Mulaleerye Mwa Enamuna Yooreerela
1. Exeeni eniixutta ahu voohimya sa olaleerya wa maKristau a eseekulu yoopacerya?
1 MaKristau a eseekulu yoopacerya yanaalaleerya atthu a makhalelo ni itiini soovirikana. (aKol. 1:23) Nnaamwi yaalaleya etthu emosaru, eyo piiyo, Omwene wa Muluku, awo yaanilokiherya olaleerya moovarihana ni alipa-oowiiriyana. Mwa ntakiheryo, okathi murummwa Pedru aalavula awe ni aYuda yaawo yaattittimiha vanceene Soolempwa, owo ahipaceerya olavula oromolaka eprofesia ya Yoweli. (Mit. 2: 14-17) Masi, nwehe moota murummwa Paulo aavaanenle awe ni aKriki moovarihana ni yoolepa ya Miteko 17:22-31. Olelo-va, atthu akina annittittimiha Soolempwa, ni nookhala oolavulana mootaphuwa nimurumeelaka Biibiliya vaavo ninlaleerya ahu empa ni empa. Masi, nihaana okhalana ephoole okathi ninlavula ahu ni atthu ahinisiveliwa Biibiliya, etiini wala ahineettela eKristau.
2. Ninrowa orumeela sai iliivuru sinkawa ahu wira naakhaliherye atthu anisiveliwa Biibiliya naale ahinisiveliwa?
2 Murumeele Saana Iliivuru Sinikawa Anyu: Iliivuru sinirowa okaiwaka mwaakha ola wa muteko sinirowa okhalana murukunuxo wa khula myeeri miili ni sinirowa ottittimiheryaka irevista, itratato, ni ibroxura. Hata atthu a muttetthe ahu ahisiveliwaka Biibiliya, nlelo ninrowa olavulaka etthu enaasivela nirumeelaka iliivuru sahu. Nto, khaninrowa osomaka yoolepa wala omurumeela Biibiliya mukwaha woopacerya. Masi namphwanya mutthu onisiveliwa ekeekhai, nihaana otthikela omuxukurya wira nimukhaliherye omwaamini Mpattuxa ni Nuulumo nawe. Masi, akhala wira ninlaleerya muttetthe yoole atthu anisiveliwa aya Biibiliya, pooti orumeela iliivuru sahu ni olaleerya mooreerela. Nto, nookhala oovaha eliivuru Biibiliya Oniixuttiha Exeeni wala ibroxura Munwiriyaneke Muluku ni Munwiriyaneke Muluku Wira Mphwanye Ekumi Ehinimala, hata iliivuru iyo sihikaiwaka mweeri owo. Tthiri, etthu yootthuneya ori olaleerya mwa enamuna yooreerela.
3. Moota xeeni mirima sa atthu mmuttettheni mwahu sinilikana aya ni etthaya?
3 Mulokiherye Mirima: Mirima sa atthu sinilikana ni etthaya. (Luka 8:15) Mirima sikina wala etthaya, sinitthuneya olokiherya vanceene wira ekeekhai ya Biibiliya ewerye okhalana mutathaari ni wunnuwa. Anamalaleerya a eseekulu yoopacerya yanaalaleerya atthu a khula muthinto, nto khuphwanya ohakalala ni otteeliwa murima. (Mit. 13:48-52) Moolikanasa, hiyo nnoovara saana muteko ahu akhala wira nnoolaleerya mwa enamuna yooreerela.