Mmulompeke Yehova Vatthokoni

Ntoko mwiixuntte anyu mbroxurani-mu, Biibiliya ookhalana malakiheryo man-ceene anrowa wookhaliheryani vamosa ni etthoko anyu. Yehova oniphavela wira mukhaleke oohakalala. Owo onnileiherya wira mwapaceriha omukokhorela yena, itthu “sikina sothene, [owo] onimophwanyihani ni wuncererya”. (Matheyo 6:33) Owo oniphavela wira nyuwo mukhale mpatthani awe. Murumeele khuta eparakha erina anyu wira munnuuherye opatthani anyu ni Muluku. Ela eparakha yuulupalexa mutthu okhanle awe oophwanya.​—Matheyo 22:37, 38.

1 MULIPIHE WATAANA WANYU NI YEHOVA

ELE BIIBILIYA ONIHIMYA AWE: “‘Miyo kinokhaIa atith’inyu, nyuwo munrowa okhala an’aka’. Anihimya t’Apwiya òwerya sothene”. (2 aKorinto 6:18) Muluku oniphavela wira mukhale mpatthani awe. Ovekela, enamuna emosa yoopaka eyo. Yehova onnoolattulani wira “mulompeke vohihiyererya”. (1 aTesalonika 5:17) Owo onniphavela wiiwa miyuupuwelo sanyu ni itthu sinooxankihani. (aFilipi 4:6) Vaavo munivekela anyu ni atthu a etthoko anyu, awo annoona wira Muluku teekeekhai wa nyuwo.

Ohiya-vo, muhaana onwiriyanaka. Nyuwo munoowerya opaka eyo mmusomaka Biibiliya ni iliivuru sinikumihiwa mBiibiliyani. (Esalimo 1:1, 2) Muupuweleleke ele eniixutta anyu. (Esalimo 77:12, 13) Nave, onwiriyana Muluku onitaphulela ohicompela mithukumano sa eKristau.​—Esalimo 122:1-4.

Waalaleerya atthu akina voohimya sa Yehova, enamuna ekina yootthuneya enrowa olipiha wataana wanyu nuuwo. Oluttuweliwa waalaleerya akina, onoowiirihani omwaattamela Muluku vanceene.​—Matheyo 28:19, 20.

ELE EKHANLE ANYU OOPAKA:

• Musukeke okathi khula nihiku wira mmusomeke Biibiliya ni ovekela

• Ntoko etthoko, mpweheke opuro woopacerya miteko sa omunepani ohiya otthekula wala omumula

2 MMULOMPEKE MULUKU VATTHOKONI

ELE BIIBILIYA ONIHIMYA AWE: “Mmwattameleke Muluku: Muluku onowattamelani”. (Yakobo 4:8) Nyuwo muhaana opaka ni otthara eprograma yoohihiyererya ya omulompa Muluku vatthokoni. (Maphattuwelo 18:19) Masi ehaavo-tho etthu ekina. Muhaana omuupuwelelaka Muluku khula nihiku. Mulipihe etthoko anyu wira yaataane ni Muluku mulavulaka sa yena ‘vaavo munikilaathi anyu owannyu walá mwettaka mukwaha, mumpathiki walá nvenyaka’. (Otumererya 6:6, 7) Mmutakiheke Yoxuwa, yoowo aahimyale so: ‘Miyo va ni emusi aka yothene nintthuna omurumelaka Yehova’.​—Yoxuwa 24:15.

ELE EKHANLE ANYU OOPAKA:

• Mukhalaneke eprograma yoohihiyererya ya wiixuttiha yeeyo enihela muhina sootthuneya sa khuta mutthu a vatthokoni