Epaphelo ya Nikhuuru Noolamulela
Oophentiwa Annihu Anamoona a Yehova:
Tthiri, ninkhala okathi oniiraneya itthu soohakalaliha! Nto, itthu iyo sinnikumiherya otteeliwa murima! Vanninsivela vanceene ovara muteko ni nyuwo anna ni arokora ntoko atthu a “murima mmosaru” nivahaka onamoona wuulupalexa sa Tiithi ahu, Yehova.—Sof. 3:9; Yoh. 14:12.
Ohakalala wahu vaavo vanimurumeela ahu Yehova, khonitaphulela wira khannikumana mixankiho. Nto, mwaakha wa muteko ovinre, akina a nyuwo yaahihaawa mwaha woophwanyiwa ihasara sa etetere, osaryasarya wa maasi, munamukhaya, ni ihasara sikina sa ephattu. (Math. 24:7) Anamunceene annoona owereya khula nihiku mwaha wa eretta yuulupale wala wuuluvala. Tthiri, otheene ahu ninniwanana ni makhalelo anilikana ni “ohawa wopajerya w’oyara”. (Math. 24:8) Annihu anceene anikhala Ilapo sa Armênia, Eritréia, ni Coréia do Sul, aatthukiwa mwaha wa waamini waya.—Math. 24:9.
Exeeni ennikhaliherya okhalana moonelo wooloka nnaamwi siniphwanyaka mixankiho iya? Yoolepa ya mwaakha ya 2010, yoonuupuxerya etthu emosa yootthuneya, eriki: ‘ophenta onnivilela itthu sothene. Ophenta khunimala-tho’. (1 aKor. 13:7, 8) Tthiri ophentana wahu, ni omphenta wahu Yehova, ti etthu ennikhaliherya ovilela mixankiho iyo.
Anamunceene yaawo aniihimya okhala maKristau annitikinihiwa mwaha wa olaleerya wahu mwa nthiti ni moowiirana. Nnaamwi aheemereryaka sookupali sahu ni sowiixuttiha sahu sotheene, akina annikuxeya murima, nto khiyahimya so: “Nyuwo munivara muteko yoowo hiyo naatthuneya ahu ovaraka!” Exeeni ennikhaliherya ovikaniha olaleeryaka khula nihiku? Mwaha wa niphento nrina ahu. Moolikanasa ni Tiithi ahu a wiirimu, hiyo khanimphavela wira atthu apweteye. (2 Ped. 3:9) Yoophavela ahu yoowi atthu attharuwe, ennooneya mwaha wa mwaattelo musya wa anamalaleerya yoowo ophiiye nummuru na 7.508.050, mwaakha wa muteko ovinre. Mulokiheryo xeeni wa etiini orina arumeyi anceene anikhalela nthiti muteko ola onooniherya ophenta, yaakhaliheryaka akina mmukhalelo womunepani moohikhanyereriwa?
Ninnihakalala vaavo nnoona ahu wiiraneya wa eprofesia ya Yesaya, eni: “Yaphiyá mahiku aya, mwako yatekeliwe-vo empa y’Apwiya onrowa winnuwihiwa ovikana miyako sorekamexa: onottukhuwa ovikana miyako sothene. Atthu a maloko othene anotthimakela-wo”. (Yes. 2:2-4) Nto, eriyari ya atthu ala otheene aronwe empa ya Yehova aaheliwa muhina ale abatiziwe mwaakha wa muteko ovinre oophiyeryaka 294.368. Tivonto, ninniwaakhela arumeyi ala otheene mmulokiheryo ahu. Nto, nimphavela wira niphento nahu na eKristau niwiirihe atthu ala ovikaniha omuxintta munyokhani ahu Satana Diabo.—1 Ped. 5:8, 9.
Mwaattelo muulupalexa wa atthu oowiiraka 18.706.895, yaahirwa Wuupuwelela okhwa wa Yesu Namanli, 30 a Marso, 2010, eyo enooniherya wira nlelo atthu imilyau sinceene animoorwa wira nimukokhoreleke Yehova. Tthiri, hiyo ninnihakalala vanceene maana mpakha-va, nlelo Yehova khomalinhe olumwenku ola woohiloka! Nto mpakha nihiku nno ophiya, niphento nrina ahu nnoonikhaliherya ovilela olumwenku ola woohiloka.—2 aTes. 3:5.
Kongresu a edistritu “Nvikaniheke Omwaattamela Yehova!” yoowo wiiriwe mapuro manceene mwaakha wa 2010, oolipiha wataana wahu ni Tiithi ahu a wiirimu, Yehova. Tthiri, masu ala a nasalimo ta ekeekhai, yaawo ani: ‘Noreriwa nloko Muluku aya okhanle’ Yehova. (Esal. 144:15) Nto, moohicikha etthu sa ele enrowa wiiraneya muhoolo, ninniroromela wira Yehova akhala ni hiyo, khiivo etthu nnakhala vakhaani enirowa onoopopiha. (Esal. 23:4) Moohipisa-va, Yehova onoomuruma mwanawe wira, “apwetexe miteko sa Satana”. (1 Yoh. 3:8) Tthiri, hiyo ninnoona opisa ophiya wa nihiku nno! Masi, nlipelelaka nihiku nno nohaana itthu sinceene soovara.—1 aKor. 15:58.
Nyuwo mukupali wira “mahiku othene” ninniwuupuwelani okathi wotheene mmavekeloni mwahu. (aRom. 1:9) Nto, mutepeke ‘okhala mophentani mwa Muluku, muroromelaka wira Yesu Kristu Pwiy’ahu n’urera wawe murima onimovahani ekumi yohimala’.—Yuda 21.
Ninnoophentani otheene anyu!
Anninyu,
Nikhuuru Noolamulela na Anamoona a Yehova
[Ipaaxina soohikhala etthu 5-6]