Rahabi Aanimwaamini Yehova

Nilikanyihe wira niri epooma ya oYerikho. Epooma eyo eri oKanani, elapo yeeyo atthu ahinimwaamini aya Yehova. Muthiyana mmosa oniitthaniwa Rahabi onikhala epooma yeela.

Oryeene mwali, Rahabi aahiiwa moota Moise aakawannye awe Ephareya Yooxeerya ni aakumiha aIsarayeli elapo ya wEjiitu. Nave, owo aahiiwa moota Yehova aakhalihenrye awe aIsarayeli waaxintta awanani aya. Vano, Rahabi aahiiwa wira aIsarayeli yahaattamela oYerikho!

Nihiku nimosa, makaaripi, aIsarayeli anli yaahirowa oYerikho wira yawehe epooma ele. Awo yaahirowa owannya awe Rahabi. Owo aahaalattula okela mpaani. Masi ohiyu, mwene oYerikho aahiiwa wira alopwana ale anli yaamanke wa Rahabi. Nto, mwene aahaaruma anakhotto awe wira yaavare. Masi, Rahabi ahaavitha alopwana ale vataratoni va enupa awe. Nto ahaahimeerya anakhotto a mwene wira: ‘Awo yaarwiye vate vaka; masi aarowasa. Mwatthimakeleke; munimwaphwanya!’ Niireke munnisuwela mwaha aya Rahabi aavinthe awe alopwana ale?— Owo aanimwaamini Yehova ni aanisuwela wira aIsarayeli yaarowa ovahiwa elapo ele.

Ahinatthi alopwana ale okhuma enupa ya Rahabi, yaahimuleiherya wira owo ni emusi awe yaamoopowa okathi waarowa aya opwetexiwa epooma ele. Nyuwo munnisuwela etthu yaamulenle aya Rahabi wira opake?— Awo yaamulenle so: ‘Mutthukwelele mukhoi ola woxerya vajanelani vanyu. Mwiira siiso, amusi anyu otheene anrowa okhala mpaani-mu animoopowa’. Rahabi aahiwiiwelela. Niireke munnisuwela etthu yaakhumelenle moottharelana?—

Moohipisa, aIsarayeli yaahirukurerya epooma ele. Mwa mahiku 6, awo yaanirukurerya epooma ele ekwaha emosa vanihikuni, masi moohilavula etthu. Masi nihiku na neethanu nenli, awo yaahirukurerya epooma ele ikwaha 7. Vano, yaahikhuwela vanceene. Nto, Yehova aahiiriha ixiri sa epooma ele omora. Masi enupa yaatthukweleliwe mukhoi wooxeerya vajanelani, khiyaamonre! Niireke munniweha enupa eyo valataratoni-va?— Rahabi ni emusi awe yaahoopoliwa!

Exeeni eniixutta anyu sa ntakiheryo na Rahabi?— Owo aahimwaamini Yehova mwaha wa itthu sooreera aixuntte awe. Moolikanasa, nyuwo muhiixutta itthu sinceene voohimya sa Yehova. Niireke nyuwo munnimwaamini Yehova ntoko Rahabi?— Hiyo noosuwela wira nyuwo munnimwaamini!