Nvikaniheke Okhalana Murettele Vatthokoni Vanyu

1. Itthu xeeni waaniheryasa sinikawanya itthoko?

OOHAKALALA t’ale anikhala itthoko sirina ophenta, wiiwanana, ni murettele. Waaniheryasa etthoko anyu ti yoohakalala. Etthu yooriipiha murima ti yoowi itthoko sinceene khasirina mikhalelo iyo sihimmwale, nto ti sookawanyeya mmathowa oovirikana. Exeeni enikawanya itthoko? Mmuru ola hiyo ninrowa othokorerya mathowa mararu. Itthoko sikina, atthu otheene khaneettela etiini emosa. Nto, ikina, anamwane anikhala ni tiithi aahiiso maama oowaaphwanya. Masi-tho itthoko sikina, ophavela yoolya aahiiso mihakhu sinniwiiriha atthu a vatthokoni okawanyeya. Masi khahiyo wira itthoko sotheene sinikawanyeya mwaha wa muxankiho mmosa-ru paahi. Mwaha wa xeeni?

2. Opuro xeeni atthu akina aniphavelasa aya malakiheryo voohimya sa etthoko, masi tuuvi ori opuro woolokexa oniphwanyiwa malakiheryo awo?

² Etthu emosa, ti moota khuta mutthu onimoonela awe mukhw’awe. Akhala wira munimweererya osuwela saana moonelo wa mutthu mukina, woonasa wene, munoosuwela moota wowiiraaniha etthoko. Etthu ya nenli ti opuro oniphavela anyu malakiheryo. Atthu anceene anitthara miruku sa apatthani aya oomutekoni, anamwaattamanani aya, alipa-oolepa myaha muxornaaleni, aahiiso apinaatamu akina anivaha miruku. Masi atthu akina aaweha ele Nuulumo na Muluku ninlavula aya voohimya sa mukhalelo aya, ni aavarihela muteko ele yiixuntte aya. Moota xeeni ovarihela muteko ele aniixutta aya mu Nuulumo na Muluku enaakhaliherya aya ovikaniha okhalana murettele vatthokoni?​—2 Timótheyo 3:16, 17.

AKHALA WIRA IYANYU TA ETIINI EKINA

3. (a) Tuuvi ori muruku wa Biibiliya voohimya sa othelana ni mutthu a etiini ekina? (b) Malamulo xeeni makina anivareleya muteko akhala wira mulopwana aahiiso muthiyana muKristau eekeekhai, masi mwaarawe wala iyawe khahiyo?

³ Biibiliya onninlopola vanceene wira mutthu ohithelane ni mutthu a etiini ekina. (Otumererya 7:3, 4; 1 aKorinto 7:39) Pooti wiiraneya so: muthiyana wiixutta ekeekhai ya Biibiliya nuumala otheliwa, masi iyawe khuhiixutta. Nto iireke sai? Mwekeekhai, nlelo muthiyana ohaana ovikaniha okhalaka ni iyawe. (1 aKorinto 7:10) Biibiliya onnittittimiherya wira anamathelana ahaana okhalaka hoothe, ni onnitumererya wira awo ahaana ophukaka mixankiho saya, ohiya osyaka. (aÉfeso 5:28-31; Tito 2:4, 5) Sai akhala wira iyanyu onnookhoottiheryani weettela etiini yekeekhai enihimmwa mBiibiliyani? Waaniheryasa owo pooti wookhoottiheryani orowela mithukumano, aahiiso pooti ohimyaka wira khoniphavela wira amwaarawe aroweke empa ni empa alavulaka voohimya sa etiini aya. Exeeni enrowa anyu opaka?

4. Enamuna xeeni emosa muthiyana ootheliwa onrowa awe wooniherya omureerela murima iyawe akhala wira awo khaneettela etiini emosa?

