Etthu xeeni Eniwiirihani Ohakalala?
1. Etthu xeeni ennihakalaliha wanikisa wa khula mweeri?
1 Vaavo mweeri onimala aya, nto munavekeliwa ovahererya erelatoorio ya muteko woolaleerya, etthu xeeni eniwiirihani ohakalala? (aGal. 6:4) Pooti muryeene pioneero a vameekhaaya oniviriha iwoora 130 olaleeryaka wala namalaleerya ooweemereriwa ovahererya minutu 15, otheene ahu ninnihakalala mwaha wa muteko oninvarela ahu Yehova ni murima wotheene.—Esal. 100:2.
2. Xeeni vanitthuneya ahu wiimananihaka mmuteko wa Yehova?
2 Yehova, Mwene Muulupale a olumwenku wotheene, oniphavela wira ninvaheke itthu sahu soolokexa. (Mal. 1:6) Mwaha womphenta, wooniiriha ovahererya ikumi sahu wira nipakeke yootthuna awe. Tivonto, akhala wira wanikisa wa khula nihiku wala mweeri, noovaha “milipu”, sa okathi ahu, osuwela, ni ikuru sahu mmuteko wa Yehova, nto hiyo nnoowerya ohakalala. (Mir. 3:9) Masi, akhala wira yowuupuxerya ahu ya murima ennihimya wira khininvanhe Muluku itthu sahu soolokexa, nto nihaana opaka mirukunuxo.—aRom. 2:15.
3. Xeeni vahinreerela aya wiilikanyiha ni atthu akina?
3 ‘Muhìlikanyiheké n’Atthu Akina’: Khahiyo vamiruku wiilikanyiha ni atthu akina wala wiilikanyiha ni okathi ovinre naarina ahu ikuru. Makhalelo ni mavarelo muteko annivirikana. Wiilikanyiha ni atthu akina, onnikumiherya owana-wana wala wiixoona ohikhala etthu. (aGal. 5:26; 6:4) Yesu khaalikanyiha miteko sa khuta mutthu. Masi, aanittottopela moovariha ni ele mutthu owo aawerya awe opaka.—Mar. 14:6-9.
4. Ninniixuttiha exeeni nlikanyiho na Yesu, voohimya sa musurukhu?
4 Nlikanyiho na Yesu voohimya sa musurukhu yaahiyeriwe arumeyi, khula mmosa aahaakhela “ntoko saweryawe”. (Math. 25:15) Okathi pwiya aahokolonwe awe nto khaavekela musurukhu awe, ale yaavanre muteko mooluttuweliwa moovarihana ni owerya waya, yaahittottopeliwa nto khutteeliwa murima vamosa ni pwiya aya. (Math. 25:21, 23) Moolikanasa, akhala wira nnoolaleerya mooluttuweliwa, ninrowa ohakalala vanceene nto Muluku onoosiveliwa ni muteko ahu!