MAKHALELO A MAKRISTAU

Enamuna Esya ya Mithukumano sa Eriyari ya Esumana

Okhuma Janero 2018, mithukumano sa eriyari ya esumana sinookhalanaka inoota sa yoosoma, ilatarato ni iviidiyu sihinlavuliwa sinikhuma mBiibiliyani a mwinternetini Tradução do Novo Mundo da Bíblia Sagrada (nwtsty), hata ohiphwanyaneyaka nttaava nanyu. Moohaanyiherya, epantte eyo enimookhaliheryani olokiherya wanyu mithukumano. Vanceenexa, enoowiirihani omwaattamela Tiithi ihu oophenta, Yehova!

INOOTA SA YOOSOMA

Inoota sa yoosoma sinnitthokiherya makhalelo, mapuro, ni iversiikulu sinceene sa mBiibiliyani.

Matheyo 12:20

Ntthampo nintthuwa mwiixi: Ekhanttiyero yaamakela orumeeliwa vatthokoni, aakhala mwaapu wa oloko yoowo waaheliwa makhura a olivera. Makhura ale yaanitthara ntthampo nto khiyakumiherya nlumi na mooro. Nuulumo na eGriki noowi “nttampo nintthuwa mwiixi”, pooti otaphulela ntthampo nrina ettuurwa, masi nlumi na mooro nittimphe ene. Eprofesia ya Yesaya 42:3 yaahihimya sa omoriwa ikharari wa Yesu: owo khaarowa osinsa mutathi woowunteya, eyo piiyo, aamwaavaha nlipelelo atthu oohaawa ni oopuheriwa.

Matheyo 26:13

Ekhweeli: Nuulumo noowi “ekhweeli” (eGriki, a·menʹ), ninkhuma mwa nttaava na eHeeberi noowi ʼa·men. Nuulumo nlo nintaphulela “ekeekhai” wala “enimwiiraneya”. Yesu aamakela orumeela nuulumo nla wanipacerya wa efrase, yooleiherya wala eprofesia, ophavelaka ottittimiherya wira ele yaahimya awe yaari ekeekhai ni yaamwiiraneya tthiri. Khiivo eliivuru ekina ya etiini wala opuro mukina mBiibiliyani, ninrumeeliwa aya nuulumo noowi “amen”, ohikhanle paahi moolumo a Yesu. Evangelyo ya Yohani, Yesu aahirumeela nuulumo noowi “a men” vanli-vanli, ophavelaka ottittimiherya wira ele aahimya awe yaari ekeekhai.—Yoh 1:51.

ITTHU SINOONIHERIWA

Ifootu, ilatarato, iviidiyu sihinlavuliwa, ni idesenyo, sinnooniherya soohimmwa soovirikana siri mBiibiliyani.

oBethifage, oMwaako Olivera ni oYerusalemu

Eviidiyu ela yaamukhaani enooniherya ephiro enaattamela epantta enikhuma nsuwa wa oYerusalemu: okhuma muttetthe yoowo onuupuweliwa okhala oBethifage oniromoliwa mBiibiliyani, olelo-va oniireliwa et-Tur, mpakha ophiya epantte yoorakama ya Mwaako Olivera. Muttetthe wa oBethania onikhala ekhopela ya onikhuma nsuwa wa oBethifage ni onikela nsuwa wa oMwaako Olivera. Okathi aari awe oYerusalemu, Yesu ni awiixutti awe yaamakela oviriha ohiyu oBethania, olelo-va onisuweliwa okhala el-ʽAzariyeh (El ʽEizariya), nsina na Árabe nintaphulela “Muttetthe wa Laazaro”. Moohaanyiherya, Yesu aanimaka owannyawe Martha, Maria ni Laazaro. (Mat 21:17; Mar 11:11; Luk 21:37; Yoh 11:1) Okathi aakhuma awe owannyawe Laazaro orowaka oYerusalemu, woonasa wene Yesu aanivira ephiro enlikana ni ela enooniheriwa nviidiyuni. Nihiku na 9 a Nisani a 33 EC, okathi Yesu anwenle awe mwabuuru oMwaako Olivera orowaka oYerusalemu, woonasa wene aahivira oBethifage, ottharaka ephiro yaarowa oYerusalemu.

Ephiro enikhuma oBethania mpakha oBethifage
oBethifage
Mwaako Olivera
Ekhato ya oKeduroni
Mwaako wa Etemplo

Epregu Ethoronle Nikhuva na Nxitta

Ela efootu enooniherya nikhuva na nxitta wala etthetteeri ya mutthu, nithoroliwe ni epregu ya eyuuma erina isentimetro 11,5 orakama waya. Nikhuva nene naaphwanyiwe mwaakha wa 1968, okathi waathimpwa aya milepe epantte enikela epheyo ya oYerusalemu; nikhuva nla ti na okathi wa aRoma. Eyo ehaakhaliherya alipa-ootokosa milepe osuwela wira ipregu woonasa wene saanirumeeliwa wira okhomeliwe mutthu vamwirini. Epregu eyo pooti olikanyihiwa ni iye saarumeeliwe ni atoropa a oRoma wira amukhomele Yesu vamwirini. Nikhuva ni epregu eyo, saaphwanyiwe mukaaxani ya nluku yiitthaniwa ossuário. Nuumala murutthu wuntta ni omala-mala, makhuva ale yaanikuxiwa khupwehiwa mukaaxani memmo. Nto eyo enooniherya wira mutthu aakhomeliwa vamwirini aanivithiwa.—Mat 27:35.