Exeeni Enniiriha Olaleerya?
1. Ovarihana xeeni okhanle eriyari ya wooniherya niphento ni olaleerya?
1 Olaleerya ihapari sooreera sa Omwene wa Muluku muteko wootepexa otthuneya nikhanle ahu oovara olelo-va. Tthiri, orweela mwa muteko ola ninniiwelela malamulo manli maalupale: omphenta Yehova ni waaphenta anamwaattamanani ahu. (Mar. 12:29-31) Nto ophenta ti etthu yuulupalexa enniiriha oluttuweliwa muteko woolaleerya.—1 Yoh. 5:3.
2. Moota xeeni olaleerya wahu onooniherya aya omphenta Yehova?
2 Omphenta Yehova: Omphenta Mpatthani ahu muulupalexa, Yehova, onniniiriha olavula saana mukhalelo awe. Mwa iyaakha soowiiraka 6.000, owo onnootheriwa ni Satana. (2 aKor. 4:3, 4) Ti maana aya atthu anikupali aya wira Muluku onnaahaaxa anamattheka waapahaka omooroni; wira owo ori Muluku ooraru, ni wira owo khonaathokorerya apinaatamu. Nave, atthu anceene annuupuwela wira Muluku khuuvo. Nto hiyo ninniphavela vanci wira atthu awo asuwele ekeekhai ya Tiithi ahu a wiirimu! Wiimananiha wahu okhala anamoona a Muluku onnimuhakalaliha vanceene Yehova ni omuulihiha muru Satana.—Mir. 27:11; aHéb. 13:15, 16.
3. Moota xeeni muteko ahu woolaleerya onooniherya aya waaphenta anamwaattamanani ahu?
3 Waaphenta Anamwaattamananihu: Khula okathi onimulaleerya ahu mutthu, hiyo ninnooniherya omphenta wahu mutthu owo. Olelo-va atthu aaxanka vanci; nto awo anitthuneya wiwa ihapari sooreera. Anamunceene anilikana ni atthu oNiinive a mahiku a Yona yaawo ‘yahasuwela t’uvi mono wolopwana walá mono wothiyana’. (Yona 4:11) Muteko ahu woolaleerya onniwiixuttiha atthu moota wookhalana okumi woohakalala, ni okhala saana. (Yes. 48:17-19) Nave-tho onnaavaha nlipelelo. (aRom. 15:4) Nto akhala wira anoowiriyana ni weettela ele aniixutta aya, atthu awo “animòpowa”.—aRom. 10:13, 14.
4. Exeeni ehinrowa oliyaliwa ni Yehova?
4 Anamwane ooloka khanaaphenta anamuyari aya okathi vakhaani paahi. Masi anniimananiha waaphenta okathi wotheene. Moolikanasa, omphenta wahu vanci Muluku ni anamwaattamanani ahu, onirowa oniiriha okhalana ephoole wira nilaleeryeke khula okathi, ohiya paahi okathi onilokiheriwa wira nalaleerye. Maana nihaana olaleeryaka moohihiyererya. (Mit 5:42) Nto ophenta iwo khonirowa oliyaliwa ni Yehova.—aHéb. 6:10.