Muruu wa neethanu neeraru
Omwene wa Muluku Exeeni?
Biibiliya onnileela exeeni voohimya sa Omwene wa Muluku?
Omwene wa Muluku onrowa opaka exeeni?
Omwene onrowa waakhwaniherya silini yotthuna ya Muluku valaponi?
ATTHU imilyau sinceene mulaponi motheene aalimalela nivekelo nenno anceene aniihana aya okhala Tiith’ihu, muri wirimu. Nuulumo nla nnihimya nivekelo noovuwa naavahiwe ntoko ntakiheryo ni mwaneene Yesu Kristu. Nna nivekelo nootthuneyexa, nto othokorerya itthu tthaaru sinivekeliwa onrowa wookhaliheryani wiixutta sikina voohimya sa ele Biibiliya eniixuttih’awe tthiri.
2 Wanipacerya wa nivekelo nna na ntakiheryo, Yesu aahaalakiherya yanwiriyana wira: “Vano, mulompeke so: ‘Tith’ihu, muri wirimu! Nsina nanyu nivuwihiwe; omwene anyu onrwele hiyo; otthuna wanyu wireye ntoko wirimu siso vathí-va’”. (Matheyo 6:9-13) Sooveka iya tthaaru sintaphulelani?
3 Hiyo nihiixutta sinceene sa nsina na Muluku, Yehova. Nto noothokorerya itthu sikina sa yotthuna ya Muluku, sa yeele epanka awe ni enrowa awe opaka wa apinaatamu. Nto, Yesu aaphavela ohimya exeeni vaavo aahimmye awe wira nivekeleke so: “Omwene anyu onrwele hiyo”? Omwene wa Muluku exeeni? Moota xeeni onrowa aya ovuwiha, aahiiso otteeliha nsina na Muluku? Nto orwa wa Omwene owo onivaraana sai ni opaka yotthuna ya Muluku?
MAKHALELO A OMWENE WA MULUKU
4 Omwene wa Muluku ekuvernu etikitheriwe ni Yehova Muluku, Mwene aya othanliwe ni Muluku. Tanii okhanle Mwene a Omwene wa Muluku? Ti Yesu Kristu. Ntoko Mwene, Yesu ti muulupalexa waavikana anamalamulela otheene aapinaatamu ni oniihaniwa okhala “mwené a mamwene, pwiya a mapwiya othene”. (1 Timótheyo 6:15) Hataa eriyari ya apinaatamu anilamulela, owo ookhalana owerya wa opaka etthu yooloka waavikana awo.
5 Omwene wa Muluku onrowa olamulelaka ori ene woowi? Saana, Yesu orii woowi? Muupuweleke wira muhiixutta wi owo aahiiviwa ni okhomeliwa vanivattani na nihaaxeryo, nto khohihimuxiwa. Moohipisa, owo aahiwela wirimu. (Miteko s’Arummwa 2:33) Siiso, Omwene wa Muluku orii, wirimu. Ti nthowa naya Biibiliya oniitthana awe okhala “omwene wa wirimu”. (2 Timótheyo 4:18) Nnaamwi Omwene wa Muluku ori ene wirimu, onrowa olamulelaka elapo ya vathii.—Wisupulula 11:15.
6 Exeeni enimwiiriha Yesu okhala Mwene oohilikana ni mukina? Nthowa nimosaa, okhala wira owo khonrowa okhwa. Omulikanyihaka Yesu ni mamwene aapinaatamu, Biibiliya onimwiihana okhala “Yowo pahi t’òhimala. Yowo onkhala vowarya vahimphiyeya”. (1 Timótheyo 6:16) Ela enitaphulela wira etthu eri yotheene yooloka yeeyo Yesu enipaka awe enrowa okhala yoohimala. Nto owo onrowa opaka itthu suulupale ni sooloka.
7 Muthokorerye eprofecia ela ya Biibiliya voohimya sa Yesu: “Mwa yeyo enokhala Eroho y’Apwiya: Eroho y’osuwela ni y’ankhili, Eroho ya miruku ni yo wilipiha, Eroho y’osuwela ni y’omuttittimiha Muluku. Yeyo enolipihiwa mwaha w’omova Muluku. Yeyo khinalamula atthu ntoko sinòneyaya: khimphuka milattu mwaha wo wiwa pahi. Masi enowirela exariya amasikhini, enowakiha n’ikekhai alipa-òhawa. Ni molumo aya, enimwahukhumu ale anahaxa akhw’aya: n’ulavula waya, enimwapwetexa atthu òtakhala murima”. (Yesaya 11:2-4) Moolumo awo anooniherya wira Yesu aahileiheriwa okhala a xariya ni Mwene oowaamorela ikharari atthu valaponi. Munniphavela okhalana namalamulela ntoko owo?
