Nsina na mBiibiliyani Vamurinkini wa Khalai

Mwaakha wa 2012, atthu anithipa mapuro yaakhaliwa khalai, yaahiphwanya mavali a murinki wa iyaakha 3.000 sivinre. Nto yowiiraneya ele yaari yookuxa murima. Nthowa xeeni? Khahiyo mwaha wa mavali a murinki ole, masi mwaha wa moolumo yaalempwale vamurinkini.

Vaavo anamathipa ale yaattopanyale aya mavali ale, yaahiwerya osoma moolumo yaalempwale vamurinkini a elavulelo ya oKanani. Moolumo awo taala: “Eshba’al Ben Beda”, yaawo anitaphulela: “Exibayali, mwaana a Beda”. Ela ekwaha yoopacerya ale anithipa milepe, aphwanyale aya nsina nilempwale ene vamurinkini wa khalai.

Mutthu mukina iitthaniwa Exibayali, onnilavuliwa mBiibiliyani. Owo aari mwaana a Mwene Sawuli. (1 Wahala 8:33; 9:39) Prusoore Yosef Garfinkel, aakhanle okathi waaphwanyiwe aya murinki ole, onihimya so: “Ti vookuxa murima woona wira nsina na Exibayali nenno nimphwanyaneya mBiibiliyani, vano ninniphwanyaneya-tho mwa soohimmwa sa ale anithipa milepe, nooniheryaka paahi okathi wa olamulelo wa Mwene Davidi”. Atthu akina anuupuwela wira naari nsina naarumeeliwe okathi ole. Nna ntakiheryo nikina nnooniherya moota ale anithipa milepe, anikhaliherya aya ele elempwale mBiibiliyani!

MBiibiliyani, Exibayali mwaana a Sawuli onnihimmwa-tho okhala Ixiboxethi. (2 Samuweli 2:10) Nto xeeni nuulumo noowi “bayali” nihalaka oranttelihiwa ni “boxethi”? Soohimmwa sa ale anithipa milepe sinooniherya wira, waaniheryasa mwaha woowi ole aalempe eliivuru ya Samuweli a Nenli, khaaphavela orumeela nsina noowi Exibayali, okhala wira aIsarayeli yaarowa omuupuwelaka muluku Bayali, yoowo aari muluku a oruwerya, aakokhoreliwa ni atthu a oKanani. Masi, mBiibiliyani, eliivuru Yoopacerya ya Wahala, ninniphwanya nsina na Exibayali.