NIHIKU nimosaa Yesu onimuleela mulopwana mmosaa wira owo aahaana omphenta namwaattamanani awe. Mulopwana owo onimukoha Yesu wira: ‘Tanii orii namwaattamanani aka?’ Saana, Yesu onnisuwela yeeyo mulopwana ola enuupuwela awe. Mulopwana owo onuupuwela wira paahi atthu a nloko ni a etiini awe tari anamwaattamanani awe. Siiso nrowee niwehee yeeyo Yesu enimuhimeerya awe.

Ikwaha sikina Yesu oniixuttiha orweela mwa waalela ehantisi. Vano ela ti etthu enipaka awe. Owo onaalela ehantisi voohimya sa muYuda ni muSamariya. Hiyo nihiixutta wira anamunceene aAyuda khanaatthuna aSamariya. Saana, ela erii ehantisi ya Yesu:

Nihiku nimosaa aahikhala muYuda aakhuruwela ephiro ya miyaako orowaka oYerikhoo. Masi anawiiye yaahimutuphela. Awo yaahikuxa musurukhu awe ni ommana mpakha ohala okhwa.

Vattuli vaya, muYuda mulipa a mukuttho aahirwa mu ephiro eyo. Owo aahimoona mulopwana oomaniwa. Nyuwo munuupuwela wira aapankenii? Vootikihiha vo, paahi owo aaxeremenle mpantta mukina wa ephiro ni onavikaniha orowaka. Nuumala vo aahirwa mutthu mukina oosiveliwa etiini vanceene. Owo aari muLevi. Niireke wi owo aaheemela? Nnaari, owo hataa kheemenle wira omukhaliherye mulopwana oomaniwa. Nyuwo munoowerya onweha mulipa a mukuttho ni muLevi voorakamela arowasaka okhuruweloni.

Masi munweheke owo ori va ni mulopwana oomaniwa. Owo muSamariya. Nto onimukhaliherya muYuda. Owo onihela murette makhwatta awe. Vattuli vaya, onimukuxa muYuda omuroihaka nipuro naakela awe omumula ni okhala saana.

Nuumala omaliha ehantisi awe, Yesu onihimya wa mulopwana yoowo aamukonhe nikoho: ‘Tanii mwa atthu ala araruu munuupuwela anyu wira aahiira ntoko namwaattamanani a mulopwana oomaniwa owo? Aari toko mulipa a mukuttho, muLevi aahiiso muSamariya?’

Mulopwana onaakhula wira: ‘Mulopwana muSamariya. Owo taamureerenle murima mulopwana yoowo oomaniwa.’

Yesu onihimya so: ‘Nyuwo muhaakhula saana. Siiso rowani ni mwaathokoreryeke akina mmukhalelo mmosaru ntoko siiralya awe.’

Nyuwo munnisiveliwa ni mwiixuttiheryo a Yesu? Hiyo nnoowerya wiixutta itthu sinceene, sinceenexa sootthuneya akhala wira ninniwiriyana yeele Yesu enihimya awe mBiibiliya, khahiyo siiso?