Murukunuxo wa Moota Woopaka Mithukumano Soopacerya sa Esumana.

Okhuma esumana 3 ya Setembro, Yoosoma ya Biibiliya ya Muloko khenrowa okhalaka minutu 25, enrowa okhalanaka minutu 30. Okathi woopacerya, ole oniiriha, onrowa orumeelaka minutu mmosa wira uuluule yoosoma evinre. Nto, Muthukumano wa Orummwa onrowa okhalaka wa minutu 30 ohiya 35. Khonrowa-tho okhala minutu sa epantte ya soohimmwa sa mmulokoni. Masi, khuta soohimmwa sinrowa olavuliwaka ni munna orina mwaha woopacerya. Mahiku manceene kavanirowa otthuneyaka opaka soohimmwa, ni khivanrowa otthuneyaka ohimya myaha sikina sinrowa othokoreriwa muthukumano yoowo. Soohimmwa ntoko mithukumano sa orowa olaleerya, ekrupu enipaka elimpesa wala ovaha aahiiso wakhela makhomaso khasinrowa ohimmwaka. (km-T 10/08 epax. 1, itti. 4) Akhala wira vannitthuneya soohimmwa sowaatta, ole oniwuraanyiha axitokweene, ohaana waaleela anna arina ipantte sinittharelana wira avukule minutu sivahiwa aya.