Okathi wa Mutaaseke Muulupale, Aakhala Yaawiriyanne Wala Yahaawiriyanne?

Anamunceene okathi wa Nowe yaapaka itthu sootakhala. Maphattuwelo 6:5

Adamu ni Eva yaahaayara anamwane, nto atthu khusareya mulaponi.  Moovira wa okathi, malaikha makina yaahimutthara Satana khomurukunuwela Muluku.

Malaikha awo yaahirwa elapo ya vathi, khiwara irutthu sa opinaatamu wira yaathele axithiyana. Athiyana ale yaahaayara anamwane oorakamexa, oowali ni aikuru.

Olumwenku waahisareya atthu yaapaka itthu sotakhala. Biibiliya onihimya so: “Apwiya yahona wira vathí-va atthu yanvira etepaka otakhala murima: mùpuwelo aya wothene n’otthuna waya wari opaka sonanara mahiku othene”.

Nowe aahinwiriyana Muluku khiteka ekalawa. Maphattuwelo 6:13, 14, 18, 19, 22

Nowe aari mutthu ooloka. Yehova aahimuhimeerya Nowe wira aarowa waapwetexa atakhali orumeelaka epula ya mutaaseke.

Muluku aahimuruma Nowe wira omuteke pakiti muulupale yoowo iihaniwa ekalawa ni wira aahele memmo amusi awe ni khula muthinto wa inama.

Nowe aahaalopola atthu voohimya sa orwa wa mutaaseke, masi khuuvo aamwiiwelenle. Atthu akina yaammutheya, akina yaammunyokha.

Vaavo Nowe aamalinhe awe oteka ekalawa aahihela inama mukalawani.