Makoho Anikohiwa ni Ale Anisoma Irevista Sahu
Xeeni atthu akina anihimya aya wiira Esalimo 12:7, enihimya “moolumo a Yehova” ari eveersu 6, variki Biibiliya a Elapo Esya, aalavulaka ale “ohaawa” anihimmwa eveersu 5?
Okathi ninthokorerya ahu Esalimo 12, ninnoona wiira eveersu 7, enaahimya atthu.
Esalimo 12:1-4, ninsoma so: “Khavo-tho mutthu òrera murima. Khamphwanyaneya-tho mutthu a ekekhai, nnákhala mmosá”. Nave Esalimo 12:5-7, Davidi ohimmye so:
“‘Mwaha wa atthu oohaawa anihaaxiwa,
Mwaha wa atthu oohaawa aninla,
Miyo kinoovenya kipake etthu’, onihimya Yehova.
Miyo ‘kinoowoopola mmatatani mwa ale anaathanya’.
Moolumo a Yehova, tootepa oreera:
Ari ntoko eparatha yooreerihiwa nfoornuni epakiwe ni oloko, eparatha yooreerihiwa ikwaha 7.
Nyuwo Yehova, munimwaakhapelela awo;
Munoowaakiha atthu awo ootheene, mmatatani mwa atthu ala ootakhala, mahiku ootheene”.
Eveersu 5, Muluku onihimya wiira onoowakiherya amasikhini anihaaxiwa.
Moolumo ari eveersu 6, anihimya so: “Moolumo a Yehova, tootepa oreera; ari ntoko eparatha yooreerihiwa”. Tthiri ti siiso ootheene ahu nnoonela ahu moolumo a Muluku — Esal. 18:30; 119:140.
Vaano nwehe etthu enihimya aya moolumo ari eveersu 7: “Nyuwo Yehova, munimwaakhapelela awo; Munoowaakiha atthu awo ootheene, mmatatani mwa atthu ala ootakhala”. Eveersu ela enihimya wiira ‘onimwaakhapelela’. Tani “awo”anrowa okhapeleliwa?
Okhala wiira eveersu 7 enrwa nuumala eveersu enihimya “moolumu a Yehova”, nto atthu akina woonasa wene pooti wuupuwelaka wiira eveersu 7 entaphulela wiira Muluku ‘onookhapelela’ moolumo awe. Ekeekhai wiira Muluku ookhapelela Nuulumo nawe, Biibiliya, nnaamwi awanani awe yiimananiha ommala-maliha aahiiso okhoottiha wiira otaphuleliwa ni okaiwa. — Yes. 40:8; 1 Ped. 1:25.
Tthiri moolumo ari eveersu 5 ta ekeekhai. Yehova khula okathi onnaakhaliherya ni khonrowa ohiya waakhaliherya atthu “oohaawa anihaaxiwa” ni “atthu oohaawa aninla”. — Yoob. 36:15; Esal. 6:4; 31:1, 2; 54:7; 145:20.
Nuulumo noowi ‘Munninisuka’ ari eveersu 7, anaahimya aani?
Vaavo ninthokorerya ahu Esalimo 12, vannooneya wiira nuulumo noowi “munimwaakhapelela” nnaahimya atthu.
Wanipacerya wa Esalimo 12, Davidi onnilavula voohimya sa ‘arumeyi oororomeleya a Yehova’, yaawo yaawokiwe ni atthu oowootha ni ootakhala. Eveersu 1, Yehova onihimya wiira onimwaamala-maliha alipa-oowootha. Hiyo nihaana okupali wiira Yehova onoopaka eyo maana, eveersu 6 enihimya wiira Yehova toororomeleya.
Tivonto, eveersu 7 enihimya aya wiira Yehova onimwaasuka ni onoowakiha “awo” anihaaxiwa niire so, amasikhini.
Nuulumo noowi “awo” niri eveersu 7, noorumeeliwa mwa Soolempwa sa eHeeberi. Soolempwa sa Ekereku, noorumeeliwa nuulumo noowi “hiyo” ikwaha piili. Yooniheryaka wiira, eveersu 7 enaahimya atthu ororomeleya a Muluku yaawo anihaaxiwa. Moottharelana, eveersu 7 ehimmye wiira “munimwaakhapelela”, eyo piiyo, arumeyi ororomeleya, tanrowa okhapeleliwa mmatatani mwa “atthu ootakhala”. (Esal. 12:7, 8) Biibiliya otaphuleliwe ni soolempwa sa Aramaiku eveersu ela 7 onihimya so: “Nyuwo APWIYA, munoonikhapelela ni munoonopola wa maloko ala a vano wa mahiku ootheene”. Ireferensia iya, sinnooniherya oratteene wiira Esalimo 12:7, kinihimya moolumo a Muluku.
Mpakha-va, Esalimo ela yoonooniherya wiira Muluku onoorowa owaakiha “atthu ororomeleya”.