Mwaha 26

Yobi Onniroromeleya Wa Muluku

NYUWO munnimoonela othunku mulopwana ola oniwereiwa? Nsina nawe ti Yobi, nto muthiyana owo mwaarawe. Nyuwo munnisuwela enihimya awe wa Yobi? ‘Munveehe Muluku nto mukhwee.’ Nrowee noone nthowa naya nnimwiiriha ohimya etthu ntoko eyo, ni nthowa xeeni Yobi vanihaawexa awe.

Yobi aari mulopwana oororomeleya yoowo aamwiiwelela Yehova. Owo aakhala elapo ya wUsi, voohirakamela oKanani. Yehova aanimphenta vanceene Yobi, masi aahikhala mutthu mukina yoowo aamunyokha. Nyuwo munnimusuwela tanii?

Ola aari Satana Diabo. Muupuweleleke wira, Satana orii nlaikha nootakhala yoowo onimunyokha Yehova. Owo aari oowerya owiiriha Adamu ni Eva ohimwiiwelela Yehova, ni uupuwela wira anwerya omwiiriha mutthu ori otheene ohimwiiwelele-tho Yehova. Masi aahiwerya-nto? Nnaari. Nkuupuweleleni paahi alopwana ni athiyana anceene oororomeleya yaawo niwiixuntta ahu. Akavii a yaawo muniwerya anyu waaromola?

Nuumala okhwa Yakobe ni Yosefe wEjiitu, Yobi aari mutthu oororomeleya vanceene wa Yehova elapo yotheene ya vathii. Yehova aaphavela omusuweliha Satana wira khaawerya omwiiriha ori otheene okhala ootakhala, siiso aahimuleela wira: ‘Nkamooneeni Yobi. Nkawehani moota orya awe oororomeleya wa miyo.’

Satana aahivaanyiha oriki: ‘Owo t’ororomeleya, okhala wira nyuwo moomureeliha ni ookhalana itthu sinceene sooloka. Masi akhala wira munookumiha itthu iya, owo onrowa wooveehani.’

Siiso Yehova aahihimya wira: ‘Murowee. Mwakumihe itthu sotheene. Mmwiirele Yobi itthu sootakhala sotheene siniphavela anyu. Ninrowa woona akhala wira onookiveeha miyo. Paahi thokoreryani wira muhimwiive.’

Wanipacerya, Satana aahiiriha wi anawiiye yiiye inyompe sa Yobi ni ikamelo, nto ipwittipwitthi sawe saahiiviwa. Nuumala vo aahiwiiva ni munamukhaya an’awe 10 aaxilopwana ni aaxithiyana. Moottharelana, Satana aahinvaha Yobi eretta yootakhala vanceene. Yobi aahihaawa vanceenexa. Ti nthowa naya mwaara a Yobi vanimwiirela awe so: ‘Munveehe Muluku nto mukhwee.’ Masi Yobi khaarowa wiira eyo. Nave-tho, yaahirwa apatthani awe araruu oowoka ni yaahimuhimeerya owo wira ohiira itthu sootakhala. Masi Yobi aahivikaniha okhala oororomeleya.

Ela yaahimuhakalaliha vanceene Yehova, nto vattuli vaya aahimureeliha Yobi, ntoko sinoona anyu valataratoni va. Owo aahinvoniha eretta awe. Yobi aahikhalana anamwane akina ooreera 10, nto aahikhalana inyompe, ipwittipwitthi ni ikamelo sinceene ikwaha piili ovikana saarina awe khalai.

Nyuwo munookhala oororomeleya wa Yehova okathi wotheene ntoko Yobi? Mwiira siiso, Muluku onrowa wooreelihani-tho. Nyuwo munoowerya okhala moohimala vaavo elapo yotheene ya vathii, vanrowa aya opakiwa okhala ntoko tthiri ejardim yooreera ya wEedeni.

Yobi 1:1-22; 2:1-13; 42:10-17.