Yoosoma 2

Muluku Tani?

Muluku eekeekhai tani, nto nsina nawe tinivi? (1, 2)

Erutthu awe ti ya muthinto xeeni? (3) Mikhalelo xeeni sirina awe sootepa wooneya? (4)

Niireke wira ti vooloka orumeela ilatarato sowuupiwa, wala itthu soolikanyiherya wira nimukokhoreleke Muluku? (5)

Inamuna xeeni piili sinnikhaliherya wiixutta etthu voohimya sa Muluku? (6)

1. Atthu annikokhorela itthu sinceene. Masi Biibiliya onnileela wira Muluku EEKEEKHAI ori mmosa paahi. Owo topattuxale itthu sotheene siri wiirimu ni valaponi. Okhala wira owo tonivanhe okumi, nto ti yoowo Mekhawe paahi, onitthuneya ahu omukokhorelaka.​—1 aKorinto 8:5, 6; Wisupulula 4:11.

2. Muluku ookhalana meetthaneliwo manceene, masi nsina nawe nri nimosa paahi. Nsina nawe ti YEHOVA. ABiibiliya anceene, nsina na Muluku nookumihiwa nto khuranttelihiwa ni meetthaneliwo ntoko APWIYA wala MULUKU. Masi, okathi aalempwe awe Biibiliya, nsina noowi Yehova naaniphwanyaneya memmo ikwaha sowiiraka 7.000!​—Okhuma 3:15; Esalimo 83:18, Tradução do Novo Mundo.

3. Yehova ookhalana erutthu, masi khahiyo ntoko yawihu. Biibiliya onihimya wira ‘Muluku ti Munepa’. (Yohani 4:24, NM) Munepa ori mukhalelo mmosa wa okumi wa vamekh’aya ovikana okumi orina ahu. Khuuvo pinaatamu otonko omoona Muluku. Yehova onikhala wiirimu, masi onnoona itthu sotheene. (Esalimo 11:4, 5; Yohani 1:18) Nto, exeeni ekhanle munepa wootteela? Khahiyo mutthu onilikana ni Muluku. Masi, ti ikuru soowerya sa Muluku.​—Esalimo 104:30.

4. Biibiliya onninihimeerya mikhalelo sa Yehova. Onninihimeerya wira mikhalelo sawe sootepexa wooneya ti ophenta, exariya, ankhili ni owerya. (Otumererya 32:4; Yobi 12:13; Yesaya 40:26; 1 Yohani 4:8) Biibiliya onninleela-tho wira owo toomoriwa ikharari, tooreera murima, toolevelela, toovaha ni toopixa murima. Hiyo, ntoko anaawe animwiiwelela, nohaana wiimananiha omutakiha.​—aÉfeso 5:1, 2.

5. Nuurameleke wala nivekeleke itthu sowuupiwa, ilatarato wala soolikanyiherya, wira nimukokhorele Muluku? Nnaari! (Okhuma 20:4, 5) Yehova onihimya wira hiyo nohaana omukokhorelaka yoowo paahi. Okhala wira ovuwa wawe khonikawana ni mutthu mukina wala etthu ekina. Itthu sowuupiwa khisirina owerya wira sinikhaliherye.​—Esalimo 115:4-8; Yesaya 42:8.

6. Inamuna xeeni sinrowa onikhaliherya omusuwela saana Muluku? Enamuna emosa ori oweha itthu sipattuxalya awe ni wuupuwelela saana iye sinnihimeerya aya. Soopattuxiwa sotheene sa Muluku sinooniherya wira Muluku ookhalana owerya ni ankhili. Ninnoona ophenta wawe orweela mwa itthu sotheene sipattuxalya awe. (Esalimo 19:2-7; aRoma 1:20) Enamuna ekina ennikhaliherya wiixutta etthu voohimya sa Muluku ori omusoma Biibiliya. Biibiliya onninihimeerya itthu sinceene voohimya sa makhalelo a Muluku. Owo-tho, onninihimeerya sa yoolakela awe ni ele eniphavela awe wira hiyo nipakeke.​—Amosi 3:7; 2 Timótheyo 3:16, 17.

[Efootu ya epaaxina 5]

Orweela mwa itthu sipattuxalya awe vamosa ni Biibiliya, hiyo ninniixutta etthu voohimya sa Muluku