⁴ Mwiikoheke so: ‘Nthowa xeeni aiyaka anuupuwela aya siiso?’ (Miruku 16:20, 23) Akhala wira khonisuwela tthiri etthu enivara anyu, owo pooti oxankiheyaka ni nyuwo. Aahiiso owo pooti okhanyereriwaka ni amusi awe, mwaha woowi nyuwo khamuniirela-tho mpantta soolema sikina seiyo siri sootthuneya wa awo. Mulopwana mmosa oothela aahimmye so: “Kiryeene owaani mekhaka, kaakhala ntoko kiroothaameliwa”. Mulopwana ola oona wira etiini yaanimwaakha amwaarawe. Masi mwaha wa wiixinnuuha, owo khaatthuna weemererya wira omeekha waanimphwanya. Iyanyu pooti ophavelaka wira mmuroromeliheke wira omphenta wanyu Yehova khontaphulela wira vano munrowa omphentaka iyanyu vakhaani ovikana khalai. Muhaana ovirihaka okathi ni iyanyu.

5. Muthiyana eereryaniheke sai owiiwelela wawe aiyawe ahineettela etiini emosa n’uwo?

⁵ Masi akhala wira muniphavela oxintta mwaha owo mwa miruku, muhaana othokorerya etthu ekina yootthuneyexa. Nuulumo na Muluku ninnaatumererya athiyana ootheliwa wira: “Mukhaleke òwìwelela aiy’anyu, sisale sinaphwanelaya atthu Àpwiya”. (aKolosi 3:18) Nto, Biibiliya onnilopola voohimya sa munepa woowiilamula. Mowuncererya, vaavo yoolepa ela enihimya aya wira “[ntoko] sisale sinaphwanelaya atthu Àpwiya”, enooniherya wira owiiwelela aiyawe ohaana ohela-tho muhina owiiwelela Apwiya. Ohaana okhala weereryaneya.

6. Malamulo xeeni anitthuneya wuupuweleliwaka ni muthiyana muKristau?

⁶ Wa muKristau, orowela mithukumano mmulokoni ni ovaha onamoona voohimya sa waamini wawe moovarihana ni itthu siniixutta awe mBiibiliyani, siri itthu sootthuneyexa mu okokhorela wekeekhai, seiyo sihiniphwanela ocompela. (aRoma 10:9, 10, 14; aHéberi 10:24, 25) Exeeni mwaarowa anyu opaka akhala wira pinaatamu onnookhoottiheryani moomalela wiiwelela yooruma emosa ya Muluku? Arummwa a Yesu Kristu yaahihimya wira: “Etthu yotepa otthuneya omwiwelela Muluku ovikana owiwelela atthu”. (Miteko s’Arummwa 5:29) Ntakiheryo naya ninnivaha mathipelo anivareleya muteko mmikhalelo soovirikana sa okumi. Niireke wira omphenta wanyu Yehova onowiirihani onvaha ovuwa, weiwo moophwanelela ori wawawe? Mu okathi omosa-ru, niireke wira niphento ni nttittimiho murina anyu wa iyanyu nnoowiirihani onvuwihaka Yehova paahi mmukhalelo ohinimunyoonyiha iyanyu?​—Matheyo 4:10; 1 Yohani 5:3.

7. Tiivi enitthuneya okhala yoolakela ya muthiyana muKristau ootheliwa?

⁷ Yesu aahihimya wira khivaarowa oweryaneyaka ikwaha sotheene opaka etthu eyo. Owo aahilopola wira mwaha wa ovaanyihiwa okokhorela wekeekhai, atthu owaamini a vatthokoni yaarowa okawanyeya ni ale oohaamini, ntoko siisaale ekatana enikawanya aya etthu. (Matheyo 10:34-36) Muthiyana mmosa ooJapão yaahimwiiraneela etthu ela. Iyawe aanimukhoottiherya omurumeela Muluku mu iyaakha 11. Aanimuhaaxa vanceene ni ikwaha sinceene aaninwalela mukhora. Masi muthiyana owo aanivilela. Apatthani mmulokoni mwa eKristau yaanimukhaliherya. Aanivekela moohihiyererya ni aanilipihiwa ni masu aniphwanyaneya mu 1 Pedru 2:20. Muthiyana ola muKristau, aanisuwela wira avikaniha okhala oororomeleya, nihiku nimosa muhoolo, aiyawe yaamukhala muKristau ni amurumeeleke Yehova hoothe. Tthiri eyo yahiiraneya.

