Anamuyari, Mwaakhaliherye Aniinyu Okhumela Saana Muhoolo

Anamuyari animwiiwelela Muluku, aniphavela wira anaaya ekhale arumeyi a Yehova oororomeleya. Anamuyari pooti waakhaliherya anaaya ewiixuttihaka nuulumo na Muluku okhuma enamwane aya. (Otu 6:7; Mir 22:6) Niireke opaka eyo etthu yookhweya? Naari. Masi yaimananiha anooweha mireerelo saya.​—3 Yoh 4.

Anamuyari pooti wiixutta itthu sinceene ettharaka ntakiheryo na Yosefe ni Maria. Awo iyaakha sotheene “yanrowa oYerusalemu omutthapela Pásikha”, nnaamwi eyo yaavekela wiimananiha vanceene ni orumeela mireerelo saya. (Luk 2:41) Moohaanyiherya awosa yaanivaha efaita myaha sa omunepani. Moolikanasa, olelo-va anamuyari anniweettiha anaaya ephiro yooreera vaavo anirumeela aya khula okathi wooreerela wira ewiixuttihe ni moolumo wala ntakiheryo naya.​—Esa 127:3-5.

NWEHE EVIIDIYU ENI: AWO YAANIRUMEELA KHULA OKATHI WOOREERELA, NUUMALA-VO MWAAKHULEKE MAKOHO ALA ANITTHARELANA:

• Moota xeeni Jon ni Sharon Schiller yaapacerinhe aya soophavela sa Omwene okathi yaahuwa aya anaaya?

• Xeeni anamuyari anitthuneya aya owiixuttiha ni waahiiha anaaya moovarihana ni sootthuneya sa khula mwaana aya?

• Anamuyari anrowa waakhaliherya sai anaaya oxintta itthu sineehererya waamini waya?

• Ikaruma xeeni sinikumiheriwa ni mutthenkeso wa Yehova munirumeela anyu wira mwaakhaliherye aniinyu wunnuwa momunepani?