8 Yookhala-tho ekeekhai ekina voohimya sa Omwene wa Muluku: Yesu khonrowa olamulelaka ekhawe. Aakhala akina anrowa olamulelaka ni Yesu. Mwa ntakiheryo, murummwa Paulo aahimuleela Timótheyo wira: “Nalipiheryaka wamini mohawani, nnottikhiwa omwene vamosá ni yowo”. (2 Timótheyo 2:12) Aayo, Paulo, Timótheyo, ni oororomela akina yaawo athanliwe ni Muluku anrowa olamulela vamosaa ni Yesu Momweneni wa wirimu. Arii akavii anrowa okhalana eparakha eyo?
9 Ntoko sooniheriwa aya mMuruu wa 7 a eliivuru ela, murummwa Yohani aahoonihiwa “mwapwittipwitthi [Yesu Kristu] emenlene va mwako Siyoni [mukhalelo awe ntoko mwene wirimu]. Yahikhala vavo ni yowo atthu ikonto miloko mulokó ni miloko mixexe n’atthu ikonto xexé, yale yalempwe vayuji nsina na mwapwittipwitthi ni nsina n’Atithi awe”. Nto tanii ala ari 144.000? Yohani mmensawe onnileela wira: “Awo t’ale animutthara mwapwittipwitthi nipuro ti nipuro ninrowawe. Awo òpoliwe ehavuliwaka mw’atthu akina othene, ntoko milipu sivahiwe Muluku ni mwapwittipwitthi”. (Wisupulula 14:1, 4) Aayo, awo atthareli oororomeleya a Yesu Kristu mwa vameekh’aya athanliwe wira alamuleleke wirimu n’uwo. Nuumala ovenxiwa mwa alipa-ookhwa ni okhalana okumi wirimu, “awo anrowa owettiha atthu a vathí-va”, vamosaa ni Yesu. (Wisupulula 5:10) Okhuma okathi wa arummwa, Muluku onnaathanla maKristau oororomeleya wira amalelihe nummuru na 144.000.
10 Olamuleliwa wa apinaatamu ni Yesu vamosaa ni a 144.000 murehereryo woophenta. Nthowa noowi Yesu onnisuwela yootaphulela ya okhala pinaatamu ni ohaawa. Paulo ohimmye wira Yesu khahiyo “ohinwerya ohawa ni hiyo mwaha w’olosowa wahu: tthiri Kristu ahehereriwa ntoko hiyo mwa sothene, nto khatthenke”. (aHéberi 4:15; 5:8) Nave-tho ale anrowa olamulelaka n’uwo aahaawa ni aavilela ntoko apinaatamu. Moowuncererya, awo aawanana soottheka ni aavilela iretta sa muthinto wotheene. Tthiri, awo anrowa woonela othunku mixankiho seiyo apinaatamu sinikumana aya!
OMWENE WA MULUKU ONROWA OPAKA EXEENI?
11 Vaavo Yesu vaahimenrya awe awiixutti awe wi yahaana ovekela wira Omwene wa Muluku orwee, owo-tho aahimmye wi yahaana ovekela wira yotthuna ya Muluku yiiraneye “vathí-va”. Muluku orii wirimu, nto yotthuna awe yaaniiriwa okathi wotheene ni malaikha oororomeleya. Hataa vari siiso, mMuruu wa 3 a eliivuru ela, hiyo nihiixutta wira nlaikha nootakhala naahihiya wiira yotthuna ya Muluku ni naahiwiiriha Adamu ni Eva ottheka. Mmuruu wa 10, ninrowa wiixutta sinceene sa ele Biibiliya eniixuttih’awe voohimya sa nlaikha nna nootakhala, nenno ninsuwela ahu okhala Satana Diabo. Satana ni malaikha yaawo yaathanlale omutthara owo, akhanle axetwani, yaaheemereriwa okhala wirimu mu okathi vakhaani. Nto, khahiyo wira otheene yaanipaka yotthuna ya Muluku wirimu. Eyo yaarowa orukunuwa vaavo Omwene wa Muluku waarowa awe opacerya olamulela. Yesu Kristu, Mwene otikitheriwe niinano, aahaana owana ekhotto ni Satana.—Wisupulula 12:7-9.
