Exeeni enuupuwela anyu sa muhoolo?

ELE BIIBILIYA ONIHIMYA AWE

“Muluku . . . onopuputtha maithori aya othene: khunrowa okhala-tho okhwa, nnákhala oripiwa murima, walá ikuttho nnákhala ohawa. Tthiri olumwenku wa khalai wovira”.​—Wisupulula 21:3, 4, Biblia Solempwa Sowarya.

ELE ENITAPHULELA AYA WA NYUWO

Muteko woohakalaliha ni wooloka.​—Yesaya 65:21-23.

Omala wa iretta wala ohaawa wotheene.—Yesaya 25:8; 33:24.

Okumi woohimala ni woohakalaliha, vamosa ni amusi ni apatthani.—Esalimo 37:11, 29.

NNOOWERYA TTHIRI OKUPALI ELE BIIBILIYA ONIHIMYA AWE?

Aayo, mwaha wa mathowa manli:

• Muluku ookhalana owerya wowaamaleliha anatiri awe. Biibiliya onnimuhimya Yehova mekhawe okhala “Òwerya sothene”, mwaha woowi ikuru sawe ti soohimala. (Wisupulula 15:3) Nto owo onoowerya waamaliherya anatiri awe ni olokiherya elapo ahu wira ekhale yooloka. Biibiliya oni: “Muluku khivo enojelawe”.—Matheyo 19:26.

• Muluku onniphavela waamaleliha anatiri awe. Mwa ntakiheryo, Yehova onniphavela vanceene ottikiherya okumi wa atthu akhwiiye.​—Yobi 14:14, 15.

  Nave-tho Biibiliya onnooniherya wira Yesu, Mwaana a Muluku, aahaavoniha aretta. Mwaha wa xeeni? Mwaha woowi owo aaniphavela opaka eyo. (Marko 1:40, 41) Yesu ahooniherya moomalela mikhalelo sa Tiithi awe orweela mwa waakhaliherya ale yaahaawa.​—Yohani 14:9.

  Nto hiyo nnoowerya okupali wira Yehova ni Yesu aniphavela onikhaliherya wira nikhalane okumi woohakalaliha muhoolo!​—Esalimo 72:12-14; 145:16; 2 Pedru 3:9.