Yoosoma 8

Anyokhani A Muluku Tanii?

Munyokhani mulupale a Muluku ti Satana, Diabo. Owo yoopattuxiwa yomunepani yamurukunuwenle Yehova. Satana nlelo onniwana ni Muluku ni onnikumiherya mixankiho w’apinaatamu. Satana orii mutakhali. Orii nawoothe ni nawiive.—Yohani 8:44.

Soopattuxiwa ikina somunepani sahiitakaaha ni Satana mwa omurukunuwela waya Muluku. Biibiliya oniwiitthanasa okhala minepa sootakhala. Ntoko Satana, minepa sootakhala anyokhani aapinaatamu. Sinnisiveliwa wahaaxa atthu. (Matheyo 9:32, 33; 12:22) Yehova onompwetexa Satana ni minepa sootakhala. Orina paahi okathi vakhaani wira okumiherye mixankiho w’apinaatamu.—Wisupulula 12:12.

Nyuwo mwaphavela okhala mpatthani a Muluku, muhipake yotthuna ya Satana. Satana ni minepa sootakhala sinnimunyokha Yehova. Sirii anyokhani a Muluku ni iniphavela wira nyuwo-tho mukhale anyokhani Awe. Vantthuneya omuthanla onrowanyu omuhakalaliha—Satana aahiiso Yehova. Mwaphavela okumi woohimala, muthanle wiira yotthuna ya Muluku. Satana ookhalana olavilavi ni inamuna sinceene wira aawoke atthu. Anamunceene anniwokiwa nin’yoowo.—Wisupulula 12:9.