Moota Woowiiriha Muloko Okhala Wowiiraana ni Wooloka

KHULA mwaakha, imilyau sinceene sa atthu annirowa empa ya okokhorela wekeekhai ya Yehova. Eyo ennooniherya wira sinniiraneya iprofesia sa mBiibiliyani. (Mik. 4:1, 2) Nto ninnihakalala vanceene owaakhela atthu awo mmulokoni mwa Muluku! (Mit. 20:28) Atthu awo nave annixukhurela eparakha ya omurumeela Yehova ni hiyo ni wiirela mpantta eparayiisu ahu ya omunepani yeeyo eri ya murettele ni yooloka. Munepa wowaarya wa Muluku ni miruku sinikhuma Nuulumo na Muluku sinninikhaliherya wiiriha muloko okhala wa murettele ni wooloka.—Esal. 119:105; Zak. 4:6b.

² Okathi nneettela ahu malakiheryo a mBiibiliyani, hiyo ninniwara “omutthu wa nanano”. (aKol. 3:10) Nave noohiya onyakulihana mwaha wa itthu soohiloka ni ovirikana wa mikhalelo. Okhala wira nookhalana moonelo wa Yehova, noohiya nthalu nihireere mulaponi, nto ninvara moowiirana ntoko emusi emosaru olumwenku wotheene.—Mit. 10:34, 35.

³ Hata vari siiso, okathi mukina sinnikhumelela mixankiho sikhanle oohonona murettele ni wiiraana mmulokoni. Exeeni eniiriha? Ikwaha sinceene mwaha woowi, khaneetteliwa malakiheryo a mBiibiliyani. Nave nlelo ninniwanana ohimalela, maana otheene ahu na anatampi. (1 Yoh. 1:10) Ohiya-vo, pooti wira mutthu oopaka etthu yoohiloka yaarowa ohonona mweettelo wooloka womunepani wa muloko. Nave pooti omunyoonyiha mutthu mukina ni moolumo ni itthu nipanke ahu nihuupuwenle, wala hiyo pooti okhumuwa mwaha wa etthu mutthu mukina ohimmye awe wala opanke awe. (aRom. 3:23) Nto sinrowa ophukiwa sai mixankiho iyo?

⁴ Moophenta Yehova onnithokorerya itthu iyo. Orumeelaka nuulumo nawe Biibiliya, onninivaha miruku voohimya sa etthu nikhanle ahu oopaka sakhumelela mixankiho. Axitokweene yaawo ari oophenta ni amakampusi oomunepani, anniimananiha omukhaliherya khula mutthu. Weettela malakiheryo a mBiibiliyani, anoonikhaliherya waataana ni atthu akina ni weemereriwa ni Yehova. Nto akhala wira nnoopwapweliwa mwaha wa etthu yoohiloka, nihaana woona wira Tiithi ahu a wiirimu onniniphenta vanceene.—Mir. 3:11, 12; aHéb. 12:6.

MOOTA WOOPHUKA OHIIWANANA

⁵ Okathi mukina onnikhumelela ohiiwanana wala mixankiho saamukhaani ni anna ni arokora mmulokoni. Mixankiho ni ohiiwanana iwo ohaana ophukiwa moophenta ni mowaakuveya. (aÉf. 4:26; aFil. 2:2-4; aKol. 3:12-14) Woonasa wene, munnikupali wira mixankiho sa ohiiwanana ni mutthu mukina a mmulokoni pooti ophukiwa mowaakuveya akhala wira atthu awo animweettela malakiheryo a murummwa Pedru ani: “Mukhaleleke nthiti ophentana, okhala wira ophentana onnikhunela itampi, sinakhalaru sinjene”. (1 Ped. 4:8) Biibiliya onihimya wira: “Othene ahu ninnittheka n’inamuna sinjene”. (Yak. 3:2) Nihaana ovarihela muteko malamulo a okhapelelana saana, niire so, waathokorerya atthu akina ntoko nimphavela ahu othokoreriwa. Nto hiyo pooti omulevelela mutthu owo ni oliyala mwaha owo.—Math. 6:14, 15; 7:12.