11. Yesu aahimmye wira awiixutti awe yaahaana ovekelaka exeeni voohimya sa yotthuna ya Muluku?
12 Masuu anittharelana a eprofecia anihimya sa ele yaarowa wiiraneya: “Kahìwa nsu nikhuwelaka wirimu, nihimyaka wira: Vano wophiya wopola n’uwerya n’omwene wa Muluku ahu n’utokwene wa Kristu awe! Tthiri mulipa-òwotherya amus’ihu [Satana], yowo ari oholo wa Muluku ahu awòtheryaka othana n’uhiyu, òriheliwa mulaponi”. (Wisupulula 12:10) Nyuwo mooweha soowiiraneya piili sootthuneya sinihimmwa mu iversiikulu iyo siri mBiibiliya? Yoopacerya, Omwene wa Muluku onihooleliwa ni Yesu, woopacerya olamulela. Ya nenli, Satana ohoomoliwa wirimu khoriheliwa valaponi.
13 Sookhumelela xeeni sa soowiiraneya iyo piili? Voohimya sa yeele yiiranen’ye wirimu, hiyo ninsoma so: “Tivó, erimu yothene etteliweke murima, ni nyuwo othene munkhala weiwo!” (Wisupulula 12:12) Aayo, malaikha oororomeleya a wirimu yaahihakalala okhala wira Satana ni axetwani awe yaahoomoliwa wirimu, otheene ari wirimu toororomeleya wa Yehova Muluku. Wirimu iwe, wookhala murettele woohimala ni wiiwanana. Vano yotthuna ya Muluku enniiriwa wirimu.
14 Vano, sai voohimya sa elapo ya vathii? Biibiliya onihimya so: “Nto nyuwo, elapo n’iphareya, motakhaliwa, mana Satana òkhuruwela wa nyuwo ananariwene vanjene, okhala wira òsuwela wira orina okathi vakhani pahi”. (Wisupulula 12:12) Satana oonanariwa mwaha wa woomoliwa wirimu ni ohalana okathi vakhaani paahi. Mu onanariwa wawe onnikumiherya oxanka, aahiiso ‘otakhaliwa’, valaponi. Ninrowa wiixutta sikina voohimya sa ‘otakhaliwa’ iwo mmuruu onittharelana. Masi nuupuwelaka eyo, nnoowerya okoha wira: Omwene onrowa waakhwaniherya sai yotthuna ya Muluku valaponi?
15 Saana, muupuweleke ele eri yotthuna ya Muluku wa elapo ya vathii. Nyuwo muhiixutta eyo mMuruu wa 3. WEedeni, Muluku aahooniherya wi oniphavela wira elapo ela ekhalee eparayiisu yoosareya nloko na apinaatamu a xariya moohimala. Satana aahaatthekiha Adamu ni Eva, nto eyo yaahikhoottiherya waakhwanela yotthuna ya Muluku valaponi, masi yotthuna eyo kherukununwe. Yoolakela ya Yehova nlelo tiila “anaxariya animwakhela elapo yohiyeriw’aya: anrowa okhalaka-mo mahiku othene”. (Esalimo 37:29) Nto Omwene wa Muluku onrowa waakhwaniherya eyo. Mweephiro xeeni?
16 Nkahaya muthokorerye eprofecia eri mu Daniyeli 2:44. Mmo ninsoma so: “Mahiku òmwene owo, Muluku a wirimu onokumiherya omwene ohinrowa omala, nnákhala oweriwa n’umwene mukina. Omwene owo onohonona n’upwetexa omwene wothene wa mulaponi, numalá onrowa okhalaka wa mahiku othene”. Nto ela ennileela exeeni voohimya sa Omwene wa Muluku?
17 Yoopacerya, ennileela wira Omwene wa Muluku aahaana otikitheriwa mu “mahiku òmwene owo”, aahiiso nlelo mamwene makina alamulelaka. Ya nenli, ennileela wira Omwene owo khonrowa omala. Khonrowa oxinttiwa ni oranttelihiwa ni ekuvernu ekina. Ya neeraru, ninnoona wira vanrowa okhala ekhotto eriyari ya Omwene wa Muluku ni mamwene a elapo ela. Omwene wa Muluku onrowa oxintta. Wanikisa waya, vanrowa okhala ekuvernu emosaa paahi yaalamulelaka apinaatamu. Nto apinaatamu anrowa okhalana omwene wootepexa oreera ohitonko aya woona.
