Ixikola Sa Omwene​—Siniwiixuttiha Arumeyi a Mwene

OTHEYA-THEYA wanyu onnimulipiha munna ori vatribuna onilavula mwaha. Owo mmiravo munna a muloko anyu, onilavula mwaha awe woopacerya mmuthukumano wa asembeleya. Okathi oniwiriyana anyu mwaha awe, nyuwo munnitteeliwa murima woona moota atthu a Muluku aniixuttihiwa aya saana. Woonasa wene nyuwo munnuupuwela mixankiho saarina awe mmiravo owo okathi aalavunle awe mwaha woopacerya mmuloko, masi munnimoona wira vano oorowa vahoolo vanceene! Owo aahirowa vahoolo nuumala oviriha Exikola ya Muteko wa oPioneero. Nave owo ni amwaarawe arwiiye niinaano Exikola ya Anamalaleerya a Omwene. Nto wanikisa wa mwaha okathi onoopa anyu makuphi, munnaaweha atthu yaattamanne ayu khiyuupuwela wira tthiri Muluku onniwiixuttiha atthu awe.

Biibiliya aahihimya vahinatthi wira waamphiya okathi atthu otheene a Muluku anrowa aya “wixuttihiwa” ni mwaneene Muluku. (Yes. 54:13) Nto ninkhala okathi ene yoowo. Wiixuttihiwa wahu khahiyo orweela wa iliivuru paahi masi-tho ni mithukumano sahu sa mmulokoni, asembeleya, muthukumano wa muttetthe, ni ixikola soovirikana seiyo sipakeliwe waalokiherya atthu anivara miteko soovirikana sa nikhuuru na Yehova. Epantte ela, enrowa othokorerya moota ixikola iya sinnooniherya aya wira Omwene wa Muluku onnilamulela tthiri olelo-va.