Soohimmwa

◼ Iliivuru sinrowa okaiwaka mweeri wa Junyo: Biibiliya Oniixuttiha Exeeni Tthiri? Akhala wira atthu a etthoko eyo aakhalana eliivuru eyo, pooti okawa iliivuru sipakiwe ohinatthi mwaakha wa 1995, sirina ipaaxina 192. Julyo ni Akosto: Khuta Ebroxura erina ipaaxina 32, enaasivela atthu a muttetthe anyu moovarihana ni epaphelo ya soohimmwa sa mweeri wa Junyo mpakha Akosto.

◼ Okhala wira Biibiliya a nttaava na Echuabo, eMakhuwa, Esena, ni eTswa, nlelo khataphuleliwe ni Anamoona a Yehova, nto anithummwa mapuro makina. Tivonto, khuta Biibiliya musurukhu aya onnivikana 180,00 MT. Anamalaleerya oobatiziwa ni oohibatiziwa, ni ale anisomihiwa Biibiliya anikela vahoolo ahirina Biibiliya, taneemereriwa onvekela oFiliyaali. Ale aneemiheriwa waavekela aBiibiliya ala, khanikhanyereriwa okumiha musurukhu onilikanela epereso ya aBiibiliya awo, akhala wira khaniwerya. Nto, khula mmosa pooti ovaha musurukhu oniwerya awe. (2  aKor. 9:7) Sookhala iversiikulu sikina sa aBiibiliya awo sivirikanne ni Tradução do Novo Mundo, ni sookhala iliivuru sikina siniihaniwa apócrifos, eyo piiyo, sihinaakhuleliwa okhala moolumo a Muluku.

◼ Eprokrama ya mithukumano enaattamela esumana ya konkresu, pooti ovenxiwa mpantta mmosa wira yuuluuliwe malakiheryo a konkresu. Nto, nuumala mweeri mmosa wala miili, mpantta wa sootthuneya sa mmulokoni pooti orumeeliwa wira suuluuliwe myaha sa konkresu, seiyo anamalaleerya yoonale aya okhala sookhaliherya mmuteko woolaleerya.