8, 9. Itthu xeeni muthiyana ohinreerela awe opaka wira iyawe ohimukumiheryeke mixankiho?

⁸ Sookhala itthu sinceene soovareleya muteko siniwerya anyu opaka wira murukunuxe moonelo wa ole othelanne anyu. Mwa ntakiheryo, akhala wira iyanyu khoneemererya etiini anyu, muhipakeke etthu enrowa omwiiriha wookhupanyani. Muratteleke empa anyu. Mwiitthokiheke ni wiiwariha oratteene. Mulavuleke moolumo oophenta ni mmuxukhureleke. Mmukhaliheryeke, ohiya omphukela. Mooniheryeke wira munnimuttittimiha ntoko muhooleli a etthoko. Muhinleke ikuhu moona wira mootthekeliwa. (1 Pedru 2:21, 23) Nvileleke soovonya sawe, ni wakhumelela onyakulihana, mowiiyeviha mukhaleke munipacerya oveka oleveleliwa.​—aÉfeso 4:26.

⁹ Muheemererye wira orowa omuthukumanoni mmulokoni okhaleke ti mulattu aya onipisiha anyu yoolya. Nyuwo pooti othanla orowaka olaleerya okathi yoole iyanyu ohikhanle awe owaani. Ti wa miruku muthiyana ohimulaleerya iyawe akhala wira owo khoniphavela. Ohiya vo, ohaana otthara muruku wa murummwa Pedru, oni: “Vano nyuwo athiyana, nwìweleleke aiy’anyu: siso, yakhala wira aiy’anyu khanamini masu a Muluku, ephwanyihiweke wamini ni mwettelo anyu worera. Nyuwo khamumphavela olavula, okhala wira awo animona mwettelo anyu worera ni wottittimiheya”. (1 Pedru 3:1, 2) Athiyana maKristau ootheliwa annikhumela saana yakhala wira annooniherya sowiima sa munepa wa Muluku.​—aGalasia 5:22, 23.

AKHALA WIRA MWAARINYU TA ETIINI EKINA

10. Mulopwana muKristau omweettiheke sai mwaarawe akhala wira khaneettela etiini emosa-ru?

¹⁰ Sai akhala wira mulopwana tori muKristau masi mwaarawe khahiyo? Biibiliya onnivaha malakiheryo mmwaha owo. Onihimya wira: “Mulopwana muKristu akhalana mwar’awe ohinamini, ola atthunaka okhala poromosa, mulopwan’owo ahimuhiyé”. (1 aKorinto 7:12) Nave-tho onnaalopola alipa-oothela oriki: “Mwaphenteke amwar’inyu”.​—aKolosi 3:19.

11. Mulopwana onrowa wooniherya sai wira ookhalana ankhili, ni onnihoolela etthoko awe mooreerela murima, akhala wira mwaarawe khahiyo muKristau?