⁶ Moona wira mutthu mukina oonyoonyiheya mwaha wa etthu muhimmye anyu wala mpanke anyu, moohipisa muhaana okhaliha murettele. Muhiliyale wira muxankiho pooti ohonona waataana wanyu ni Yehova. Yesu aahaaleela awiixutti awe wira: “Mwarowaka ovelela yovah’anyu waltari, weiwo mùpuwelá wira munn’inyu khakhanle sana ni nyuwo, muhiye yovah’anyu oholo w’altari, murowé toko, mwatàne ni munn’iny’uwo. Vano-nto muhalé murwaka ovelela yovah’anyu”. (Math. 5:23, 24) Okathi mukina pooti mutthu mukina opaka wala olavula etthu enninyoonya. Nto eyo yiiraneya, muhaana olavula ni yena. Vaavo muloko wotheene onilavulihana aya saana, onnisyaka onyakulihana ni omakela ophuka myaha sinikhumelela mwaha wa ohiiwanana onikhumelela mwaha wa makhalelo ahu oohimalela.

OKATHI ONIREERELA AYA WAAVAHA MIRUKU SA MBIIBILIYANI

⁷ Okathi mukina axitokweene annoona oreerela onvaha miruku munna wala murokora wira olokiherye muupuwelo awe. Nto owo muritti muulupale. Murummwa Paulo aahaaleela maKristau a oGalasia wira: “Axinn’aka, mwamphwanya mutthu ìraka etthu yotakhala, nyuwo munettihiwa n’iroho, mmukhaliherye otthikela ephiro yorera, mwiraka n’upixa murima, mwipasopaka wira ni nyuwotho muhikwattuliwe”.—aGal. 6:1.

⁸ Okathi anikhapelela aya ipwittipwitthi sa Muluku, axitokweene annikhapelela muloko momunepani wira ohihapuxiwe ni itthu sootakhala ni sihikhumelele mixankiho suulupale. Nave axitokweene anniimananiha wira muteko aya mmulokoni okhaleke ntoko Yehova aaleihenrye awe omurumeelaka Yesaya, owo aahimmye so: “Khula mmosa a yawo onolikana ni ntthyawelo okathi onòpaya epheyo yorirya, okathi onrupaya epula ya mwanamukhaya: onolikana ni màsi anvira nipuro nowuma ni muttutthi worirya nihiku novihexa”.—Yes. 32:2.

WAASUWELA ALE AHINEETTELA MALAKIHERYO

⁹ Murummwa Paulo aahaalopola atthu akina yaarowa waahapuxaka atthu akina mmulokoni oriki: “Axinn’aka! Kinotumereryani . . . wira muhettaneke axinna anetta vohiloka, ehinatthara ikano siwixuttihalyaka. Akhalá mutthu ohinìwelela ikano sihimyalyaka mpapheloni-mu, mmusuwelihe: mmuhiye akhaleke mekhawe, wira ùliwe muru. Nto muhimwettiherye ntoko nwanan’inyu: munvahe miruku, okhala wira munn’inyu”.—2 aTes. 3:6, 14, 15.

¹⁰ Okathi mukina pooti okhala mmulokoni mutthu ohipanke etampi yuulupale yaarowa omwiiriha okumihiwa mmuloko, masi onnooniherya wira khonittittimiha malamulo a xariya a Muluku. Eyo pooti ohela muhina otepa onyoonyiwa wala olosowa, otepexa ovaanyiha wala onyala. Nave akhala wira mutthu owo onniihela muhina myaha sa atthu akina seiyo sihinimwiira mpantta. (2 aTes. 3:11) Nave-tho akhala wira mutthu owo omusivela owaaproveitari atthu wala akhala wira mutthu omusivela otthekula ni itthu soohiloka. Mweettelo woohiloka pooti ohonona muloko ni waahapuxa anna ni arokora.

