Moota Saaleveleliwa Aya Itampi Ohinatthi Mukuttho Wowoopola

Enamuna emosa nikhanle ahu ooleveleliwa itampi sahu, ori mukuttho Yesu ovanhe awe orumeelaka ephome awe. (aEef. 1:7) Masi hata vari siiso, Biibiliya onihimya so: “Muluku . . . , khoonihenrye paahi opixa wawe murima, olevelelaka itampi saapakiwe khalai”. (aRom. 3:25) Masi Yehova aalevelela sai itampi sa atthu, ohinatthi mukuttho wowoopola okathi omosa-ru ohinahiya okhala axariya?

Yehova aahileiherya wiira aamukhumelela “osuulu” waarowa owoopola ale animwaamini yena ni sooleiherya sawe. Mwaha wa yooleiherya eyo, mwa moonelo awe Yehova aahooniherya wiira oovaha mukuttho. (Maph. 3:15; 22:18) Muluku aanisuwela wiira, mwanawe, aamoorwa wiira ovahe mukuttho valaponi okathi wooreerela. (aGal. 4:4; aHeeb. 10:7-10) Okathi Yesu aari awe valaponi, Yehova aahinvaha owerya wiira olevelele soottheka hata saapakiwe ohinatthi ovaha mukuttho wowoopola. Yesu aahipaka eyo maana aanisuwela wiira mukuttho wowoopola waamwaakhaliherya oleveleliwa itampi saya ale yaamwaamini. — Math. 9:2-6.