¹¹ Akhala wira mwaarinyu khoneettela etiini anyu, mukhalane ephoole vanceene wira mmuttittimiheke ni muthokoreryeke moonelo awe. Okhala wira mutthu muulupale, owo ookhalana ehakhi ya othanla etiini oniphavela awe, hata nyuwo muheemereryaka. Ekwaha yoopacerya enivaanela anyu n’uwo voohimya sa etiini anyu esya, muhilipelele wira owo onrowa ohiya sookupali sawe okhuma khalai, wira otthareke etthu eniixutta awe niinano. Ohiya omuleela mookhummwa murima wira soolema sa etiini, owo ni amusi awe aneettela aya ti sowootha, mwiilipiherye moopixa murima wuupuwelela n’uwo mmurumeelaka Biibiliya. Owo pooti woonaka wira khonicaliwa akhala wira nyuwo muniviriha okathi munceene nvaraka miteko sa mmulokoni. Woonasa wene owo pooti ohisiveliwa wira mmurumeeleke Yehova, masi etthu yuulupale eniphavela awe pooti okhala ela: “Miyo kiniphavela wira nviriheke okathi munceene ni miyo!” Mpixeke murima. Omuthokorerya mwaarinyu moophenta, pooti omwiiriha weemererya okokhorela wekeekhai.​—aKolosi 3:12-14; 1 Pedru 3:8, 9.

WAAHUWA ANAMWANE

12. Nnaamwi mulopwana ni mwaarawe avirikanne ene itiini, malakiheryo a Biibiliya arumeeliweke sai voohimya sa waahuwa anamwane?

¹² Etthoko emosa anamathelana ahineettela etiini emosa, ikwaha sikina onnikhumelela muxankiho voohimya sa etiini xeeni anamwane anrowa otthara. Nto malakiheryo a Biibiliya anrowa orumeeliwa sai? Biibiliya onaavaha axitiithi muritti wa owiixuttiha anamwane, masi maama ookhalana-tho muteko wootthuneya mmwaha owo. (Miruku 1:8; munwehe-tho Maphattuwelo 18:19; Otumererya 11:18, 19.) Hata mulopwana oheemereryaka ohoolela wa Kristu, masi nlelo owo tori muru wa etthoko.

13, 14. Akhala wira mulopwana onnimukhoottiherya mwaarawe waakuxa anamwane aarowaka mmithukumanoni aahiiso owiixuttiha Biibiliya, exeeni muthiyana owo onitthuneya awe opaka?

¹³ Axitiithi akina khanikhootta wira axaaraya awiixuttiheke anaaya myaha sa etiini. Akina annikhootta. Exeeni enrowa anyu opaka akhala wira iyanyu khoneemererya wira mwaakuxeke anamwane murowaka mmulokoni aahiiso onookhoottiheryani waasomiha Biibiliya owaani? Vano nyuwo muhaana weereryaniha soovekela tthaaru: etthu enivekeliwa anyu ni Yehova Muluku, ele enivekeliwa anyu ni ohoolela wa iyanyu, ni wa aniinyu anaaphenta anyu. Munrowa weereryaniha sai itthu iya?

¹⁴ Moohaaniherya nyuwo munrowa onvekela Yehova mmwaha owo. (aFilipi 4:6, 7; 1 Yohani 5:14) Masi nyuwo muhaana othanla etthu enrowa anyu opaka. Akhala wira munrowa olavulaka mooreerela murima, mmuleelaka iyanyu wira khahiyo munivaanyiha ohoolela wawe, woonasa wene owo pooti ovukula ovaanyiha wawe. Akhala wira iyanyu onookhoottiheryani waakuxa anamwane murowaka mmithukumanoni aahiiso owiiriha yoosoma ya Biibiliya vatthokoni, nyuwo pooti ovikaniha owiixuttiha. Pooti opaka eyo okathi onivaanela anyu n’awo ni orweela mwa ntakiheryo nanyu nooloka, mweereryaka owiixuttiha omphenta Yehova, waamini Nuulumo nawe, waattittimiha anamuyari aya, ohela muhina paapa aya, waathokorerya atthu akina, ni osiveliwa ovara miteko. Mu okathi aya, paapa aya pooti woonaka sookhumelela sooloka ni pooti oxukhurela wiimananiha wanyu.​—Miruku 23:24.

