Kihaana Wiivahererya wa Muluku Wira Kibatiziwe?

1. Waaniheryasa, exeeni eniikoha anyu nuumala wiixutta eliivuru ela?

ELIIVURU ela ehookhaliheryani wiixutta ikeekhai sinceene sa Biibiliya, ntoko nlipelelo na okumi woohimala, mukhalelo wa alipa-ookhwa, ni nlipelelo na ohihimuxiwa wa alipa-ookhwa. (Musuweli 9:5; Luka 23:43; Yohani 5:28, 29; Wisupulula 21:3, 4) Waaniheryasa moopacerya orowa omithukumanoni sa Anamoona a Yehova ni munnikupali wira awo aneettela okokhorela wekeekhai. (Yohani 13:35) Nave pooti wira moopacerya olipiha wataana wanyu ni Yehova, ni moothanla wiivahererya wira mmurumeeleke. Woonasa wene munniikoha wira: ‘Kipake exeeni wira kimukokhoreleke Muluku?’

2. Exeeni yaamwiirinhe ophavela obatiziwa mulopwana a wEthiyopia?

² Okathi wa Yesu, mulopwana mmosa a wEthiyopia ahiikoha siiso. Nuumala Yesu ohihimuxiwa, naxikola iihaniwa Filipi aahimulaleerya mulopwana ole. Filipi aahimutthokiherya wira Yesu aari Mesiya. Mulopwana ole a wEthiyopia aahisiveliwa vanceene ni ele yiixuntte awe, nto moohipisa khuhimya wira: “Màsi t’ala: enkikhottiha obatiziwa exeni?”​—Miteko 8:26-36.

3. (a) Yooruma xeeni Yesu aavanhe awe atthareli awe? (b) Xeeni mutthu vanitthuneya awe obatiziwa?

³ Biibiliya onniixuttiha oratteene wira akhala wira muniphavela omurumeela Yehova, muhaana obatiziwa. Olavulaka ni atthareli awe, Yesu aahimmye so: “Mwawixuttiheke atthu a maloko othene, mwabatizaka”. (Matheyo 28:19) Nave-tho, Yesu oovaha ntakiheryo nooloka, maana aahibatiziwa. Yesu khaakattheliwe maasi vamuru, aaroopwinihiwa moomalela mmaasini. (Matheyo 3:16) Vaavo muKristau vanibatiziwa awe olelo-va, ohaana oxuweiwa moomalela, aahiiso opwinihiwa mmaasini.

4. Obatizo anyu oniwooniherya exeeni atthu akina?

⁴ Okathi onibatiziwa anyu, munniwooniherya atthu akina wira muniphavela tthiri okhala mpatthani a Muluku ni omurumeela. (Esalimo 40:7, 8) Nyuwo pooti wiikoha so: ‘Kipake exeeni wira kibatiziwe?’

OSUWELA NI WAAMINI

5. (a) Muhaana opaka exeeni muhinatthi obatiziwa? (b) Xeeni mithukumano sa eKristau siryaaya sootthuneya?

⁵ Muhinatthi obatiziwa, muhaana omusuwela Yehova ni Yesu. Tthiri moopacerya opaka ela maana munnimusoma Biibiliya. (Mmusome Yohani 17:3.) Masi eyo khiniphiyerya maana Biibiliya onihimya wira muhaana okhalana ‘osuwela womalela’ voohimya sa Yehova ni yoolakela awe. (aKolosi 1:9) Mithukumano sa Anamoona a Yehova sinimookhaliheryani wataana saana ni Yehova. Nno nthowa nuulupale ninwiirihani ohicompela mithukumano iyo.​—aHéberi 10:24, 25.

6. Niireke muhaana osuwela itthu sotheene siri mBiibiliyani wira mbatiziwe?

⁶ Yehova khonwehererya wira musuwele itthu sotheene siri mBiibiliyani wira mbatiziwe. Nave khahiyo wira mulopwana ole a wEthiyopia aahisuwela itthu sotheene ohinatthi obatiziwa. (Miteko 8:30, 31) Maana otheene ahu ninrowa ovikanihaka wiixutta voohimya sa Muluku. (Musuweli 3:11) Masi wira mbatiziwe muhaana osuwela ni weemererya sowiixuttiha soopacerya sa Biibiliya.​—aHéberi 5:12.

