Mphwanye Opuro Wooloka Para Osoma

Niireke munniphavela ottottela mureerelo yoosoma anyu ya omwaneene? Malakiheryo ala anittharelana animookhaliheryani ottottela mureerelo yoosoma anyu:

• Mphavelaseke opuro wooloka. Mphavelaseke opuro wooloka ni wookokola wiira musomeke saana. Nyuwo pooti okilaathi vakhatterani ni meesa, aahiiso pooti okhumela vate wiira mphwanye opuro wooloka.

• Mphavelaseke opuro munoona anyu wiira munookhala oomaaleleya mekhinyu. Vahalaka oxa, Yesu aahirowa “opuro wahaakhanle atthu, onapacerya ovekela”. (Mar. 1:35) Vakhala wiira khivanweryaneya okhala mekhinyu, nyuwo pooti waaleela amusi anyu, aahiiso ale munikhalana anyu eprokrama anyu ya omusoma Biibiliya, wiira waphiya okathi owo, akhale oomaaleleya.

• Mwiimananiheke wiira ehikhale etthu enrowa owaakanyeryani. Akhala wiira mummurumeela telefoni aahiiso tableti anyu okathi munisoma anyu, mummaaliheke wiira ehikhale etthu enrowa owaakanyeryani. Okathi munisoma anyu, moona wiira yookhala etthu munireerela anyu olokiherya, mulepeke inoota sanyu wiira muhiliyale, nuumala-vo, mutthikeleke osoma. Vakhala wiira okathi munisoma anyu muupuwelo anyu khonikhala vaavo, muhiyereryeke okathi vakhani nuumala-vo mwiixookoleke aahiiso mweetteke vakhani.