Mwaha 102

Yesu Onnikhala Mukumi

NYUWO munnimusuwela tanii muthiyana ola ni alopwana awo anli? Muthiyana owo ti Maria Madalena, mpatthani a Yesu. Nto alopwana awo arina ikuwo sootteela malaikha. Ekatthii ela yaamukhaani yeeyo Maria eniweha awe nipuro nenno naakuhiwe erutthu ya Yesu nuumala okhwa. Nipuro nna nniihaniwa mahiye. Masi vano erutthu eyo khekhanle! Tanii okunxe? Nrowee niwehee.

Nuumala Yesu okhwa, alipa a mukuttho anihimya wa Pilato wira: ‘Vaavo Yesu aary’awe mukumi aahihimya wira aarowa ohihimuxiwa vattuli va mahiku mararuu. Siiso murumihe wira mahiye alipeleliweke. Nto awiixutti awe ahiwerye wiiya erutthu awe ni ohimya wira oohihimuxiwa mwaalipa-ookhwa!’ Pilato onaaleela alipa a mukuttho wira yaarumihe atoropa wira alipeleleke mahiye.

Masi voosiisu ene nihiku na neeraru nuumala Yesu okhwa, nlaikha na Yehova mootutuxerya ninniphiya. Nno ninnipirikixa nluku vamahiyeni. Atoropa arii oowoovexa mpakha ohiwerya weeteteya. Wanikisa waya, vaavo vaniweha aya muhina mwa mahiye, erutthu khekhanle! Atoropa akina anirowa opooma ni waaleela alipa a mukuttho. Nyuwo munnisuwela yeeyo enipaka aya alipa a mukuttho ootakhala? Awo anaaliva atoropa wira yoothe. ‘Muhimyeke wira awiixutti awe ahoorwa ohiyu, vaavo niira ahu nriki orupa, ni yiiya erutthu eyo,’ alipa a mukuttho annaaleela atoropa.

Okathi yoowo, athiyana akina apatthani a Yesu annixukurya mahiye. Moota sinkhala aya ootikinihiwa vaavo vaniphwanya aya mahiye ahikhanle etthu! Mootutuxerya malaikha manli oowara ikuwo sowaarya annikhumela. ‘Xeeni omuhaayasaka Yesu va?’ Awo annikoha. ‘Owo oohihimuxiwa. Mwaakuveke murowee mwaaleele awiixutti awe.’ Athiyana awo nto annitthyawa moowaakuva! Masi aryeene mphironi mulopwana mmosaa onniweemexa awosa. Nyuwo munnimusuwela tanii ola? Ti Yesu! ‘Rowani mwaaleele awiixutti aka,’ owo onnihimya.

Vaavo athiyana ala vanaaleela aya awiixutti wira Yesu mukumi ni wira awo aamoona, awiixutti annoona okhala voovila okupali ela. Pedru ni Yohani annitthyawa arowaka omahiye wira yoone mmensaya, masi mahiye khakhanle etthu! Vaavo Pedru ni Yohani vanikhuma aya, Maria Madalena onihala ottuli. Tivonto vaniweha awe muhina ni onoona malaikha manli.

Nyuwo munnisuwela exeeni yiiranen’ye ni erutthu ya Yesu? Muluku aahiiriha ela olakaseya. Muluku khaamuhihimunxe Yesu ni okumi wa erutthu yoowooneya yeeyo yaakhwanne awe. Owo anvanhe Yesu erutthu esyaa yomunepani, ntoko sirina aya malaikha wirimu. Masi wi owooniherye awiixutti awe wira mukumi, Yesu onniwerya owara erutthu wira atthu aweryeke omoona, ntoko sinrowa ahu wiixutta.

Mateyo 27:62-66; 28:1-15; Luka 24:1-12; Yohani 20:1-12.