Etthoko Anyu Enrowa Ophwanya Sai Ohakalala?

1. Othelana wa nlamulo onihakalaliha sai etthoko?

Ihapari sooreera, sinikhuma wa Yehova Muluku oohakalala. Nto owo oniphavela wira itthoko sihakalaleke. (1 Timótheyo 1:11) Owo tokumihenrye othelana wa nlamulo. Othelana ottharihelaka nlamulo ti woohakalaliha, okhala wira onnikumiherya ororomelana wira anamwane yinnuweke saana. MaKristau ahaana wiiwelela malamulo a elapo enikhala aya, nto khiyalepiha othela waya.​—Mmusome Luka 2:1, 4, 5.

Muluku onoonela sai othelana? Owo oniphavela wira atthu athelanne ahimwalaneke. Yehova oniphavela wira ale athelanne ahiraruwelaneke. (aHéberi 13:4) Owo onninyokha omwalana. (Malakhiya 2:16) Masi owo onneemya wira maKristau amwalaneke ni othela vasya akhala wira aakhumelela mararuwo.​—Mmusome Matheyo 19:3-6, 9.

2. Mulopwana ni amwaarawe ekhalihaneke sai?

Yehova aahimpattuxa mulopwana ni muthiyana wira ekhaliheryaneke. (Maphattuwelo 2:18) Ntoko muhooleli, mulopwana ohaana ovahaka etthoko awe, itthu sa werutthuni ni wiixuttiha iphiro sa Muluku. Owo ohaana wiimananiha omphenta vanceene mwaarawe. Atthu athelanne ahaana ophentanaka ni ottittimihana. Okhala wira mulopwana ni muthiyana annivonya, wala ottheka, olevelelana teri etthu eniphwanyiha ohakalala vatthokoni.​—Mmusome aÉfeso 4:31, 32; 5:22-25, 33; 1 Pedru 3:7.

3. Niireke ti vooloka omwalana mwaha woohiiwanana paahi?

Akhala wira khamuniiwanana ni ole othelanne anyu, otheene sanyu muhaana waavya moota wookhapelelana mwa niphento. (1 aKorinto 13:4, 5) Biibiliya khonitumererya ovalaana okhala enamuna ya ophuka mixankiho sa vatthokoni.​—Mmusome 1 aKorinto 7:10-13.

4. Muluku oniphavela wira anamwane ekhaleke sai?

Yehova oniphavela wira nyuwo muhakalaleke. Owo onnoovahani malakiheryo ootepexa oreera sa moota woweettiha saana omiravo anyu. Yehova oniphavela wira muttottele mureerelo miruku ni osuwela wa anamuyari anyu. (aKolosi 3:20) Yehova oniphavela-tho wira mooneke oreera vaavo vanimwiiwelela anyu Mpattuxa vamosa ni Mwanawe.​—Mmusome Musuweli 11:9–12:1; Matheyo 19:13-15; 21:15, 16.

5. Exeeni enitthuneya wa anamuyari wi anaaya ehakalale?

Nyuwo muhaana ovaraka muteko wira mwaavaheke aniinyu yoolya, opuro wookhala, ni ikuwo. (1 Timótheyo 5:8) Masi wira aniinyu ephwanye ohakalala, nyuwo muhaana owiixuttiha omphenta Muluku ni weettela sooruma sawe. (aÉfeso 6:4) Nto omphenta wanyu Muluku onoovaha ntakiheryo nootepa oloka wa aniinyu. Weettela Nuulumo na Muluku, onoowiiriha aniinyu ophavelaka wiiwelela malakiheryo anyu.​—Mmusome Otumererya 6:4-7; Miruku 22:6.

Anamwane animwiixutta saana akhala wira munnaatumererya otthokiherya etthu eniixutta aya. Ahaana-tho olakiheriwa ni olakiwa. Waalakiherya mmoota owo onoowiiriha okhootta opaka itthu soohiloka. (Miruku 22:15) Masi yoolaka ehikhaleke yoohaaxa wala yootakhala.​—Mmusome aKolosi 3:21.

Anamoona a Yehova annikumiherya iliivuru sinaakhaliherya vanceenexa anamwane ni anamuyari. Miruku iyo, sinikhuma mBiibiliya.​—Musome Esalimo 19:8, 12.