¹¹ Wanipacerya axitokweene animwiimananiha omukhaliherya mutthu owo arumeelaka malakiheryo a mBiibiliyani. Nto, akhala wira mutthu owo khoniphavela otthara malakiheryo awo hata okhaliheriwe ene ikwaha sinceene, axitokweene pooti opaka mwaha mmulokoni wira muloko wotheene okhalane ephoole. Axitokweene ahaana ovarerya saana vakhala wira etthu eyo ti yoohiloka vantthuneya aya opaka mwaha mmulokoni. Nto munna onrowa olavula mwaha, onoovaha malakiheryo oovareleya muteko voohimya sa mweettelo woohiloka onooniheriwa mmulokoni, masi hata vari siiso owo khonrowa olavula nsina na mutthu owo ompaka eyo. Nto ale animusuwela mutthu ole onilavuliwa mwaha owo anoosyakaka opatthana ni mutthu owo, nnaamwi avikanihaka okhalana waataana womunepani wira ‘anvahe miruku, okhala wira munn’ihu’.

¹² Akhala wira anna oororomeleya mmulokoni animwiiwelela malakiheryo awo, anoomukhaliherya mutthu owo wuuliwa muru ni olokiherya mweettelo awe woohiloka. Okathi vanooneya aya oratteene wira oohiya mweettelo awe woohiloka, khivanitthuneya-tho omuthokorerya ntoko mutthu aavahiwe malakiheryo wala miruku.

MOOTA WOOPHUKA SOOVONYA SUULUPALE

¹³ Omulevelela mutthu soovonya saamukhaani khonitaphulela wira sinninsivela itthu soohiloka onipaka awe wala mweettelo awe. Musuweleke wira khahiyo wira soovonya sotheene wala itampi sotheene nimpaka mwaha wa ohimalela; nave ti voohiloka ohicalela soovonya suulupale. (Onam. 19:17; Esal. 141:5) Nivarihano na Nlamulo naanihimya itampi sikina okhala suulupale ovikana sikina, nto etthu emosaru enniiraneya mmulokoni mwa eKristau olelo-va.—1 Yoh. 5:16, 17.

¹⁴ Yesu oohimya etthu nikhanle ahu oopaka wira niphuke mixankiho suulupale ni axinnihu. Nkahaya nwehe mavalo ala nikhanle ahu oopaka: “Mukhw’inyu attheká, [1] mwakumane mekhinyu ni yowo pahi, mwamulake. Awiwani, momutthikiherya munn’inyu ephiro yorera. Vano, ahiwìweni, [2] mmuroihele mutthu mukina walá atthu anli, wira ‘mulattu anyu ophukiwe oholo w’anamona anli walá araru’. Ahiwìwe atthu awo, [3] mwahimerye aKristu èkereja [axitokweene a mmulokoni]: ahiwìwelele hatá amusi aKristu, mmwettiheke ntoko mutthu òhamini walá ntoko mulipa-òttheka”.—Math. 18:15-17.

¹⁵ Nuupuwelaka nlikanyiho Yesu aapanke awe moottharelana eliivuru ya Matheyo 18:23-35, vanikhala ntoko wira etampi emosa uupuwela awe eliivuru ya Matheyo 18:15-17 yaavarihana ni musurukhu wala itthu sa werutthuni, ntoko ohiliva etthu aakomphe awe wala onwoka mutthu wira omwiiyerye musurukhu awe. Aahiiso, Yesu aalavula sa wootha wala ohonona mweettelo wooloka wa mutthu mukina.

