Makoho Oowaakhuliwa

◼ Exeeni enitthuneya othokorerya akhala wira nimphavela wira nuumala okhwa, mihakhu sahu sivahiwe mulokiheryo wa Yehova?

Vaavo mutthu onikhwa awe, khoniwerya-tho okhapelela mihakhu sawe. (Mus. 9:5, 6) Nto atthu akina, ahinatthi okhwa annilepa ewarakha yoosuweliwa ni kuvernu, yeeyo enihimya moota sinrowa aya okaiwa mihakhu saya. (2 Mam. 20:1) Ewarakha ela, ennimuhimya ti pani onrowa okawa mihakhu iyo. Ilapo sinceene, akhala wira khekhanle edukumento ela, kuvernu tonimuthanla ole onrowa okawa mihakhu sa mutthu okhwiiye. Tivonto, akhala wira nimphavela wira muhakhu ahu wala itthu sirina ahu sivahiwe mulokiheryo wa Yehova nuumala okhwa, nihaana opaka edukumento yoosuweliwa ni kuvernu yeeyo enitthokiherya yoophavela ahu, ni omuthanla mutthu onirowa okawa mihakhu iyo.

Mulipa onithanliwa okawa mihakhu ookhalana muritti muulupale. Akhala wira mihakhu iyo sihaatta, othukumanya ni okawa itthu iyo pooti okumiherya muteko munceene ni okuxa okathi. Ohiya-vo, ikwaha sinceene kuvernu onnivaha malakiheryo anitthuneya wiiweleliwa. Nave-tho, khahiyo wira atthu otheene a mmulokoni toophwanelela waavekela ovara muteko owo. Tivonto, mutthu onimuthanla ahu ohaana okhala oororomeleya ni onirowa opaka ele eniphavela ahu.—Munwehe Despertai! 8 a Dezembro, 1998, oni: “Por que é bom e sensato preparar um testamento”.

Akhala Wira Moovekeliwa Okawa Mihakhu: Akhala wira mutthu mukina ohoovekelani wira mwakawe mihakhu sawe akhwa vale, muhaana toko wuupuwelela saana mwaha owo ni onvekela Muluku wira moone mwaatthunaka owerya muteko owo. (Luk. 14:28-32) Nuumala mutthu owo okhwa, muhaana owiitthana atthu otheene alempwale mudukumentoni anrowa waakhela mihakhu iyo. Vano, pooti muhakhu owo oryeene munceene wala vakhaani, muhaana okawa muttharihelaka nlamulo na kuvernu ni itthu silempwale mudukumentoni mmo. Nto, itthu sotheene sinivahiwa “Associação das Testemunhas de Jeová de Moçambique”, sinirumeeliwa paahi ni nikhuuru nootthokiheya na Yehova.—Luk. 16:10; 21:1-4.