Mwaha 47
Nawiiye Mmosaa Wisarayeli
NKAWEHANI ele mulopwana ola enithipela awe muheemani mwawe! Ekuwo emosaa yooreera, nipattuxa nimosaa na eweero ni ipasulela sikina sa eparatha. Owo okunxe mmuttetthe wa oYerikhoo. Masi saatthuneya wiirihiwa exeeni itthu sa muYerikhoo? Nyuwo munnuupuwela?
Iyo saahaana ohononiwa, masi eweero, eparatha saahaana oroihiwa nipuro ninsukiwa muhakhu mu etabernaakulo ya Yehova. Siiso atthu ala khamwiwelenle Muluku. Awo ahiiya itthu siri sa Muluku. Nsina nawe mulopwana owo ti Akani, nto ale arina awe ti akina a emusi awe. Nrowee niwehee eniiraneya.
Nuumala Akani wiiya itthu iya, Yoxuwa onaaruma alopwana akina orowa owana ni atthu a muttetthe wa Ayi. Masi awo anniweriwa mukhottoni. Akina anniiviwa, nto oohalela annitthyawa. Yoxuwa orii ooriipiwa murima vanceene. Owo oniipopheela vathii ni khiyavekela wa Yehova: ‘Xeeni muhiyaka yiiraneyaka etthu ela wa hiyo?’
Yehova onaakhula wira: ‘Nvenye! Isarayeli oottheka. Ookuxa itthu saatthuneya ohononiwa aahiiso oroihiwa mutabernaakulo ya Yehova. Awo ahiiya ekuwo yooreera ni khovitha. Nkinrowa wooreelihani mpakha muhononne ene iyo, n’uwo-tho okunxe itthu iya.’ Yehova onihimya wira onrowa omooniherya Yoxuwa mulopwana ola ootakhala.
Siiso Yoxuwa onaathukumanya atthu otheene poromosa, nto Yehova onnimusuwanyeiha Akani mulopwana ootakhala. Akani onnihimya wira: ‘Miyo kitthenke. Kaahoona ekuwo emosaa yooreera, nipattuxa na eweero ni ipasulela sa eparatha. Kaahiphavela vanceenexa mpakha okuxa iyo. Nyuwo munrowa ophwanya iyo sithipeliwe ene vathii muheemani mwaka.’
Vaavo itthu iya vaniphwanyiwa aya ni oruuhiwa wa Yoxuwa, owo onnihimya wa Akani: ‘Xeeni munikumiheryaka mixankiho? Vano Yehova onrowa oruuha muxankiho wa nyuwo!’ Vanonto atthu otheene anninvonyakasa Akani ni maluku vamosaa ni emusi awe mpakha okhwa. Ela khennooniherya wira hiyo nihikhala-khale nikuxaka itthu soohikhala sawihu?
Nuumala eyo aIsarayeli annitthikela-tho owana ni atthu a Ayi. Mukwaha ola Yehova onnaakhaliherya atthu awe, nto awo annaawerya mukhottoni.