¹⁶ Akhala wira ookhala mutthu mmulokoni munoona anyu wira ohoopakelani etampi ntoko iye nlavunle ahu, muhaakuveleke orowa waaleela axitokweene wira yookhaliheryeni. Ntoko Yesu aahimmye awe, wanipacerya muhaana orowa olavula ni munninyu owo mekhinyu. Okathi owo mwimaniheke ophuka muxankiho anyu owanli anyu woohimuhela muhina mutthu mukina. Muhiliyale wira Yesu khaahimmye wira ‘mwakumane ekwaha emosa paahi, mmoniherye yottheka awe’. Nto akhala wira mutthu owo khoneemererya yoottheka awe ni khoniphavela woovekelani muswammaha, woonasa wene ti vooloka otthikela olavulana okathi mukina. Akhala wira muxankiho anyu munoophuka mwa enamuna eyo, ole ootthekenleni onooxukhurela akhala wira khimwalenle atthu akina voohimya sa etthu opanke awe, maana eyo yaamuhonona muloko. Mwiira siiso, nyuwo “momutthikiherya munn’inyu ephiro yorera”.

¹⁷ Akhala wira ole onitthekenle onneemererya yoovonya awe, onnivekela muswammaha ni onniphavela olokiherya itthu soohiloka opanke awe, khivanreerela okeleliha ohoolo mwaha owo. Hata eri ene etampi yuulupale, muxankiho owo pooti ophukiwa ni atthu awo oowanli.

¹⁸ Nto pooti wira khamunwerya ophuka mwaha owo “mekhinyu ni yowo pahi”. Akhala wira ti siiso, muhaana opaka ele Yesu aahimmye awe oriki: “Mmuroihele mutthu mukina walá atthu anli” wira mutthikele olavula mwaha owo ni munninyu owo. Atthu awo anoohoolani, ahaana okhalana yoolakela ya omuttikiherya munninyu ephiro yooreera. Vaamuloka akhala wira atthu awo anamoona a etampi opanke awe, aahikhale nnakhala namoona mmosa, nyuwo pooti onvekela munna mmosa wala anli anrowa okhalela onamoona. Woonasa wene, anoosuwela oratteene mwaha owo ni woona akhala wira ele yiiraneyale etampi tthiri. Akhala wira mutokweene onnilattuliwa okhala namoona a mwaha owo, owo khonrowa mwa nsina na muloko, mwaha woowi khothanliwe ni nikhuuru na axitokweene wira athokorerye mwaha owo.

¹⁹ Akhala wira khivaniweryaneya ophukiwa mwaha owo hata yiimananinhe ene ikwaha sinceene, nnakhala okathi mwaavaanela anyu ni mutthu owo wala okathi mwaamulattunle anyu munna mmosa wala anli ni nyuwo munoona wira khamunwerya olevelela ni oliyala etthu mpakeliwe anyu, pooti waaleela axitokweene. Musuweleke wira yoolakela ya axitokweene wiiriha muloko okhala wa murettele ni wooloka. Nuumala waaleela axitokweene, mwaahiyeryeke axitokweene awo mwaha owo ni mmuroromeleke Yehova. Muhikhala-khale mweemereryaka mweettelo woohiloka wa mutthu mukina owiirihakani okhumuwa wala ohiya omurumeela Yehova moohakalala.—Esal. 119:165.

²⁰ Amakampusi a ipwittipwitthi sa Muluku anoothokorerya mwaha owo. Woonasa wene, awo animoona wira mutthu owo ohootthekelani vanceene, khoniphavela ottharuwa ni khoniphavela olokiherya etthu yoohiloka opanke awe. Akhala wira ti siiso, pooti wira ekomisau ya axitokweene anoomoomola mmulokoni mutthu owo. Opaka eyo animwaakhapelela anna akina ni wiiriha muloko okhala wooloka ni wa murettele.—Math. 18:17.

MOOTA WOOPHUKA ITAMPI SUULUPALE

²¹ Itampi sikina suulupale ntoko orupihana woohiloka, oraruwa, orupihana athiyanaru wala alopwanaru, oveeha, omwareya, waakokhorela amuluku eethiru, okhwiri ni itampi sikina suulupale, khasiniphiyerya oleveleliwa ni mutthu ole otthekeliwe paahi. (1 aKor. 6:9, 10; aGal. 5:19-21) Maana itampi iyo suulupale pooti ohonona mukhalelo wooloka wa omunepani wa muloko, nto ahaana oleeliwa axitokweene wira athokorerye itampi iyo. (1 aKor. 5:6; Yak. 5:14, 15) Moohicikha enamuna axitokweene asuwenle aya moota munna wala murokora opanke awe etampi iyo yuulupale, wanipacerya axitokweene ahaana otokosa oratteene mwaha owo. Akhala wira sookhala itthu sinceene sinooniherya wira etampi eyo yuulupale yoopakiwa, nikhuuru na axitokweene nihaana opaka ekomisau ya ophukela ya axitokweene araru wira aphuke mwaha owo.

