Amiravo​—Mphaveleke “Ovara Miteko Sorera”

Okathi murummwa Paulo aamulepela awe Tito epaphelo awe yowuupuxeriwa, aahihimya wira amiravo, omuhela muhina Tito, ahaana ovaha ntakiheryo nooloka ni “miteko sorera”. (Tit 2:6, 7) Ekapiitulu emosaru ya epaphelo eyo, Paulo aahooniherya wira atthu a Yehova aareerihiwa, ti maana aya aniluttuweliwa aya “ovara miteko sorera”. (Tit 2:14) Muteko mmosa–mmosa wooreera ti olaleerya ni wiixuttiha voohimya sa Omwene wa Muluku. Akhala wira mwa mmiravo, nyuwo pooti orumeela ikuru sa omiravo anyu murumeelaka ntoko pioneero ookhaliherya wala ookilaatheya.​—Mir 20:29.

Akhala wira muniphavela okhala pioneero, muhaana olokiherya makhalelo anyu wira nwerye orumeela. (Luk 14:28-30) Munrowa ophwanyaka sai musurukhu vaavo munrowa anyu ovaraka muteko wa okathi wotheene? Munrowa oweryaka sai omaleliha iwoora sinivekeliwa? Munvekeleke Yehova wira ookhaliheryeni. (Esa 37:5) Nvaaneleke ni anamuyari anyu wala anna akina ni arokora anikhumela saana mmutekoni wa okathi wotheene. Nuumala-vo mwiimananiheke waakhwaniherya yoolukama eyo. Yehova onooreeliha wiimananiha wanyu wira nvare muteko awe.

NWEHE EVIIDIYU ENI: AMIRAVO ANINVUWIHA YEHOVA, NUUMALA-VO MWAAKHULEKE MAKOHO ALA ANITTHARELANA:

• Mixankiho xeeni axinttale aya anna akina ni arokora wira erumeele ntoko mapioneero, ni awenrye sai?

• Anamuyari anrowa waakhaliherya sai anaaya okela opioneero?

• Xeeni vanitthuneya aya okhalana eprograma yoolaleerya?

• Muloko onrowa waalipiha sai ni waakhaliherya mapioneero?

• Mareeliho xeeni aniphwanya aya anna ni arokora anirumeela ntoko pioneero?