Mpantta 5
Yoovaha Yooreera Ya Othanla Mootaphuwa
1, 2. Yoovaha xeeni yootepa oreera eniirela mpantta wa epakeliwo ahu?
WIRA nsuwelexe nthowa naya Muluku oneemererya awe wira atthu ahaaweke ni etthu enrowa awe opaka, hiyo nohaana osuwela moota owo onipanke awe. Owo oonivaha itthu sikina ohiya paahi erutthu ni ottoopare. Nave-tho owo oonivaha mikhalelo sa mmuupuweleloni siri sa vameekh’aya.
2 Etthu yootepa otthuneya evahiwe ahu mmuupuweleloni mwahu ti othanla mootaphuwa. Aayo, Muluku oonivaha owerya wa othanla mootaphuwa. Tthiri ela yaari yoovaha yuulupale ya Muluku.
Moota Opakiwe Ahu
3-5. Nthowa xeeni ninxukhurela ahu yoovaha ya othanla mootaphuwa?
3 Nrowe nthokorerye moota othanla mootaphuwa oniheliwa aya muhina mwaha wa Muluku weemererya wira atthu ahaaweke. Wanipacerya, nkahaya muupuwelele etthu ela: Niireke wira munnisiveliwa othanla mootaphuwa ele enrowa anyu opaka aahiiso olavula, ele munrowa anyu olya ni owara, muteko onrowa anyu ovara, aahiiso opuro ni moota onrowa anyu okhalaka? Aahiiso mumphavela wira mutthu mukina ooleelekeni khuta etthu enrowa anyu olavula ni ovara okathi wotheene wa okumi anyu?
4 Khuuvo mutthu oomalela ontthuna wira okumi awe wotheene weettihiweke ni mutthu mukina. Mwaha wa xeeni? Mwaha wa moota Muluku onipanke awe. Biibiliya oninleela wira Muluku ompanke mutthu ‘ailattanihaka’, nto mukhalelo mmosa Muluku orina awe, ti othanla mootaphuwa. (Maphattuwelo 1:26; Otumererya 7:6) Okathi aapattunxe awe apinaatamu, owo aahaavaha mukhalelo owo wooreerexa, eyo piiyo, othanla mootaphuwa. Nna ti nthowa nimosa ninniiriha okhala oonyoonyiheya naahaaxiwaka ni anamalamulela ootakhala.
5 Tivonto, ophavela otaphuwa khokhumelenle mahala ene, okhala wira Muluku ti Muluku onivaha otaphuwa. Biibiliya onihimya wira: “Vavo vankhalaya Eroho [“munepa wa Yehova”, Tradução do Novo Mundo], vavo-tho onniphwanyaneya otaphuwa”. (2 aKorinto 3:17) Vano, Muluku oonivaha othanla mootaphuwa ntoko mpantta wa mukhalelo ahu. Okhala wira owo aahisuwela moota muupuwelo ahu waarowa aya ovaraka muteko, aahisuwela wira naarowa ohakalala vanceene akhala wira naamukhalana othanla mootaphuwa.
6. Moota xeeni Muluku opanke awe ottoopare ahu wira ovareke muteko moovarihana ni othanla mootaphuwa?
6 Vamosa ni yoovaha ya othanla mootaphuwa, Muluku oonivaha-tho owerya wuupuwelela, ovarerya itthu, opaka soothanla, ni osuwela etthu eri yooloka ni yoohiloka. (aHéberi 5:14) Tivonto, othanla mootaphuwa wahaana orumeeliwaka mwa miruku. Hiyo khanipakiwe ntoko iroboti sihirina muupuwelo, seiyo sihiniwerya othanla ele sintthuna aya opaka. Inama sineettihiwa ni ephattu, nto hiyo khanipakiwe siiso. Ohiya vo, ottoopare ahu opakiwe wira ovareke muteko moovarihana ni othanla wahu mootaphuwa.
Epacereryo Yooreera
7, 8. Epacereryo xeeni yooreera Muluku aavanhe awe axitiith’ihu oopacerya?
7 Ooniheryaka wira aanaaphenta Adamu ni Eva, Muluku aahaavaha-tho axitiith’ihu awo oopacerya, itthu sotheene seiyo mutthu mukina saarowa awe ophavela, ohiya paahi waavaha othanla mootaphuwa. Awo yaahiheliwa mparayiisu yaalikana ni ejardim yuulupale. Nto yaahikhalana itthu sinceene saaphavela aya. Adamu ni Eva yaahikhalana erutthu ni muupuwelelo woohittheka, nto khiyaarowa wuuluvalaka, owereiwa, aahiiso okhwa, eyo piiyo, yaarowa okhalaka okathi wotheene. Yaarowa waayara anamwane oohittheka, yaawo yaarowa-tho okhalana okumi woohakalala ni woohimala. Atthu yaarowa wuncerereyaka valaponi, yaamukhalana muteko woohakalaliha wa wiiriha elapo yotheene okhala eparayiisu.—Maphattuwelo 1:26-30; 2:15.
8 Voohimya sa itthu sotheene saavahiwe, Biibiliya onihimya oriki: “Vawehalyawe itthu sothene sapattunxyawe, Muluku ahòna wira sothene sari sorera sana”. (Maphattuwelo 1:31) Biibiliya onnimuhimya-tho Muluku oriki: “Miteko sawe ti soloka”. (Otumererya 32:4) Aayo, Mpattuxa aahaavaha apinaatamu epacereryo yooreera. Tthiri, eyo yaari etthu yooreera. Nto, owo ohooniherya wira ti Muluku oothokorerya!