²² Axitokweene annikhapelela oratteene ipwittipwitthi sa Muluku, nto anniimananiha wira sihihononiwe momunepani. Nave annimananiha orumeela saana Nuulumo na Muluku wira yaapwapwele ale anipaka itthu soohiloka ni waakhaliherya okhalana okumi wooloka wa omunepani. (Yuda 21-23) Eyo ennivarihana ni malakiheryo murummwa Paulo anvanhe awe Timootheyo oriki: “Miyo kinotumereryani vanjene vamaithoni va Muluku n’uholo wa Yesu Kristu, yowo ontthuna walamula atthu akumi n’ale akhwiye: . . . mwapwapweleke, mwalopoleke, mwalipiheryeke, mutepaka owixuttiha”. (2 Tim. 4:1, 2) Ekeekhai wira pooti oviriha okathi wira axitokweene apake eyo, masi muhiliyale wira eniirela mpantta muteko wa axitokweene. Muloko onnixukhurela vanceene wiimananiha wanyu, ni onnoona wira munniphwanela “ottittimihiwa valupale”.—1 Tim. 5:17.

²³ Akhala wira vannooneya wira mutthu owo oopaka etampi eyo yuulupale, yoolakela ya axitokweene omukhaliherya natampi owo otthikela okhalana okumi wooloka wa omunepani. Nto Akhala wira oottharuwa ni murima wotheene ni axitokweene aawerya omukhaliherya, awo pooti ompwapwela (hata ori ene mekhawe, ori ene ni anamoona akina okathi wa ekomisau ya ophukela) nto opwapweliwa iwo onoomukhaliherya natampi owo ni atthu akina. (2 Sam. 12:13; 1 Tim. 5:20) Okathi wotheene onipwapweliwa awe mutthu okathi wa ekomisau ya ophukela, ohaana ovahiwa irestrisau. Nto eyo enoomukhaliherya ‘wokolola iphiro sinvira awe’. (aHéb. 12:13) Okathi wooreerela irestrisau sinrowa okumihiwaka akhala wira vannooneya wira onnikhala saana momunepani.

SOOHIMMWA SA OPWAPWELIWA

²⁴ Akhala wira ekomisau ya ophukela ehoona wira mutthu owo oottharuwa ni murima wotheene, masi woonasa wene etthu opanke awe enoosuweliwa mmulokoni wala mmuttettheni, aahiiso muloko ohaana okhalana ephoole ni mutthu owo, ohaana olaleiwa mmulokoni okathi wa soohimmwa Muthukumano Okumi ni Orummwa Ahu wa Ekristau. Yoohimmwa eyo ehaana opakiwa so: “Munna wala murokora (nsina nawe) oopwapweliwa”.

AKHALA WIRA YOOTHANLA TI YA OKUMIHIWA MMULOKONI

²⁵ Okathi mukina, pooti wira mutthu owo aahilimalela opaka etampi eyo vahinaweryaneya omukhaliherya wira otthikele ottuli. Nave pooti wira natampi owo khonooniherya ‘miteko sinòniherya orukunuxa wawe murima’, niire so, ottharuwa okathi enipakiwa aya ekomisau ya ophukela. (Mit. 26:20) Nto ehaana opakiwa exeeni? Mutthu owo aahittharuwe ni murima wotheene ohaana okumihiwa mmulokoni, eyo enooniherya wira ohaana ohiihiwa waataana ni atthu oowaarya a Yehova. Mukhalelo woohiloka wa natampi owo onnikumihiwa mmulokoni wira muloko okhale wooloka momunepani ni okhapelela nsina nooloka na muloko. (Otum. 21:20, 21; 22:23, 24) Nuumala osuwela mweettelo woowuuliha muru wa mutthu mmosa a muloko wa oKorinto, murummwa Paulo aahaatumererya axitokweene oriki: “Mmunnyererye mulopwan’owo Satana, . . . siso eroho awe [ya muloko] yòpowe”. (1 aKor. 5:5, 11-13) Nave Paulo onnaahimya atthu akina a eseekulu yoopacerya yahaaphavela wiiwelela ekeekhai akumihiwa mmulokoni.—1 Tim. 1:20.