7. Omusoma Biibiliya wookhalihenryeni opaka exeeni?

⁷ Biibiliya onihimya so: “Khavo mutthu onwerya omusiveliha Muluku, ahaminiki”. (aHéberi 11:6) Nto, muhaana wooniherya waamini muhinatthi obatiziwa. Biibiliya onihimya wira nuumala atthu akina a muttetthe wa oKorinto wiiwa sowiixuttiha sa atthareli a Yesu, awo “yahamini, khubatiziwa”. (Miteko 18:8) Nave, yoosoma anyu ya Biibiliya yowiirihani owaamini anatiri a Muluku ni woona moota mukuttho wa Yesu oniwerya aya onoopola itampi ni okhwa.​—Yoxuwa 23:14; Miteko 4:12; 2 Timótheyo 3:16, 17.

WAALEELA AKINA IKEEKHAI SIRI MBIIBILIYANI

8. Exeeni enrowa owiirihani waaleela akina ele yiixuntta anyu?

⁸ Vaavo vanivikaniha anyu omusoma Biibiliya ni woona wira Biibiliya onnookhaliheryani, nto waamini wanyu onoolipa. Munrowa ophavelaka waaleela akina ele eniixutta anyu. (Yeremiya 20:9; 2 aKorinto 4:13) Nto tani anrowa anyu waalaleeryaka?

9, 10. (a) Tani anrowa anyu waaleelaka ele eniixutta anyu? (b) Munrowa opaka exeeni mwaphavela olaleerya vamosa ni muloko?

⁹ Waaniheryasa munrowa ophavelaka waaleela amusi inyu, apatthani, anamwaattamanani inyu aahiiso ale anivara nanyu muteko. Eyo etthu yooloka, nto okathi wotheene mwaaleeleke mowaareerela murima. Muhoolo, nyuwo pooti opacerya olaleerya vamosa ni muloko. Nto waphiya okathi owo, mmuleele Namoona onoosomihani Biibiliya, wira muniphavela opacerya olaleerya ni muloko. Vano akhala wira owo onoona wira moolikana ni munneettela malamulo a Biibiliya, nyuwo ni ole onoosomihani Biibiliya, munrowa othukumana ni axitokweene anli a mmulokoni.

¹⁰ Exeeni enrowa opakiwa muthukumano owo? Axitokweene anrowa olavula ni nyuwo, wira yoone akhala wira munniiwexexa ni okupali sowiixuttiha soopacerya sa Biibiliya, nave munneettela malamulo a Biibiliya ni akhala wira munniphavela tthiri okhala Namoona a Yehova. Muupuweleke wira axitokweene tanaakhapelela anna otheene a mmulokoni, ohela muhina nyuwo, nto muhoove olavulana. (Miteko 20:28; 1 Pedru 5:2, 3) Nuumala muthukumano owo, axitokweene animooleelani akhala wira nyuwo pooti opacerya olaleerya ni muloko.

11. Xeeni vanireerela aya opaka marukunuxo muhinatthi opacerya olaleerya ni muloko?

¹¹ Axitokweene pooti woohimeeryani marukunuxo anitthuneya anyu opaka muhinatthi opacerya olaleerya ni muloko. Xeeni varyaaya vootthuneya opaka marukunuxo awo? Mwaha woowi vaavo vanaalaleerya ahu atthu voohimya sa Muluku, ninkhala nipuro na Yehova, nto nihaana okhalana mweettelo onimuttittimiha.​—1 aKorinto 6:9, 10; aGalasia 5:19-21.

OTTHARUWA NI ORUKUNUXA MURIMA

12. Xeeni atthu otheene anitthuneya aya orukunuxa murima?

¹² Yookhala etthu ekina enitthuneya anyu opaka muhinatthi obatiziwa. Murummwa Pedru ohimmye wira: “Tivó, murukunuxe mirima sanyu, muhokolowele wa Muluku, wira sittipihiwe itampi sanyu”. (Miteko 3: 19) Orukunuxa murima ontaphulela exeeni? Ontaphulela othanana aahiiso oxanka mwaha wa itthu soohiloka sipanke ahu. Mwa ntakiheryo, akhala wira mwaarina mweettelo wa orupihana woohiloka, muhaana ottharuwa. Hata mwaimananiha opaka itthu sooloka, muhaana orukunuxa murima maana otheene ahu noottheka, nto nihaana ovekela wira Muluku onlevelele.​—aRoma 3:23; 5:12.