Otaphuwa Orina Mukano
9, 10. Nthowa xeeni othanla mootaphuwa ontthuneya aya orumeeliwaka moophwanelela?
9 Nto, niireke wira Muluku aalakenle wira othanla mootaphuwa ohikhalaneke mukano? Nkahaya muupuwelele epooma emosa yoosareya ikaaro, masi ehirina malamulo a moota woweetta mustaraatani, memmo khuta mutthu oneettiha awe ekaaro ottharaka mpantta ontthuna awe ni wuupihaka moota ontthuna awe. Niireke wira mwaamusiveliwa weettiha ekaaro mmikhalelo iyo? Nnaari, okhala wira khivaarowa wiiwananeyaka ni yaamukumiherya ihasara sinceene.
10 Nave-tho eyo enniiraneya ni yoovaha ya Muluku ya othanla mootaphuwa. Otaphuwa moohikhalana mukano waarowa okumiherya ohiiwanana mmuttettheni. Ahaana okhala malamulo aneettiha soovara saapinaatamu. Nuulumo na Muluku nnihimya wira: “Mwetteke ntoko atthu òtaphuwa: nto muhetteleké otaphuwa iwo wira mukhunele sotakhala”. (1 Pedru 2:16) Muluku ontthuna wira othanla mootaphuwa orumeeliweke moophwanelela. Owo olakenle wira hiyo nikhalaneke othanla mootaphuwa orina mukano, ohiya woomalela, niiwelelaka malamulo awe.
Malamulo Awani Anitthuneya Ahu Wiiwelelaka?
11. Malamulo awani nipakeliwe ahu wira niiweleleke?
11 Malamulo awani nipakeliwe ahu wira niiweleleke? Mpantta mukina wa yoolepa ya 1 Pedru 2:16 onihimya wira: “Mwetteke ntoko arumeyi a Muluku”. Eyo khentaphulela ohaaxiwa ntoko epottha, masi entaphulela wira hiyo nipakiwe wira nihakalaleke vanceene vaavo vaniiwelela ahu malamulo a Muluku. (Matheyo 22:35-40) Malamulo awe paahi tanivaha malakiheryo ooloka ovikana malamulo anipakiwa ni apinaatamu. Owo onnilavula oriki: “Ti miyo Apwiya Muluku anyu, kiniwixuttihani wira mphwanyeke sorera: ti miyo kiniwettihani ephiro ela erinanyu otthara”.—Yesaya 48:17.
12. Othanla xeeni mootaphuwa orina ahu muhina mwa malamulo a Muluku?
12 Mu okathi omosaru, malamulo a Muluku anneemererya othanla mootaphuwa vanceene, masi moohivikana mukano. Ela enniiriha wira apinaatamu akhaleke oovirikana ni ooreera waaweha. Nkahaya muupuwelele mithinto soovirikana sa soolya, ikuwo, muusika, miteko, ni ipa mulaponi motheene. Mwekeekhai, hiyo nintthuna othanla mmensihu itthu iyo, ohiya atthu akina onleela ele enitthuneya ahu opaka.
13. Malamulo xeeni eephattu anitthuneya ahu wiiwelelaka wira nttottele mureerelo?
13 Tthiri hiyo nipakiwe wira nihakalaleke vanceene, vaavo vaniiwelela ahu malamulo a Muluku voohimya sa mweettelo wa opinaatamu. Onlikana ni wiiwelela malamulo eephattu a Muluku. Mwa ntakiheryo, akhala wira khanincalela nlamulo na ikuru nenno nniiriha itthu wira simoreleke vathi, nto khitupha nipuro noorakamela vathi, hiyo nnoovulala aahiiso okhwa. Akhala wira hiyo khanincalela malamulo a erutthu ahu ni khuhiya olya, owurya maasi, aahiiso omumula, hiyo nnimookhwa.
14. Ninsuwela sai wira apinaatamu khapakiwe wira yiilamuleleke mekhaya?
14 Tthiri, ntoko siiso nipakiwe ahu wira niiweleleke malamulo eephattu a Muluku, hiyo nipakiwe-tho wira niiweleleke malamulo a mweettelo ni moota wookhala. (Matheyo 4:4) Apinaatamu khapakiwe wira yiilamuleleke mekhaya ni akhumeleke saana moohilamuleliwa ni Mpattuxa aya. Profeta Yeremiya onihimya so: “[Mutthu] khanwerya wettiha mavalo awe. Apwiya! Munttaruxe”. (Yeremiya 10:23, 24) Nto, mmikhalelo sotheene apinaatamu apakiwe wira yiiweleleke olamulelo wa Muluku, ohiya wiilamulela mmensaya.
15. Niireke wira Malamulo a Muluku yaari muritti woolemela wa Adamu ni Eva?
15 Wiiwelela malamulo a Muluku khahiyo waari muritti woolemela wa axitiith’ihu oopacerya. Ohiya vo, eyo yanwiiriha okhala saana, awo aneene ni apinaatamu otheene. Vaakhanle wira anamathelana ale oopacerya yaahiiwelela malamulo a Muluku, atthu otheene yaarowa okhalaka saana. Tthiri hiyo naarowa wiiraka saano nikhalaka mparayiisu yooreera ni yoohakalaliha, ntoko emusi emosa yoophentana ni yowiiraana! Khiwaarowa okhala otakhala, ohaawa, ni okhwa.
[Elatarato eri epaaxina 11]
Mpattuxa aahaavaha apinaatamu epacereryo yooreera
[Elatarato eri epaaxina 12]
Niireke wira mwamphavela weettiha ekaaro mustaraatani moosareya ikaaro, yahaakhanle malamulo a moota woweetta mustaraatani mmo?