Mwaha 2
Ejardim Yooreera
NKAWEHANI valaponi va! Moota ery’aya yooreera etthu eri yotheene! Nkawehani munyepu ni mirii, ithutuu ni inamaa sotheene. Nyuwo munniwerya ohiyaniha etthepo piivi ni akharamu paavi?
Ejardim ela yooreera ekhumelenle sai? Saana, nrowee niwehee moota Muluku saalokihenrya awe elapo ya vathii wa hiyo.
Wanipacerya, Muluku aahipaka munyepu ooripelela wira okhuneeleke etthaya. Nto aahipaka mithinto sotheene sa mirii saamukhaani, makukhu ni mirii. Itthu iya sinimela sinnikhaliherya oreeriha elapo ya vathii. Masi sinnipaka sinceene ovikana vo. Sinceene sa iyo sinninivaha-tho soolya soosiva.
Vattuli vaya, Muluku aahipaka ihopa wira sikateke mmaasini ni axipalame wira avaveke musuluu. Owo aahaapaka alapwa, akwaatu ni ikhavalo; inamaa suulupale ni inamaa saamukhaani. Inamaa xeeni sinkhala waattamela owannyu? Khinnihakalala mwaha wa Muluku opaka itthu iya sotheene wa hiyo?
Wanikisa waya, Muluku aahipaka nipuro nimosaa mu elapo ya vathii okhala navameekh’aya vanceene. Owo aahiihana nipuro nna okhala ejardim ya wEedeni. Nna naari noomalela tthiri oloka waya. Etthu eri yotheene yaari mme yaari yooreera. Nto Muluku aaphavela wira elapo yotheene ya vathii ekhalee ntoko ejardim ela yooreera yaapanka awe.
Masi nkatthikelani-tho oweha elatarato ya ejardim ela. Nyuwo munnisuwela yeele Muluku yoonaly’awe wira yaanihalela? Nrowee niwehee.