Mwaha 74

Mulopwana Mmosaa Ohinoova

MWAAWEKE atthu awo ammunyohola mmiravo ola. Munnimusuwela tanii ola? Ola Yeremiya. Ola mprofeta mmosaa ootthuneya vanceene a Muluku.

Niinanoru nuumala Mwene Yosiya opacerya waapwetexa amuluku a ethiru mulaponi, Yehova onimuleela Yeremiya wira okhalee mprofeta Awe. Hataa vari siiso, Yeremiya onuupuwela wira owo ootepexa oyeva wira okhalee mprofeta. Masi Yehova onimuleela wira Owo onirowa omukhaliherya.

Yeremiya onaaleela anaIsarayeli wira ahiyee ovara itthu sootakhala. ‘Amuluku yaawo atthu a maloko anaakokhorela aya ta ethiru,’ owo onnihimya. Masi anaIsarayeli anceene yaathanla waakokhorela amuluku a ethiru ohiya omukokhorela Muluku a ekeekhai Yehova. Vaavo Yeremiya vanaaleela awe atthu wira Muluku onrowa waahukhumu mwaha wa sootakhala saya, awo yaammutheya paahi.

Iyaakha sinnivira. Yosiya onnookhwa, nto nuumala miyeeri miraruu mwanawe Yoyakimi onnikhala mwene. Yeremiya onnivikaniha waaleela atthu wira: ‘Yerusalemu onirowa ohononiwa akhala wira khimunrowa ottharuwa iphiro sanyu sootakhala.’ Anamukuttho aninvara Yeremiya ni khiyakhuwela ariki: ‘Nyuwo moohaana wiiviwa mwaha woohimya itthu iya.’ Nuumala vo awo anaaleela mapewe a Isarayeli wira: ‘Yeremiya oohaana okhwa, okhala wira oolavula moovaanyiha muttetthe ahu.’

Exeeni vano Yeremiya enirowa awe opaka? Owo khonoova! Owo onaaleela otheene ayasa wira: ‘Yehova ookiruma miyo wira kooleeleni itthu iya. Akhala wira khimunrowa ottharuwa iphiro sanyu sootakhala, Yehova onirowa omuhonona Yerusalemu. Masi suwelexani ela: Akhala wira munookiiva, nyuwo munrowa omwiiva mutthu yoowo ohivanre etthu yootthekeya.’

Mapewe anneemererya wira Yeremiya okhalee mukumi, masi anaIsarayeli khanttharuwa iphiro saya sootakhala. Vattuli vaya Nabukhodonosori, mwene oBabilonia, onnoorwa owana ni Yerusalemu. Wanikisa waya Nabukhodonosori onaapaka anaIsarayeli okhala arumeyi awe. Owo aahaakuxa ikonto sinceene aaroihaka oBabilonia. Mupuwele paahi moota saarowa anyu okhala okuxiwa ni atthu ahinaasuwela anyu yooroihakani elapo ehinsuwela anyu.

Yeremiya 1:1-8; 10:1-5; 26:1-16; 2 Mamwene 24:1-17.