15. Tuuvi ori muritti wa tiithi muKristau mu owiixuttiha anamwane?

¹⁵ Akhala wira nyuwo mwa mulopwana oneettela eKristau yekeekhai, masi mwaarinyu nnaari, nto muritti wa ‘owettiha ni walaka n’ikano s’Apwiya’ ti wawinyu. (aÉfeso 6:4) Vaavo vanipaka anyu eyo, muhaana waareerela murima, waaphenta ni waathokorerya saana amwaarinyu.

AKHALA WIRA ETIINI ANYU TI YOOVIRIKANA NI YA ANAMUYARI ANYU

16, 17. Malamulo xeeni a Biibiliya anamwane anitthuneya aya wuupuwelelaka akhala wira aneettela etiini yoovirikana ni ya anamuyari aya?

¹⁶ Khahiyo etthu yoorika olelo va anamwane otthara etiini yoovirikana ni ya anamuyari aya. Niireke wira eyo ehiiraneya ni nyuwo? Akhala wira ti siiso, Biibiliya ookhalana miruku wira oovaheeni.

¹⁷ Nuulumo na Muluku nnihimya wira: “Nwiweleleke atith’inyu n’ame anyu mwaha w’Apwiya, okhala wira siso ti vanrerelaya. Ekano ela enihimya wira: ‘Mwattittimihe atith’inyu n’ame anyu’”. (aÉfeso 6:1, 2) Eyo enihela muhina waattittimiha anamuyari anyu mooreerela. Masi nnaamwi owiiwelela anamuyari anyu oryeene wootthuneya, muhaana opaka eyo mmuupuwelelaka Muluku eekeekhai. Vaavo mwaana oninnuwa awe khiyaphiyerya iyaakha onipacerya awe opaka soothanla, onnikhalana muritti muulupale voohimya sa sowiira sawe. Ela ennivareleya muteko ohiya paahi voohimya sa nlamulo na mulaponi, masi vanceenexa voohimya sa nlamulo na Muluku. Biibiliya onihimya wira: “Khula mmosá a hiyo onophukiwa ni Muluku mwaha wa miteko sawe pahi”.​—aRoma 14:12.

18, 19. Akhala wira anamwane aneettela etiini yoovirikana ni ya anamuyari aya, anrowa waakhaliherya sai anamuyari aya osuwela oratteene sookupali saya?

¹⁸ Akhala wira sookupali sanyu siniwiirihani opaka marukunuxo mookumini mwanyu, mweererye wiiwexexa moonelo wa anamuyari anyu. Woonasa wene anoosiveliwa akhala wira, mwaha wa ele eniixutta anyu mBiibiliyani ni ovarihela muteko, enniwiirihani ottittimiha, wiiwelela, ni wiilipiha vanceene ovara muteko anoovekelaaya-ni. Masi, akhala wira sookupali sanyu sa niinano siniwiirihani okhootta sookupali ni soolema seiyo anamuyari anyu anivaha aya efaita yuulupale, awo pooti wuupuwelaka wira nyuwo munikhootta yoohiyeriwa ya nloko aniphavela aya woovahani. Awo-tho pooti oxankiheyaka ni okhala wanyu saana, akhala wira ele enipaka anyu khahiyo etthu yoolimaleliwa mmuttettheni mwanyu, aahiiso akhala wira etiini anyu enniwiirihani ohiphavela itthu sinceene, seiyo anamuyari anyu anuupuwela wira saarowa wookhaliheryani mmukhalelo wa werutthuni. Wiixinnuuha pooti okhala muxankiho mukina. Anamuyari anyu pooti woonaka wira nyuwo munihimya wira khanvonnye, awo tavonnye.

