Muteko wa oMisionaario Onniphwanyiha Mireerelo—Mwaha ola onikhuma Anuário das Testemunhas, 2014
Epaaxina 124, ettima 1 mpakha epaaxina 127 ettima 4
Mamisionaario Ooluttuweliwa Annikhaliherya Orowa Vahoolo wa Muteko Woolaleerya
Okhuma eriyari ya iyaakha sa 1970, mamisionaario ookhuma oGileadi yaawo yaaphiya oSerra Leoa ni oGuiné, yaanikhaliherya orowa vahoolo wa muteko woolaleerya. Mamisionaario makina yaahirumeela ilapo sikina sa wAfrika nto yaahaakuva olimalela makhalelo a muttetthe owo. Masi akina yampacerya ophiya wAfrika. Nto yaarowa olimalela sai okhala wAfrika weiwo atthu akina yuupuwela aya okhala “mahiye a akunya”? Nrowe niwehe masu yaalavuliwe ni mamisionaario makina.
Hannelore Altmeyer onihimya so: “Atthu yaari oowiiyeviha ni oovoliwa momunepani. Oweha ekeekhai erukunuxaka ikumi saya waahikiiriha ohakalala vanceene”.
Cheryl Ferguson onihimya so: “Ovilela makhalelo a oviha ni iretta sa wAfrika waari muxankiho muulupale. Masi, waakhaliherya atthu a murima saana wira amurumeele Yehova onnikumiherya ohakalala vanceene”.
Christine Jones onihimya so: “Kaahiixutta opixa murima. Mwa ntakiheryo, murokora mmosa aahihimya wira aahikhalana aletto yaaphavela orwa omuxukurya. Okathi kaamukonhe aka voohimya sa nihiku yaatthuna aya ophiya, owo aakhunle so: ‘Woonasa wene olelo; woonasa wene meelo; wala murotto’. Kinoona wira kaahitikinihiwa mwaha woowi murokora ole aahithipelela ohimya wira: ‘Awo animoorwa!’”
Robert ni Pauline Landis anihimya so: “Enupa ya mamisionaario yaakhala ahu muttetthe wa oFreetown yaari mamisionaario 14. Awo yaari a maloko ni makhalelo oovirikana. Hiyo naarumeela exovoro (exoworo) emosaru, maakina ookattha ikuwo, ni ekusinya emosa. Yoolya yaanithowa, nave yaakhala yoohiloka. Mahiku makina khinaakhalana energia. Anceene a hiyo naahiphwanya malaria ni iretta sikina sa wAfrika. Itthu iyo sanwerya onitteettheiha. Masi naahiixutta okhala hoothe, olevelelana, ni otheya okathi wa mixankiho. Olaleerya ni mamisionaario makina waari etthu yoohakalaliha vanceene, nave naahipaka opatthani”.
Benjamin ni Monica Martin anihimya so: “Iyaakha sivinre niri ene oSerra Leoa waari okathi wootepexa ohakalaliha mookumini mwahu. Hiyo khanrina mathowa oowiikhupanyiha. Tthiri, ninninkheliwa vanceene elapo ele”.
Frederick ni Barbara Morrisey anihimya so: “Ekwaha emosa naari owannyawe muthiyana mmosa aasiveliwa ekeekhai. Owo aahinivaha yoolya yahaatonko ahu woona. Nto khuhimyaka wira: ‘Ela enama ya evili. Masi koovenxa maino aya. Munniphavela olawiha vakhaani?’ Mwa nttittimiho, hiyo naahikhootta. Masi owo aahinithipelela. Nnaamwi sowiiraneya ntoko iyo saari sowoopiha, hiyo naanisiveliwa owaakhela waya aletto atthu ale ni ophenta wooniherya aya”.
Lynette Peters onihimya so: “Mwa iyaakha 43 sa omisionaario aka, kookhala ni mamisionaario anivikana 100. Tthiri, eparakha yuulupale waasuwela atthu anceene a makhalelo oovirikana, masi otheene ala yaavara muteko aphavelaka etthu emosaru! Nave, ti voohakalaliha ovara muteko vamosa ni Muluku ni waaweha atthu yeemereryaka ekeekhai!”
Okhuma 1947, mamisionaario 154 aarumeela oSerra Leoa, ni 88 oGuiné. Anna akina aarumeela mapuro makina oothowa anamalaleerya. Olelo-va, ahaavo mamisionaario 44 oSerra Leoa, ni 31 oGuiné. Wiimananiha waya ni wiivahererya mmutekoni mwa Muluku, ohaavara murima atthu anceene. Alfred Gunn, munna a khalai a Ekomisau ya oFiliyaali onihimya so: “Hiyo ninniwuupuwela mamisionaario ale mwa niphento”.