18 Biibiliya onnihimya sinceene sa ekhotto eyo yookiserya eriyari ya Omwene wa Muluku ni ikuvernu sa elapo ela. Mwa ntakiheryo, oniixuttiha wira vaavo wanikisa vanaattamela aya, minepa sootakhala sinrowa omwarexa wootha wira saawoke “mamwene a mulaponi mothene”. Siphavelaka exeeni? “Wira yathukumanyere [mamwene] owana ekhotto ya nihiku nulupale na Muluku òwerya sothene”. Mamwene a valaponi anrowa othukumana “nipuro aHeberi anìhanaya oHarmagedoni”. (Wisupulula 16:14, 16) Mwaha wa ele ehimmwale mu iversiikulu iye piili, ekhotto yookiserya ya ikuvernu soomutthu ni Omwene wa Muluku eniihaniwa okhala ekhotto ya Harmagedoni.
19 Omwene wa Muluku onrowa opaka exeeni orumeelaka ekhotto ya Harmagedoni? Muupuwele-tho voohimya sa yotthuna ya Muluku wa elapo ela. Yehova Muluku aalakenle wira elapo ela esareye anaxariya, ni nloko na apinaatamu nooloka nimurumeeleka owo mParayiisu. Itthu xeeni sinikhoottiherya wiireya yotthuna ya Muluku olelo? Yoopacerya, hiyo naanamattheka, ni ninniwereiwa ni okhwa. Nto, nihiixutta mMuruu wa 5, wira Yesu oonikhwela nto hiyo nnoowerya okhala moohimala. Moolikanasa nyuwo munnitthokelela masuu a Ehapari ya Yohani anihimya wira: “Muluku ohaphentexa atthu mpakha wavaha Mwan’awe mmosene, wira othene ale animwamini yowo, ehirimelé, masi ekhalane ekumi ehinimala”.—Yohani 3:16.
20 Muxankiho mukina okhala wira atthu anceene anipaka itthu sootakhala. Awo annootha, owoka, ni orupihana moohiloka. Awo khaniphavela wiira yotthuna ya Muluku. Atthu yaawo anipaka itthu sootakhala anrowa opwetexiwa mu ekhotto ya Muluku ya Harmagedoni. (Esalimo 37:10) Nlelo nthowa nikina nniiriha yotthuna ya Muluku ohiiriwa valaponi okhala wira ikuvernu khiinaatumererya atthu opaka ela. Ikuvernu sinceene sinnikhala sootteettheya, sootakhala, aahiiso sowootha. Mooluluwanya Biibiliya onihimya wira: “Àkhala akina arina owerya, àkhala-tho akina anihawa epuheriwaka n’awo”.—Musuweli 8:9.
21 Nuumala Harmagedoni, apinaatamu anrowa olamuleliwaka ni ekuvernu emosaa paahi, Omwene wa Muluku. Omwene owo onrowa wiira yotthuna ya Muluku ni oruuha mareeliho oohakalaliha. Mwa ntakiheryo, onrowa omukumiha Satana ni axetwani awe. (Wisupulula 20:1-3) Owerya wa mukuttho wa Yesu onrowa ovariheliwa muteko wira apinaatamu oororomeleya ahitthikele-tho owereiwa ni okhwa. Ohiya vo, mu olamulelo wa Omwene, awo anrowa okhalaka moohimala. (Wisupulula 22:1-3) Elapo enrowa okhala eparayiisu. Mwekeekhai Omwene onrowa wiiriha wi yotthuna ya Muluku yiiriweke valaponi ni onrowa otteeliha nsina na Muluku. Ela entaphulela exeeni? Entaphulela wira wanikisa waya Momweneni mwa Muluku khuta mutthu ori mukumi onrowa ottittimihaka nsina na Yehova.
OMWENE WA MULUKU ONROWA OPACERYA SILINI OVARA MUTEKO?
22 Vaavo Yesu aaleelale awe atthareli awe wira avekeleke ariki “omwene anyu onrwele hiyo”, vaari vowooneya wira Omwene khaarwiiye okathi ene yoole. Niireke wira aamoorwa okathi ene yoole Yesu aarowa awe owela orowaka wirimu? Nnaari, okhala wira Pedru ni Paulo yaahihimya wira nuumala Yesu ohihimuxiwa, eprofecia ya Esalimo 110:1 yahaakhwanela wa owo: “Apwiya Muluku ahahimerya Apwiy’aka wira: ‘Mukilathi mono aka wolopwana: kinimwakuxa awanan’inyu ekhalé ipottha sanyu’”. (Miteko s’Arummwa 2:32-34; aHéberi 10:12, 13) Owo waari okathi woolipelela.