²⁶ Okathi ekomisau ya ophukela enoona aya wira natampi ohinittharuwa ni murima wotheene ohaana okumihiwa mmulokoni, mutthu owo ohaana oleeliwa otthokiheriwaka nthowa wala mathowa a mBiibiliyani animwiiriha okumihiwa mmulokoni. Okathi animuleela aya, axitokweene aniirela mpantta ekomisau eyo anoomuleela wira oonaka wira khophukeliwe saana wala yookhala etthu axitokweene avonnye aya okathi yamphukela aya, ohaana olepa epaphelo ohimyaka oratteene mathowa ene. Okhuma nihiku onleeliwa awe, owo ookhalana eparakha ya mahiku 7 olepela ewarakha eyo ekomisau yamphukela. Akhala wira oolepa epaphelo ovekelaka otthikela othokoreriwa mwaha awe, nikhuuru na axitokweene nihaana omulikarela mutokweene a esirkwiitu, owo onimwaathanla axitokweene akina wira apake ekomisau ekina wira otthikele ophukeliwa. Awo anoomananiha otthikela omphukela mutthu owo esumana yeeyo, nuumala waakhela epaphelo ya mutthu owo. Akhala wira mutthu owo oolepa wira otthikele ophukeliwa, ohilaleiwe wira ookumihiwa mmulokoni. Okathi owo, natampi owo pooti orowa muteko woolaleerya, masi khonrowa okomentariki mmithukumanoni, opaka nivekelo wala okhalana eparakha ekina anivahiwa aya atthu arina mweettelo wooloka.

²⁷ Otthikela ophukeliwa mutthu owo onooniherya oreereliwa murima, ni onnikhalana eparakha ya otthikela owiriyaniwa. Masi akhala wira khonirwa okathi wa otthikela ophukeliwa, ohaana ohimmwa wira ookumihiwa mmulokoni nuumala axitokweene omananiha wira athukumane ni mutthu owo.

²⁸ Akhala wira mutthu owo khoniphavela otthikela ophukeliwa, ekomisau ya ophukela enoomuleela otthuneya waya ottharuwa ni itthu okhanle awe oopaka wira ottikiheriwe mmulokoni muhoolo. Nave ti vooloka omureerela murima ni ahaana opaka eyo alipelelaka wira mutthu owo orukunuxe mweettelo awe ni ophwanelele ottikiheriwa mmutthenkesoni mwa Yehova.—2 aKor. 2:6, 7.

SOOHIMWA SA OKUMIHIWA MMULOKONI

²⁹ Nuumala okumihiwa mutthu ohiniphavela ottharuwa ni murima wotheene, ehaana opakiwa yoohimmwa, eyo ehaana opakiwa so: “[Nsina nawe] khahiyo Namoona a Yehova”. Yoohimmwa eyo enimwaakhaliherya anna ni arokora oororomeleya ohiya waataana ni mutthu owo.—1 aKor. 5:11.

WIIKUMIHA MMULOKONI

³⁰ Moolumo oowi “wiikumiha mmulokoni” onihimmwa mutthu ole oopatisiwa othanlale mmensawe ohiirela-tho mpantta muloko wa eKristau. Owo pooti opaka eyo ohimyaka wira khoniphavela-tho okhala Namoona a Yehova wala miteko sawe sinnooniherya eyo, mwa ntakiheryo, akhala wira oniirela mpantta mutthenkeso ohineemereriwa ni Yehova Muluku wala ori mutthenkeso onipaka itthu sihinivarihana ni sowiixuttiha sa Biibiliya.—Yes. 2:4; Wis. 19:17-21.