13. Ontaphulela exeeni ‘orukunuxa murima’?

¹³ Niireke vanniphiyerya othanana paahi mwaha wa yoottheka epanke ahu? Nnaari. Pedru ohimmye wira nihaana-tho ‘orukunuxa murima’. Entaphulela wira muhaana okhootta mweettelo anyu wa khalai ni olakela opacerya opaka itthu sooloka. Mwa ntakiheryo: Muupuwele wira nyuwo muneetta murowaka nipuro nno ekwaha yoopacerya. Nuumala weetta, khoona wira moothweelela. Mwaarowa opaka exeeni? Moohaaniherya nyuwo mwaamweemela, ni otthikela ottuli wira nvire ephiro enirowa opuro oniphavela anyu. Moolikanasa, vaavo vanimusoma anyu Biibiliya, munimoona wira sookhala soolema aahiiso itthu sinivara anyu sinireerela anyu ottharuwa. Nto muhaana ‘orukunuxa murima’, niire so, ottharuwa ni opacerya ovara itthu sooloka.

WIIVAHERERYA WA MULUKU

14. Ontaphulela exeeni wiivahererya wa Muluku?

¹⁴ Nivalo nikina nuulupale nintthuneya anyu opaka muhinatthi obatiziwa ori wiivahererya wa Yehova. Wiivahererya wa Yehova, onitaphulela opaka nivekelo nenno munimmana anyu natiri wa Muluku wira muniphavela omukokhorela yena paahi, ni opaka otthuna wawe okhala etthu yuulupalexa mookumini mwanyu.​—Otumererya 6:15.

15, 16. Exeeni enimwiiriha mutthu wiivahererya wa Muluku?

¹⁵ Tthiri, olakela omurumeela Yehova paahi, onlikana ni omuleiherya mutthu onimphenta anyu wira munrowa orumeelaka okumi anyu muryeene ni mutthu owo. Mmuupuwele mulopwana onimuurya muthiyana. Vaavo mulopwana vanisiveliwa awe ni muthiyana owo onnimananiha wira omuthele. Nnaamwi opaka eyo eryeene yoothanla yuulupale, mulopwana owo onneemererya muritti owo maana onnimphenta.

¹⁶ Nto vaavo vanimusuwela anyu Yehova, munnipacerya omphenta ni ophavela opaka eniwerya anyu wira mmurumeeleke. Tthiri eyo enoowiirihani ovekela mmuleelaka wira muniphavela omurumeela. Biibiliya onnihimya wira otheene aniphavela okhala atthareli a Yesu ahaana ‘wikhotta anene’. (Marko 8:34) Wiikhootta ontaphulela exeeni? Ontaphulela wira munrowa omwiiwelelaka Yehova paahi. Opaka yootthuna ya Yehova etthu yuulupalexa ovikana soophavela ni soolukama sanyu.​—Mmusome 1 Pedru 4:2.

MUHOOVELELE OBATIZIWA

17. Exeeni eniwiiriha atthu akina ohiivahererya wa Yehova?

¹⁷ Atthu akina khaniivahererya wa Yehova maana anoova wira khanrowa owerya opaka ele emuleihenrye aya. Atthu awo khaniphavela omunyoonyiha Yehova, aahiiso anuupuwela wira akhala wira khaniivahererya wa Yehova, khanrowa okohiwa mwaha wa miteko saya.

18. Exeeni enrowa wookhaliheryani oxintta woova omunyoonyiha Yehova?

¹⁸ Masi omphenta Yehova onimookhaliheryani oxintta woova opaka etthu yaarowa omunyoonyiha. Akhala wira munnimphenta, munimwiimananiha opaka eniwerya anyu wira mmwaakhwaniherye natiri anyu. (Musuweli 5:4; aKolosi 1:10) Khamunrowa woonaka ovila opaka yootthuna ya Yehova. Murummwa Yohani aalempe so: “Vano, nnimphenta sai Muluku? Nnimphenta nettelaka soruma sawe. Vano, soruma sa Muluku khasinnirikela wettela”.​—1 Yohani 5:3.