¹⁹ Vaweryaneya vale, mweererye owiiriha anamuyari anyu waasuwela axitokweene a mmulokoni aahiiso Anamoona akina oottokotthela a muloko anyu. Mwaatumererye anamuyari anyu orowa oSalau ya Omwene wira yawiriyane mmensaya ele enilavuliwa, ni oweha oratteene mikhalelo sa Anamoona a Yehova. Mu okathi aya, muupuwelelo wa anamuyari anyu pooti okhala woopatthaneya vakhaani. Nnaamwi anamuyari anyu aryeene anamavaanyiha oothipelela, ahononaka iliivuru sanyu siniixuttiha itthu sa mBiibiliyani, ni akhoottihaka orowela mithukumano sa eKristau, aakhala mapuro makina anireerela osoma, ovaanela ni maKristau akhw’inyu, ni ovaha onamoona ni waakhaliherya akina nnaamwi nihiilokihenrye. Nave-tho nyuwo pooti onvekela Yehova. Amiravo akina annilipelela mpakha ophiyerya iyaakha sa okhuma vatthokoni khiyarowa okhala mekhaya. Moohicikha etthu sa makhalelo a vatthokoni, muhiliyale ‘wattittimiha atith’inyu n’ame anyu’. Mpakeke mpantta anyu wira mukhaliherye okhala murettele vatthokoni. (aRoma 12:17, 18) Mwa sotheene, mphaveleke okhalana murettele ni Muluku.

MUXANKIHO WA OKHALA TIITHI AAHIISO MAAMA OOWAAPHWANYA ANAMWANE

20. Muupuwelo xeeni waaniheryasa anamwane anrowa aya okhalana akhala wira tiithi aya aahiiso maama aya t’owaaphwanya?

²⁰ Mu itthoko sinceene, muxankiho muulupale onikhumelela khahiyo mwaha wa etiini, masi mwaha wa anamwane oowaaphwanya. Itthoko sinceene olelo va sinihela muhina anamwane oowaaphwanya, akhale a mulopwana aahiiso a muthiyana. Mu itthoko iyo, anamwane pooti okhalana ehace ni okhupanya aahiiso woona okhala woovila owiiwelela anamuyari aya. Nto wanikisa waya awo pooti okhoottaka wiimananiha wa namuyari ole aaphwannye, okhala tiithi aahiiso maama ooloka. Exeeni enrowa okhaliherya okhumela saana etthoko erina namuyari oowaaphwanya anamwane?

21. Nnaamwi arina ene mikhalelo soovirikana, nthowa xeeni anamuyari oowaaphwanya anamwane anitthuneya aya ophavelaka malakiheryo a mBiibiliyani wira yaakhaliherye?

²¹ Musuweleke wira nnaamwi sikhanle ene mikhalelo soovirikana vatthokoni vanyu, malamulo a Biibiliya anikumiherya mireerelo itthoko sikina, nave-tho annivariheleya muteko vatthokoni vanyu. Ohicalela malamulo awo, pooti ovukula muxankiho owo mu okathi vakhaani paahi, masi muhoolo mwaya pooti okumiherya mixankiho suulupale. (Esalimo 127:1; Miruku 29:15) Mukhalane ankhili wira nvarihele muteko malamulo a Muluku muupuwelelaka mireerelo sa muhoolo, ni musuwele oratteene nthowa naya atthu akina a vatthokoni anilavula aya ni opaka itthu sikina. Muhaana wooniherya othunku.​—Miruku 16:21; 24:3; 1 Pedru 3:8.