³¹ Aahimyaka atthu ale yaahiyale waamini waya okathi awe, murummwa Yohani aalempe so: “Awo yakhumme munlokoni mwahu, nto khiyahiyó awihu. Yàri awihu, yatthuna okhalaka ni hiyo”.—1 Yoh. 2:19.

³² Vaavo mutthu oniikumiha awe mmulokoni, mukhalelo awe wa omunepani onnivirikana ni muKristau ohiyale orowela mithukumano ni muteko woolaleerya mwaha wookhulumuwa. Mutthu pooti ohiya ovara miteko iyo mwaha woohiya omusoma Biibiliya khula nihiku. Pooti wira orina mixankiho sawe aahiiso onoolupatthiwa wala khonsiveliwa omurumeela Yehova. Axitokweene ni anna akina mmulokoni, anoovikaniha omukhaliherya mwa omunepani munna wala murokora owo ohiyale olaleerya ni orowela mithukumano.—aRom. 15:1; 1 aTes. 5:14; aHéb. 12:12.

³³ Akhala wira muKristau onniikumiha mmulokoni, muloko onnileeliwa vaavo enipakiwa aya yoohimmwa eni: “[Nsina nawe] khahiyo Namoona a Yehova”. Mutthu owo ohaana othokoreriwa mwa enamuna emosaru onithokoreriwa awe mutthu ookumihiwa mmulokoni.

OTTIKIHERIWA MMULOKONI

³⁴ Mutthu okumihiwe mmulokoni wala iikuminhe mmulokoni pooti ottikiheriwa mmulokoni akhala wira onnooniherya wira oottharuwa ni murima wotheene. Owo ohaana wooniherya eyo, ovirihaka okathi ooniheryaka wira oottharuwa mweettelo awe woohiloka ni ookhalana waataana wooloka ni Yehova. Axitokweene ahaana ohiya oviraka okathi wooreerela, myeeri sinceene, mwaakha ntero wala ovikana moovarihana ni mikhalelo wira mutthu ooniherye wira oottharuwa ni murima wotheene. Okathi nikhuuru na axitokweene nnaakhela aya epaphelo mutthu owo ovekelaka ottikiheriwa mmulokoni, awo ahaana olavula ni mutthu owo. Nave ehaana opakiwa ekomisau enrowa othokorerya mwaha owo. Ekomisau eyo ehaana woona akhala wira mutthu owo ookhalana ‘miteko sinòniherya orukunuxa wawe murima’ ni enimoona akhala wira mutthu owo pooti ottikiheriwa mmulokoni wala nnaari.—Mit. 26:20.

³⁵ Akhala wira mutthu owo onivekala ottikiheriwa mmulokoni aakumihiwe muloko mukina, ekomisau ya omuttikiherya mmulokoni ya muloko onithukumana awe vano ehaana othukumana ni mutthu owo wira ethokorerye mwaha awe. Akhala wira axitokweene a ekomisau eyo annoona wira mutthu owo pooti ottikiheriwa mmulokoni, awo anoolepela ewarakha nikhuuru na axitokweene na muloko aakumihiwe awe mmulokoni. Ikomisau soopiili sinivara vamosa wira yoone akhala wira sookhala itthu sotheene wira apake yoothanla ya xariya. Masi yoothanla ya omuttikiherya mmulokoni ehaana okhala ya ekomisau yaamukuminhe mmulokoni.

SOOHIMMWA SA OTTIKIHERIWA MMULOKONI

³⁶ Akhala wira ekomisau ya omuttikiherya mmulokoni enoona wira mutthu aakumihiwe mmulokoni wala aikuminhe mmulokoni oottharuwa ni murima wotheene ni anoona wira ohaana ottikiheriwa, ohaana ohimmwa wira oottikiheriwa mmulokoni muloko aakumihiwe awe. Akhala wira oothaamela muloko mukina, nave muloko owo ohaana ohimmwa wira oottikiheriwa mmulokoni. Yoohimmwa eyo ehaana opakiwa so: “[Nsina nawe] oottikiheriwa mmulokoni vano Namoona a Yehova”.

