Mukawe Iliivuru Muttetthe Onilavuliwa Mattaava Oovirikana
1 Mittetthe sinceene, ninnaaphwanya atthu ookhuma ilapo sikina. Anamunceene a atthu awo anniixutta ekeekhai mowaakuveya vaavo aniiwa aya ni nttaava nooyareliwa. Ninrowa waakhaliherya sai atthu awo naavahaka iliivuru sinikhuma mBiibiliyani mwa nttaava aniiwa aya saana?
2 Moota Wookawa: Akhala wira miloko miili wala sinceene, sinnilavula mattaava oovirikana masi khiyalaleerya muttetthe mmosaru, makhuuru a axitokweene, ahaana ovaanela ni axitokweene aniweherya muteko woolaleerya a miloko iyo, wira igrupu sotheene sa mattaava awo silaleeriweke moomalela. Okathi woolaleerya khula empa, anamalaleerya khanivaha iliivuru sa nttaava na muloko mukina. Masi, okathi anilaleerya aya mohiilokiherya wala mapuro otheene ari atthu, anna pooti ovaha iliivuru sa mattaava a muttetthe owo.—Munwehe Orummwa Ahu wa Omwene, ekunya, Outubro 1990, Makoho Oowaakhuliwa.
3 Opweha Iliivuru Mmulokoni: Sai akhala wira mmuttettheni ahaavo atthu anceene anilavula nttaava nikina, masi khuhikhalaka muloko onilavula nttaava nlo? Akhala wira ti siiso, miloko pooti okhalana iliivuru vakhaani sootthuneya sa nttaava nlo, ntoko ifolyeeto ni ibroxura. Anamalaleerya pooti ovaha iliivuru iyo khula okathi anaaphwanya aya atthu a nttaava nlo.
4 Moota Wooveka Iliivuru: Sai akhala wira muloko khorina iliivuru sa nttaava na mutthu owo onisiveliwa ekeekhai? Anamalaleerya ahaana omukoha munna oniweherya iliivuru sa muloko wira asuwele iliivuru sikhanle sa nttaava na mutthu owo. Nto iliivuru sihikhanle sihaana ovekiwa ofiliyaali mweeri onittharelana okathi muloko owo oniroiha awe sooveka saya.
5 Akhala wira iliivuru iyo sihaana ophwanyiwa mowaakuveya, munna owo pooti olavula ni mutokweene a Ekomisau ya Muteko ya Muloko wira owehe akhala wira yooveka eyo pooti oroihiwa ofiliyaali ohinatthi muloko oroihiwa sooveka saya. Akhala wira yooveka eyo enimwaakhuleliwa, mutokweene oniweherya iliivuru wala munna mukina oothanliwa ni yena, pooti oroihiwa ofiliyaali yooveka eyo orumeelaka e-mail wala telefoni. Iliivuru iyo sinooruuhiwa orweela mwa ecorreio erumeeliwaka enderesu ya muloko wala enderesu ya vameekhaaya, vaatthuneyaka. Akhala wira muloko onnivekela waakhela iliivuru iyo nihiku nenlo wala nuumala mahiku manli, nto muloko owo tonrowa oliverya musurukhu onitthuneya.
6 Nto nrowe nirumeeleke saana iliivuru sahu wira naakhaliherye “atthu othene” hata alavulaka nttaava nikina, wira ‘asuwele ekekhai ni yopowe’.—1 Tim. 2:3, 4.