Munrowa Owerya Sai Omwaattamela Muluku?

1. Niireke Muluku onnaakhula mavekelo a atthu otheene?

Muluku onnaalattula atthu a makhalelo otheene wira amulompeke ni wataana ni yena. (Esalimo 65:3) Masi khahiyo wira Muluku onniiwa wala waakhula khuta nivekelo. Mwa ntakiheryo, olompa wa mulopwana onaahaaxa amwaarawe pooti ohaakhuliwa. (1 Pedru 3:7) Okathi anaIsarayeli yaathipelela aya ovara itthu sa itampi, Muluku aahikhootta-tho wiiwa olompa waya. Tthiri, olompa eparakha yuulupale. Masi Muluku onnaakhula mavekelo hata a mutthu ootepexa ottheka akhala wira mutthu owo oottharuwa.​—Mmusome Yesaya 1:15; 55:7.

Nwehe eviidiyu Niireke Muluku Onniwiriyana Mavekelo Otheene?

2. Nto nilompeke sai?

Olompa onniirela mpantta wa okokhorela wahu, tivonto nihaana olompaka paahi wa Mpattuxa ahu, Yehova. (Matheyo 4:10; 6:9) Ohiya vo, okhala wira hiyo na atthu oohimalela, nihaana olompaka mwa nsina na Yesu okhala wira owo aahikhwa mwaha wa soottheka sahu. (Yohani 14:6) Yehova khoniphavela wira hiyo nimakeleke ohimya etthu emosaru paahi, wala osoma muliivuruni ya malompelo. Muluku oniphavela wira nihimyeke etthu eri vamurimani vahu.​—Mmusome Matheyo 6:7; aFilipi 4:6, 7.

Ole onipattunxe onniwerya wiiwa hata mavekelo anipaka ahu ni murima paahi. (1 Samuweli 1:12, 13) Owo onninlattula wira nimulompeke khuta okathi, navenyaka, narowaka orupa wala okathi wa yoolya ni okathi wa mixankiho.​—Musome Esalimo 55:23; Matheyo 15:36.

3. Xeeni makristau anithukumana aya?

Khivanikhweya omwaattamela Muluku, mwaha wookhalaka eriyari ya atthu ahinimwaamini Muluku ni aninyohola yooleiherya awe ya oruuha murettele valaponi. (2 Timótheyo 3:1, 4; 2 Pedru 3:3, 13) Tivonto vanitthuneya ahu othukumana wira nlipihaneke.​—Mmusome aHéberi 10:24, 25.

Othukumana ni atthu animphenta Muluku onninikhaliherya omwaattamela Muluku. Othukumana ni Anamoona a Yehova onooniiriha ottottela mureerelo waamini waya.​—Mmusome aRoma 1:11, 12.

4. Munrowa omwaattamela sai Muluku?

Wira nyuwo mwataane ni Muluku muhaana wuupuwelelaka saana ele yiixuntte anyu mBiibiliyani. Mutthokeleleke saana miteko sawe, miruku sinivaha awe ni sooleiherya sawe. Wuupuwelela saana vamosa ni olompa, onooniiriha wiiwexexa saana ophenta ni ankhili a Muluku.​—Mmusome Yoxuwa 1:8; Esalimo 1:1-3.

Munoowerya omwaattamela Muluku akhala wira munnimuroromela ni omwaamini. Waamini onilikana ni olya. Nto, nyuwo muhaana olyihaka waamini wanyu khuta okathi, muupuwelelaka itthu seiye siniwiirihani omwaamini Muluku.​—Mmusome Matheyo 4:4; aHéberi 11:1, 6.

5. Omwaattamela Muluku onrowa woophwanyihani exeeni?

Yehova onnaathokorerya atthu yaale animphenta. Owo onoowoopola arumeyi awe, khuta etthu yaarowa ohonona waamini ni nlipelelo naya na okumi woohimala. (Esalimo 91:1, 2, 7-10) Yehova onninlopola wira nisyake ephiro enrowa ohonona ekumi ahu vamosa ni ohakalala wahu. Yehova onniniixuttiha moota woophwanya okumi wootepexa oreera.​—Musome Esalimo 73:27, 28; Yakobo 4:4, 8.