22. Nthowa xeeni waaniheryasa anamwane anrowa aya woona okhala voovila omweemererya tiithi aahiiso maama oowaaphwanya?

²² Ntoko tiithi aahiiso maama oowaaphwanya anamwane, waaniheryasa munnuupuwela okathi mwiira anyu muhithelanne wira anamwane yaanisiveliwa ni nyuwo. Masi okathi muthelanne anyu ni tiithi aya aahiiso maama aya, muupuwelo wa anamwane awo woorukunuwa. Vaavo animuupuwela aya tiithi aya aahiiso maama aya oowaayara, anamwane pooti woonaka okhala woovila owiiwelela ale ahaayanre, woonasa wene yuupuwelaka wira nyuwo muniphavela okuxa ophenta arina aya wa namuyari aya ole ohikhanle. Okathi mukina awo pooti mohuupuwelela owuupuxeryani wira nyuwo khahiyo tiithi aya aahiiso maama aya. Moolumo awo anniwereya. Masi “mphaveleke opixa murima: òwakuva onanariwa muloló”. (Musuweli 7:9) Vanitthuneya okhalana ankhili ni woona othunku wira musuwele weettiherya muupuwelelo wa anamwane.

23. Anamwane oophwanyiwa vatthokoni alakiweke sai?

²³ Mikhalelo iyo ti sootthuneya vanceene okathi mutthu onaalaka awe anamwane. Onitthuneya waalaka anamwane moohihiyererya. (Miruku 6:20; 13:1) Okhala wira anamwane khanlikana, olaka pooti ovirikana moovarihana ni mwaana. Anamuyari akina oowaaphwanya anamwane annoona okhala vooreerela wanipacerya waahiyerya amamawe aahiiso atithi awe oomuyara omulaka mwanaya. Ti vootthuneya-tho wira anamuyari otheene yeemereryeke ni akhaliheryeke olaka onivahiwa mwaana, ahimureerelaka murima paahi ole amuyanre aya ovikana ole amphwannye aya. (Miruku 24:23) Wiiwelela ti vootthuneya, masi ti vootthuneya-tho anamuyari oowaaphwanya anamwane ovilela soovonya. Muhitepaxeke onanariwa. Mwaalakeke anamwane moophenta.​—aKolosi 3:21.

24. Exeeni enrowa okhaliherya osyaka mixankiho voohimya sa mweettelo wooloka eriyari aya atthu a enoka yoovirikana a etthoko erina anamuyari oowaaphwanya anamwane?

²⁴ Ovaanela onoowerya okhaliherya vanceene osyaka mixankiho vatthokoni. Ovaanela iwo pooti okhaliherya etthoko othokoreryaka paahi itthu sootthuneyexa mookumini. (Munwehe aFilipi 1:9-11.) Nave-tho pooti omukhaliherya khuta mmosa a vatthokoni-vo moota onrowa awe okhaliherya ophwanya soolukama sa etthoko eyo. Moowuncererya, ovaanela mootaphuwa pooti osyaka mixankiho voohimya sa mweettelo wooloka. Anamwane axithiyana ahaana owara oratteene ni weettihana oratteene ni tiithi aya oowaaphwanya ni axirokoraya, nave-tho amiravo anitthuneya waattittimiha amamaya oowaaphwanya ni axirokoraya oowaaphwanya.​—1 aTesalonika 4:3-8.

25. Mikhalelo xeeni siniwerya okhaliherya okhala murettele vatthokoni erina namuyari oowaaphwanya anamwane?

²⁵ Mpixeke murima vaavo vaneettiherya anyu muxankiho ola wa vameekh’aya wa okhala namuyari oowaaphwanya anamwane. Vannikuxa okathi wira mwaataane ni anamwane oowaaphwanya. Ophentiwa ni ottittimihiwa ni anamwane ahaayanre anyu pooti okhala muteko muulupale. Masi vanniweryaneya. Okhalana miruku ni wuupuwela oratteene, vamosa ni ophavela vanceene omuhakalaliha Yehova, teri etthu yuulupale eniwerya okhaliha ohakalala vatthokoni erina namuyari oowaaphwanya anamwane. (Miruku 16:20) Mikhalelo iyo sinoowerya-tho wookhaliheryani oxintta saana mixankiho sikina.

NIIREKE WIRA OPHAVELA ITTHU SA WERUTTHUNI ONNIKAWANYA ETTHOKO?

