Nvareke Muteko wa Muluku Mwa Miruku
1. Yoolepa ya 1 aKorinto 9:26 enivareleya sai mmuteko woolaleerya?
1 Murummwa Paulo aalempe so:“Tivó miyo-tho kinnitthimaka, nto kosuwela ontthimakelaka-wo: kinniwana, nto khahiyó ntoko kimmana epheyo”. (1 aKor. 9:26) Paulo aanivaha efaita yuulupale omurumeela Yehova. Masu ala a Paulo, anninikhaliherya-tho mmuteko woolaleerya. Nihaana ‘otthimakaka’, wala wiimananiha wira nilaleeryeke mwa miruku. Moota xeeni?
2. Ninrowa omutakiha sai Paulo ni anna akina a eseekulu yoopacerya wira nithanle okathi ni opuro woolaleerya?
2 Muroweke Mapuro Ari Atthu: Paulo ni anna akina a eseekulu yoopacerya yaanilaleerya mapuro yuupuwela aya waaphwanya atthu. (Mit. 5:42; 16:13; 17:17) Nto, akhala wira anamunceene anikhala mmawannyeya makaaripi, owo pooti okhala okathi wooloka olaleerya khuta empa. Niireke mmuttettheni mwanyu annaatta atthu voosiisu wala othana mapuro aniweliwa ikaaro, aahiiso komboi, okathi atthu anirowa aya omutekoni wala owaani? Aahiiso atthu anaatta mapuro aniiriwa nakoso? Olaleerya mphironi okathi owo pooti okhala wooreerela.
3. Ninrowa olaleerya sai mwa miruku mmuttettheni mwahu?
3 Mulaleeryeke Mmuttettheni Mwanyu Mwamiruku: Mukhalaneke ephoole okathi munilaleerya anyu mmuttettheni mwanyu. Mwa ntakiheryo, waakuxa anna anceene murowaka opuro omosa, wanvira okathi munceene mwaakawelaka mapuro oolaleerya; masi vaamuloka waakawela mittetthe sikina vahinatthi wira ikrupu sikhale sootthokiheya. Nave-tho, akhala wira ikrupu khasintepa waatta, pooti nilaleeryaka mmittetthe soorakamelana ipa, nnoowerya omaliha moohipisa muttetthe ahu ni olavula ni atthu anceene. Okhalana muttetthe woolaleerya waattamela owannyihu, onoovukula okathi woweetta nrowaka olaleerya.
4. Exeeni enrowa onikhaliherya okhala “atothi àtthu” okhumela saana?
4 Yesu aahaalikanyiha anamalaleerya ni “atothi àtthu”. (Mar. 1:17) Ole onitotha ihopa khahiyo oniphavela omiserya paahi, masi oniphavela ovara ihopa. Tivonto atothi a atthu, anirowa mapuro yaale anuupuwela aya waaphwanya atthu ni okathi woophwanelela nto khiyapacerya omiserya moohipisa. Awo, annivara muteko mwa miruku. Nto nrowe nooniherye nthiti mmuteko ahu woolaleerya.—aHéb. 6:11.