Epaphelo Ya Nikhuuru Noolamulela

Oophentiwa Annihu Anamoona a Yehova:

Ti voohakalaliha woolepelani nyuwo ophentiwa arumeyi a Yehova, vano waatta wahu onnivikana imilyau thanu na piili. Okathi nyuwo munikumana anyu ni anninyu a ilapo sikina, tthiri munnihakalala vanceene mwaha wa opatthana orina anyu ni awo. (Yoh. 13:34, 35) Moohihova, okathi onrowa anyu omusomaka Anuário a mwaakha ola, myaha silavuliwe sa anna ni arokora oororomeleya a ilapo soovirikana, sinrowa wuncererya wataana orina anyu naawo.

Irelatoorio sa olumwenku wotheene, sinnooniherya wira nummuru ninceene sa imusi sinnitthara moowiimananiha eprokrama ele ya Omulompa Muluku Vatthokoni. Nooweha wira yaale arina anamwane acikhaani, anniimananiha orumeela inamuna sinaakhaliherya anaaya wiiwexexa ele enaasomiha aya. (aÉf. 6:4) Nto, itthoko sinnilipa saana mwaha wa eprokrama yeela ya omulompa Muluku vatthokoni. (aÉf. 5:28-33) Tthiri, pooti yaale anikhala mekhaya wala itthoko, sinnittottela mureerelo eprokrama ela enikhaliherya otokosa oratteene Nuulumo na Muluku, Biibiliya.—Yox. 1:8, 9.

Ninniwoonela othunku otheene apweteiwale mwaha wa ihasara sa ephattu sikhumenle niinano. Ninnooxukhurelani nyuwo otheene muniilipiha ovilela, nto khiyaimananiha mahiku ala ooxankiha. (Mit. 11:28-30; aGal. 6:9, 10) Nave, ninnaaxukhurela anna yaale khula muloko avanhe soosonkherya saya wira yaakhaliherye axinnaya anihaawa, wala yaaronwe mapuro awo wira yaakhaliherye. Moolikana ni Dorcas wala Tabithá oniromoliwa mBiibiliyani, nto nyuwo ‘mowirela sorera atthu akina’. (Mit. 9:36) Mukupaliki wira Yehova onniweha miteko sotheene iya sooloka, nave owo onrowa wootthuvelani.—Math. 6:3, 4.

Ilapo sikina, idireetu wala ehakhi ahu ennihononiwa ni atthu yaale anipaka malamulo oohiloka ‘khiyahonona exariya’. (Esa. 94:20-22) Okhala wira Yesu aahilavula wira naarowa olupatthiwa, nto nyuwo munnivilela mmuroromelaka Yehova wira ookhaliheryeni. (Yoh. 15:19, 20) Nto hiyo ninnoovekelelani khula okathi wira nvikaniheke ovilela ni ‘okhala òlikanene wira nwakhule sana othene ale anokohani mwaha w’ororomela wanyu’.—1 Ped. 3:13-15.

Moophenta, ninnoottottopelani otheene nyuwo oowiiraka imilyau sinceene munivikaniha okhala atthu owiisuumaaliha khula mwakha, nnaamwi Satana avikanihaka okumiherya mikhalelo sootepa ohiirya ni otakhala wira onihapuxe. Vaavo olumwenku ola onitepa aya ohononeya voohimya sa mweettelo aya woohiloka, nto nyuwo ‘mwilipihe mukhalaka n’Apwiya n’uwerya wa ikuru saya’. (aÉf. 6:10) Nyuwo moowara ikaruma sa ‘ikuru sa Muluku’ ni owana ‘ekhotto’ munvirikanyaka Satana. (aÉf. 6:11, 12) Musuweleke wira Yehova onirumeela ntakiheryo nanyu nooloka wira amwaakhule Satana!—Mir. 27:11.

Ninnihakalala osuwela wira mwaakha wa 2011, atthu yaarwiiye Wuupuwelela Okhwa wa Pwiyahu Yesu yaari 19.374.737. Waatta wa nummuru nna, nyuwo muhiirela mpantta okathi yoole anna anceene yaivaherenrye aya muteko wa opioneero wookhaliherya mweeri wa Abril. Imilyau sinceene sa atthu yaahiwerya wiiwa ovuwihiwa wa Yehova mwaha wa wataana Anamoona a Yehova orina aya! (aRom. 10:18) Pooti wira nyuwo mwaari mmosa a yaale yaari mapioneero ookhaliherya oowiiraka 2.657.377 mweeri yoole wa Abril, aahiiso ale yancerenrye muteko aya woolaleerya. Masi otheene anyu munnixukhureliwa ni Nikhuuru Noolamulela mwaha wa wiilipiha opanke anyu mmuteko woolaleerya.—Esal. 110:3; aKol. 3:23.

Mwaakha ovinre, yaahiivahererya wa Yehova ni khubatiziwa atthu oowiiraka 263.131. Ninnimuxukhurela Yehova, nave ninnooxukhurelani nyuwo munitakaahana ni hiyo wira nivikaniheke waalattula atthu wira: “‘Murwé!’. Ole onìwa itthu iya, ahimyeke-tho wira: ‘Murwé!’ Ale avoliwe ntthona erweke: ale amphavela màsi èkumi, evahiweke mahala”. (Wis. 22:17) Vanceenexa mwaisana okonkresuni, nuumala othokorerya myaha sa moota Omwene wa Muluku otikitheriwe aya, nto ninnivikaniha okhalana ikuru ovikana khalai nihimyaka wira “Omwene wa Muluku orwé”! Yesu ahinlipiherya wira: “Vekekhai, kinrwa nanano!” Nto ninnitakaaherya masu ahu vamosa ni murummwa Yohani nihimyaka wira: “Vakhale siso! Rwani, Pwiya Yesu!”—Wis. 22:20.

Nto, vaavo munivikaniha anyu oweha-weha itthu iya soovara murima, musuwele wira hiyo ninnoophentani vanceene nyuwo anna ni arokora, okhala wira munnivikaniha wooniherya omphenta wanyu Yehova mwa “ekekhai . . . ni miteko”!—1 Yoh. 3:18.

Anninyu,

Nikhuuru Noolamulela na Anamoona a Yehova