ITAMPI SA ANAMWANE OOPATISIWA

³⁷ Itampi suulupale sinipakiwa ni anamwane oopatisiwa ahaana oleeliwa axitokweene. Okathi axitokweene anithokorerya aya myaha sinaahela muhina anamwane ti vooloka anamuyari aya okhala vaavo. Anamuyari awo ahaana ovarihana ni ekomisau eniphuka mwaha owo, ahiimananiheke okhuneela etampi ya anaaya wira ahipwapweliwe. Mwa enamuna emosaru anithokorerya aya myaha sa mutthu muulupale, ekomisau ya ophukela ehaana wiimananiha ompwapwela ni omukhaliherya natampi owo. Akhala wira mwaana owo wala mmiravo owo khonittharuwa ohaana okumihiwa mmulokoni.

ITAMPI SA ANAMALALEERYA OOHIPATISIWA

³⁸ Ehaana opakiwa exeeni akhala wira anamalaleerya oohipatisiwa annipaka etampi yuulupale? Okhala wira khapatisiwe, awo khanikumihiwa mmulokoni. Masi mooreerela murima ahaana ovahiwa miruku sa mBiibiliyani sinrowa waakhaliherya ‘wokolola iphiro sinviraya’, maana pooti wira khanisuwela oratteene malamulo a mBiibiliyani.—aHéb. 12:13.

³⁹ Akhala wira natampi oohipatisiwa khonittharuwa okathi axitokweene anli aniimananiha aya omukhaliherya okathi anithukumana aya, ti vooloka ohimya mmulokoni. Yoohimmwa eyo ehaana opakiwa so: “[Nsina nawe] khahiyo-tho namalaleerya oohipatisiwa”. Anna ni arokora anrowa omuthokoreryaka ntoko mutthu a mulaponi. Nnaamwi ohikumihiwe mmulokoni, anna ni arokora ahaana okhalana ephoole waataana ni mutthu owo. (1 aKor. 15:33) Erelatoorio awe mutthu owo kheniphaveliwa.

⁴⁰ Nuuvira okathi, mutthu oohipatisiwa aahiihiwe okhala namalaleerya mwaha woopaka etampi yuulupale, pooti wira onniphavela otthikela okhala namalaleerya oohipatisiwa. Akhala wira ti siiso, axitokweene anli anoothukumana ni mutthu owo wira awehe akhala wira onnikela vahoolo momunepani. Akhala wira onniphwanelela otthikela okhala namalaleerya oohipatisiwa, ohaana ohimmwa mmulokoni. Yoohimmwa eyo ehaana opakiwa so: “[Nsina nawe] oottikiheriwa okhala namalaleerya oohipatisiwa”.

YEHOVA ONNIREELIHA OKOKHORELA WA MURETTELE NI WOOLOKA

⁴¹ Atthu otheene anithukumana mmulokoni mwa Muluku olelo-va, annihakalala mwaha wa mukhalelo wooloka Yehova onaavaha awe atthu awe. Yoolya ahu ya omunepani khereere, maana nookhalana maasi eekeekhai. Nave Yehova onninikhapelela aarumeelaka axitokweene, yaawo anihooleliwa ni Kristu. (Esal. 23; Yes. 32:1, 2) Mahiku ala ookiserya, hiyo ninkhala eparayiisu ya omunepani, yeeyo ennivaha ovareleleya.

⁴² Vaavo muloko onvikaniha aya okhalana murettele ni okhala wooloka, ninnihiya muthuko wa Omwene waaryaka. (Math. 5:16; Yak. 3:18) Nireelihiwaka ni Yehova, ninnihakalala waaweha atthu anceene amusuwelaka ni akhalaka ni hiyo wira nipakeke yootthuna awe.