohakalaliha vaavo vanisoma ahu sookumanana seiyo sinooniherya moota Nuulumo na Yehova ni munepa wootteela sinaakhaliherya aya atthu orukunuxa mirima saya! Masi, vannitepa-tho ohakalaliha vaavo vanipaka ahu yoosoma ya Biibiliya enirowa vahoolo.
2. Exeeni khino ennihakalaliha vaavo vanimwiixuttiha ahu ekeekhai mutthu?
2 Tinivi nri nsina na Muluku? Xeeni Muluku vanaahiya awe atthu ahaawaka? Omwene wa Muluku onrowa opaka exeeni wa apinaatamu? Etthu ennihakalaliha khahiyo mwaha wa osuwela waakhula makoho awo paahi, masi-tho mwaha wa woona ohakalala wa ole onimwiixutta Biibiliya, vaavo vaniixutta awe ekeekhai. (Mir. 15:23; Luka 24:32) Vaavo vanirowa awe vahoolo, khino onnipacerya orumeela nsina na Yehova, olokiherya mawarelo ni wiitthokiha wawe, wala ottharuwa sowiira soohiloka, ni opacerya waalaleerya akina. Akhala wira onoorowa vahoolo mpakha wiivahererya ni obatiziwa, onookhala munnihu onilaleeryana ahu hoothe. Orowa wawe vahoolo ti etthu ennihakalaliha.—1 aTes. 2:19, 20.
3. Itthu xeeni sinireerela ahu opaka wira nipacerihe yoosoma ya Biibiliya?
3 Nyuwo Munniwerya Waalaleerya Akina? Mwaphavela ovara muteko ola onitepa ohakalaliha, munvekele Yehova wira ookhaliheryeni ophwanya ni wiiriha yoosoma ya Biibiliya, nto mwiimananiheke ophwanya yoosoma eyo moovarihana ni mavekelo anyu. (1 Yoh. 5:14) Mulaleyeke okathi yoole oniphwanyaneya atthu ni opuro oryaaya. Nto, khuta okathi wooreerela mwiimananiheke opaceriha yoosoma ya Biibiliya. (Mus. 11:6) Vaavo vanimphwanya anyu mutthu onisiveliwa ekeekhai, mutthikeleke omuxukurya wira mmwiixuttiheke.—1 aKor. 3:6-9.
4. Xeeni vanitthuneya ahu ohipiserya waavahaka atthu soosoma sa Biibiliya?
4 Anamunceene olelo-va, khareere ovoliwa etala ni ntthona na ekeekhai. Nto, ti pani onrowa waakhaliherya atthu awo momunepani owiirihaka yoosoma ya Biibiliya? (Math. 5:3, 6) Tivonto, nrowe niivahererye moohikhanyereriwa wira nikhaliherye muteko ola wa olaleya ni waapaka awiixutti, ohinatthi omala okathi wa ohepha momunepani.—Yes. 6:8.