Mwaha 98

Vamwaako Wa Olivera

OLA Yesu vaMwaako wa Olivera. Alopwana axexee orina awe ti arummwa awe. Awo ti anna Andreya ni Pedru, ni-tho anna Yakobo ni Yohani. Ele eniwerya anyu woona vale empa ya Muluku muYerusalemu.

Aavira mahiku manli okhuma vaavale Yesu vaaronwa awe oYerusalemu onwenle ene mwaabuuru. Nna nihiku na Namanli. Mmeeloni mwaya voosiisu Yesu aari mpaani mwa Muluku. Vale alipa a mukuttho yaaheererya onvara Yesu wira amwiive. Masi awo yaahoova opaka ela okhala wira atthu yaanisiveliwa ni Yesu.

‘Inowa nyuwo ni anamwane a inowa!’ Yesu aahiwiitthana siiso ahooleli ale a itiini. Nuumala vo Yesu aahihimya wira Muluku onrowa waahukhumu mwaha wa itthu sotheene sootakhala seiyo sivanrya aya. Vattuli vaya Yesu aahiwela vaMwaako wa Olivera, nuumala vo, arummwa ala axexee yaahipacerya opaka makoho. Nyuwo munnisuwela yeeyo enimukoha aya Yesu?

Arummwa anikoha voohimya sa itthu sa muhoolo. Awo annisuwela wira Yesu onrowa omaliha otakhala wotheene mulaponi. Masi aniphavela wira asuwele silinii vanrowa aya wiiraneya ela. Silinii vanrwa awe-tho Yesu wira olamulele ntoko Mwene?

Yesu onnisuwela wira atthareli awe mulaponi khanrowa okhala oowerya omoona vaavo vanrwa awe-tho. Nthowa noowi onrowa okhalaka wirimu, nto awo khanrowa okhala oowerya omoona iwe. Siiso Yesu onaaleela arummwa awe itthu sikina seiyo sinrowa wiiraneya mulaponi vaavo vanilamulela awe ntoko Mwene wirimu. Tisivi imosaa sa itthu iya?

Yesu onihimya wira vanrowa okhala ikhotto suulupale, atthu anceene anrowa owereiwaka ni ovoliwa etala, otakhala onrowa otepa vanceene, ni sinrowa okhala itetere suulupale. Yesu nave-tho onihimya wira ihapari sooreera sa omwene wa Muluku sinrowa olaleeriwa mapuro otheene mulaponi. Niireke wi hiyo ninnoona itthu iya siiraneyaka okathi ahu ola? Aayo! Nto siiso hiyo nnoowerya osuwelexa wira Yesu orii vano olamulelaka wirimu. Moohipisa owo onrowa omaliha otakhala wotheene mulaponi.

Mateyo 21:46; 23:1-39; 24:1-14; Marko 13:3-10.