Inoota Piili sa Esisapo Yaamukhaani

Mukhalelo mukina muulupale wookhaliherya Omwene ori ovaha musurukhu ahu wira nikhaliherye olaleerya mulaponi motheene. Ankhi naahikhalane musurukhu munceene?

Okathi omosa, Yesu aahimoona naamukhweli ohaawa ohelaka mukaaxani ya empa ya Muluku inoota piili sa esisapo yaamukhaani. Omphenta wawe Yehova waahimwiiriha ovaha “sarinawe, ekumi awe yothene”. (Mar. 12:41-44) Mwaha wa Yesu omulavula naamukhweli ole, enooniherya wira yoovaha awe, yaari ya efaita yuulupale ohoolo wa Muluku. Moolikanasa, maKristau a eseekulu yoopacerya pooti oohaawa wala oothaaciri yaanisuwela efaita erivo ovaha musurukhu aya wira ekhaliherye Omwene. Murummwa Paulo aahihimya wira anna oMacedonia nnaamwi ‘yahawa n’uthoiwa wulupale . . . yanivekela mokhanyererya, wira evahiwe’ eparakha yoovaha.—2 aKor. 8:1-4.

Nto, akhala wira yoovaha ahu ti ya “inoota piili” sa esisapo vakhaani, nuupuweleke wira soovaha vakhaani sintakaaheriwa sinnaacerereya. Naavahaka ni murima wotheene, nnoomuhakalaliha Tiithi ahu oophenta a wiirimu, maana “Muluku onsiveliwa n’ule onvaha murima omuttenlene”.—2 aKor. 9:7.