19. Xeeni vahinreerela anyu woova wiivahererya wa Yehova?

¹⁹ Khivantthuneya okhala oomalela wira mwiivahererye wa Yehova. Maana Yehova khonnivekela ele ehiniwerya ahu. (Esalimo 103:14) Yehova onimookhaliheryani opaka itthu sooloka. (Yesaya 41:10) Tthiri mmuroromeleke Yehova ni murima anyu wotheene, nto owo ‘onolokiha iphiro sanyu’.​—Miruku 3:5, 6.

OHIMYA WAAMINI WANYU WIRA MOOPOWE

20. Nuumala wiivahererya wa Muluku, nivalo xeeni ninttharelana?

²⁰ Niireke moolakela wira mwiivahererye wa Yehova? Nuumala wiivahererya wa Yehova, muhaana opaka nivalo nikina, niire so, obatiziwa.

21, 22. Munrowa ohimya sai waamini wanyu ‘oholo w’atthu othene’?

²¹ Vano mmuleele mutokweene onuuraanyiha nikhuuru na axitokweene wira muhiivahererya wa Yehova, nto muniphavela obatiziwa. Mutokweene owo onrowa waavekela axitokweene akina wira yuuluule ni nyuwo sowiixuttiha soopacerya sa Biibiliya. Akhala wira axitokweene animoona wira moolikana, animooleelani wira munrowa obatiziwa muthukumano wa esirkwitu aahiiso kongresu onittharelana a Anamoona a Yehova. Omuthukumanoni iwo onoolavuliwa mwaha onrowa otthokiherya yootaphulela ya obatizo. Mulipa onrowa olavula mwaha, onrowa opaka makoho manli aakohaka ale anrowa obatiziwa. Vaavo vanaakhula anyu makoho awo, munrowa ohimya waamini wanyu ‘oholo w’atthu othene’.​—aRoma 10:10.

²² Moottharelana munrowa obatiziwa. Munrowa opwinihiwa aahiiso oxuweiwa moomalela mmaasini. Obatiziwa wanyu onoowooniherya atthu otheene wira nyuwo muhiivahererya wa Yehova wira mukhale Namoona a Yehova.

ELE OBATIZO ENTAPHULELA AYA

23. Enitaphulela exeeni obatiziwa “ni nsina n’Atithi ni na Mwana ni n’eroho yowarya [‘munepa wootteela, NM’]”?

²³ Yesu aahimmye wira awiixutti awe yaarowa obatiziwa “ni nsina n’Atithi ni na Mwana ni n’eroho yowarya [‘munepa wootteela’, NM]”. (Mmusome Matheyo 28:19.) Ela enitaphulela exeeni? Enitaphulela wira ole onibatiziwa onnisuwela okhulupale wa Yehova ni muritti ovahiwa awe Yesu mwa yoolakela ya Muluku, nave onnisuwela wira Muluku onirumeela munepa awe wootteela wira opake yootthuna awe.​—Esalimo 83:19; Matheyo 28:18; aGalasia 5:22, 23; 2 Pedru 1:21.

24, 25. (a) Obatizo onithoonyerya exeeni? (b) Muru wookiserya onrowa waakhula nikoho xeeni?

²⁴ Yookhala etthu ekina yootepa otthuneya obatizo ontaphulela aya. Opwinihiwa mmaasini, onitaphulela okhwa aahiiso ottharuwa mweettelo wa khalai. Okhuma mmaasini, onitaphulela opacerya okumi musya wira mpakeke yootthuna ya Muluku. Nto eyo enooniherya wira vano munrowa omurumeelaka Yehova okumi anyu wotheene. Muupuweleke wira nyuwo khamwiivaherenrye wa pinaatamu, aahiiso otthokeya wa iguvernu wala muteko. Masi mwiivaherenrye wa Yehova paahi.

²⁵ Wiivahererya wanyu onimookhaliheryani omwaattamela Muluku. (Esalimo 25:14) Obatiziwa khonitaphulela wira mutthu ohoopowa. Murummwa Paulo aalempe so: ‘[Nvikaniheke] ovarela muteko wopowa wanyu n’umuttittimiha Muluku ni wova’. (aFilipi 2:12) Obatizo wanipacerya wa omurumeela Muluku. Nto munrowa ovikaniha sai omwaattamela Yehova? Muru wookiserya, onimwaakhula nikoho nna.