Yoosoma 9

Arumeyi a Muluku Ahaana Okhala Ooratta

Xeeni vanitthuneya ahu okhala ooratta mu inamuna sotheene? (1)

Ontaphulela exeeni okhala ooratta momunepani? (2) mmweettelo? (3) mmuupuweloni? (4) ni werutthuni? (5)

Muthinto xeeni wa olavula woohiloka onitthuneya ahu osyaka? (6)

1. Yehova ti Muluku ooratta ni oowaarya. Owo oniphavela wira ale animukokhorela akhaleke ooratta, eyo piiyo, momunepani, mmweettelo, mmuupuweloni, ni werutthuni. (1 Pedru 1:16) Vanitthuneya wiimananiha wuulupale wira mutthu okhale ooratta vamaithoni va Muluku. Ninkhala olumwenku woohiloka. Ninniwana-tho ni soophavela soohiloka sa erutthu ahu. Masi, nihooceye.

2. Oratta Momunepani: Akhala wira nimphavela omurumeela Yehova, nohaana ohiya ottharela sowiixuttiha aahiiso soolema sa etiini yoowoka. Nohaana ohiya weettela etiini yoowoka ni ohikhaliherya etiini eyo mmukhalelo ori wotheene. (2 aKorinto 6:14-18; Wisupulula 18:4) Nuumala wiixutta ekeekhai ya Muluku, nohaana okhalana ephoole wira nihiwokiwe ni ale aniixuttiha sowootha.​—2 Yohani 10, 11.

3. Oratta wa Mweettelo: Yehova omphavela wira ale animukokhorela okathi wotheene mweettelo aya okhaleke wa eKristau yekeekhai. (1 Pedru 2:12) Owo onnoona khuta etthu enipaka ahu hata nipakaka wiphiini. (aHéberi 4:13) Nohaana osyaka orupihana woohiloka ni sowiira sikina soohiloka sa olumwenku ola.​—1 aKorinto 6:9-11.

4. Oratta wa Mmuupuweloni: Akhala wira ninniimananiha wuupuwela itthu sooloka ni soottittimiheya okathi wotheene, mweettelo ahu onrowa okhala-tho wooloka. (aFilipi 4:8) Masi omakela wuupuwela itthu soohiloka, onooniiriha opaka itthu sootakhala. (Matheyo 15:18-20) Nohaana osyaka mikhalelo sa otthekula seiyo saarowa onanariha muupuwelo ahu. Nnoowerya osariha itthu sooloka mmuupuweloni mwahu, nisomaka Nuulumo na Muluku.

5. Oratta wa Werutthuni: Mwaha woowi maKristau arumeyi a Muluku, okathi wotheene ahaana orattela erutthu aya ni ikuwo saya. Nohaana onyawa nuumala orumeela elatrina, ni nihinatthi olya aahiiso waapeya wala ovara yoolya. Akhala wira khamurina elatrina, muhaana othipa ni wuhweela mavi. (Otumererya 23:13, 14) Okhalana oratta wa werutthuni onniphwanyiha ekumi yooloka. Etthoko ya muKristau yohaana okhala yooreera ni yooratteliwa ota ni mpaani. Yohaana okhalaka ntakiheryo nooloka wa atthu akina a mmuttettheni.

6. Olavula Wooloka: Okathi wotheene arumeyi a Muluku ahaana olavulaka ekeekhai. Ale anootha khanrowa okela Momweneni mwa Muluku. (aÉfeso 4:25; Wisupulula 21:8) Makristau khanrumeela moolumo oohiloka. Khamphavela wiiwa, hata olavula itthu sowuuliha muru aahiiso olavula wooruwana. Mwaha wa olavula waya wooloka, maKristau annooneya saana okhala oovirikana ni atthu akina, omutekoni, oxikola aahiiso wa anamwaattamanani aya.​—aÉfeso 4:29, 31; 5:3.

[Efootu ya epaaxina 19]

Arumeyi a Muluku ahaana okhala ooratta mu inamuna sotheene