26. Mu inamuna xeeni mixankiho ni miyuupuwelelo voohimya sa itthu sa werutthuni siniwerya aya okawanya etthoko?

²⁶ Mixankiho ni miyuupuwelelo voohimya sa itthu sa werutthuni sinniwerya okawanya itthoko mu inamuna sinceene. Mooriipiha murima, itthoko sikina sinnikawanyeya mwaha wa onyakulihana voohimya sa musurukhu ni ophavela othaaciri. Okawanyeya iwo pooti okhumelela vaavo oowanli anivara aya muteko ota ni anikhalana aya muupuwelelo woowi khuta mutthu orumeeleke musurukhu awe. Hata anamathelana awo asyakaka onyakulihana, masi pooti okhala voovila okhalana okathi wira aviriheke hoothe, vaavo oowanli aya anivara aya muteko ota. Mahiku ala, etthu enaattela wiiraneya mulaponi ti axitiithi okhalaka ottaiwene wa itthoko saya mu okathi munceene, myeeri hata iyaakha, moophavela ophwanya musurukhu munceene yoowo yahaarowa aya ophwanya avaraka owaani. Etthu ela pooti okumiherya mixankiho suulupale.

27. Malamulo xeeni aniwerya okhaliherya etthoko erina mixankiho sa musurukhu?

²⁷ Khakhanle malamulo anikhaliherya moota woweettiha mixankiho iya, okhala wira khuta etthoko yookhalana mixankiho ni soophavela soovirikana. Masi miruku sa mBiibiliyani sinoowerya okhaliherya. Mwa ntakiheryo, eliivuru ya Miruku 13:10 enooniherya wira pooti osyaka onyakulihana akhala wira atthu ‘annivekelana miruku’. Ela khentaphulela paahi mutthu ohimya miyuupuwelelo sawe, masi ophavela miruku ni osuwela moota mutthu mukina onoonela awe mwaha owo. Ompaka palano hoothe a moota woorumeela musurukhu, onoowerya okhaliherya wiiraaniha itthoko. Ikwaha sikina vannitthuneya wira anamathelana oowanli avareke muteko ota, waaniheryasa mu okathi vakhaani, wira akhapelele sootthuneya sikina sa vatthokoni, vanceenexa akhala wira aakhalana anamwane aahiiso atthu akina anaahuwa aya. Akhala wira vannitthuneya opaka eyo, mulopwana ohaana omooniherya mwaarawe wira owo nlelo ookhalana okathi wira aviriheke hoothe. Mulopwana owo vamosa ni anamwane pooti moophenta omukhaliherya muthiyana, avaraka miteko seiyo ikwaha sinceene muthiyana onivara awe mekhawe.​—aFilipi 2:1-4.

28. Soowuupuxerya xeeni sinrowa okhaliherya etthoko okhala yowiiraana, akhala wira enrowa ovarihela muteko soowuupuxerya iyo?

²⁸ Masi, muupuweleke wira nnaamwi musurukhu oryeene etthu yootthuneya molumwenku ola, khonikumiherya ohakalala. Tthiri musurukhu khonivaha okumi. (Musuweli 7:12) Mwekeekhai, ottittimiherya vanceene musurukhu pooti okumiherya maxakha mmukhalelo womunepani ni mweettelo wooloka. (1 Timótheyo 6:9-12) Nto ti voolokexa ophavela toko Omwene wa Muluku ni exariya aya, nsuwelaka wira Muluku onooreeliha wiimananiha onipaka ahu wira niphwanye itthu sinitthuneya mookumini mwahu! (Matheyo 6:25-33; aHéberi 13:5) Akhala wira munoopweha soophavela somunepani nipuro noopacerya ni ophavela toko murettele ni Muluku, nyuwo munooweha wira hata etthoko anyu ekawanyen’ye ene mwaha wa itthu sikina, enrowa okhala etthoko yowiiraana tthiri mu enamuna yootthuneyexa.