23 Aarowa olipelela mpakha silini? Muhina mwa eseekulu 19, alipa-oomusoma Biibiliya eekeekhai yaahikontarela wira okathi woolipelela waarowa omala mwaakha wa 1914. (Voohimya sa mwaakha owo, mwaawehe Apendice, ipaaxina 215-18.) Soowiiraneya sa elapo okhuma mwaakha wa 1914 sinaakhuleliha wira alipa-oomusoma Biibiliya eekeekhai yaahikontarela saana. Waakhwaniheriwa wa iprofecia sa mBiibiliya sinooniherya wira eyaakha ya 1914, Kristu oottikhiwa ntoko Mwene nto Omwene a wirimu wa Muluku woopacerya olamulela. Tivonto, hiyo ninkhala mu “okathi vakhani pahi” yoowo Satana ohalanne awe. (Wisupulula 12:12; Esalimo 110:2) Nnoowerya ohimya-tho moottittimiherya wira moohipisa, Omwene wa Muluku onrowa wiiriha wi yotthuna ya Muluku yiiriwe valaponi. Nyuwo munnoona iya okhala ihapari sooreera? Munnikupali wira eyo ekeekhai? Muruu onittharelana onrowa wookhaliheryani woona wira Biibiliya onniixuttiha itthu iya tthiri.
ELE BIIBILIYA ENIIXUTTIH’AWE
▪ Omwene wa Muluku ekuvernu ya wirimu, Yesu Kristu ti Mwene aya, eriyari ya apinaatamu annikuxiwa atthu oophiyeryaka 144.000 wira yalamuleleke n’uwo.—Wisupulula 14:1, 4.
▪ Omwene opacenrye olamulela mwaakha wa 1914, nto okhuma vaavo Satana ohoomoliwa wirimu ovonyeriwaka valaponi.—Wisupulula 12:9.
▪ Omwene wa Muluku moohipisa onrowa opwetexa ikuvernu sa apinaatamu, ni elapo enrowa okhala eparayiisu.—Wisupulula 16:14, 16.
[Study Questions]
1. Nivekelo xeeni noovuwa ninrowa othokoreriwa vano?
2. Itthu xeeni tthaaru seiyo Yesu aalakihenry’awe awiixutti awe wira avekeleke?
3. Exeeni nintthuneya ahu osuwela voohimya sa Omwene wa Muluku?
4. Omwene wa Muluku exeeni, ni tanii okhanle Mwene aya?
5. Omwene wa Muluku onrowa olamulelaka ori ene woowi, ni onrowa waalamulelaka aani?
6, 7. Exeeni enimwiiriha Yesu okhala Mwene oohilikana ni mukina?
8. Tanii anrowa olamulelaka ni Yesu?
9. Arii atthu akavii anrowa olamulela ni Yesu, nto Muluku opacenrye silini waathanla?
10. Nthowa xeeni olamuleliwa wa apinaatamu ni Yesu vamosaa ni a 144.000 ory’aya murehereryo woophenta?
11. Yesu aahimmye wira awiixutti awe yaahaana ovekelaka exeeni voohimya sa yotthuna ya Muluku?
12. Soowiiraneya xeeni piili sootthuneya sihimmwale mu Wisupulula 12:10?
13. Tiivi ekhanle yookhumelela ya woomoliwa wa Satana wirimu?
14. Exeeni eniiraneya mwaha wa Satana oriheliwa valaponi?
15. Yotthuna ya Muluku wa elapo ya vathii tiivi?
16, 17. Daniyeli 2:44 onnileela exeeni voohimya sa Omwene wa Muluku?
18. Eniihaniwa sai, ekhotto yookiserya ya Omwene wa Muluku ni ikuvernu sa elapo ela?
19, 20. Exeeni enikhoottiherya wira yotthuna ya Muluku yiiriweke valaponi olelo?
21. Moota xeeni Omwene wa Muluku onrowa aya wiiriha yotthuna ya Muluku wiiraneya valaponi?
22. Ninsuwela sai wira Omwene wa Muluku khiwaarwiiye vaavo Yesu aari awe valaponi aahiiso okathi ene yoole nuumala ohihimuxiwa?
23. (a) Omwene wa Muluku opacenrye silini olamulela? (b) Exeeni enrowa othokoreriwa mmuruu onittharelana?
[Pictures on page 83]
Woomoliwa wa Satana ni axetwani awe wirimu wooruuha otakhaliwa valaponi. Mixankiho iyo sinrowa omala moohipisa
[Picture on page 84, 85]
Mu olamulelo wa Omwene, yotthuna ya Muluku enrowa wiiriwaka valaponi ntoko siniiriwa aya wirimu