Empa Yoorakama ya oBabeli

Nuumala Mutaaseke, anaawe Nowe ni axaaraya yaahaayara anamwane anceene. Imusi saya saahincerereya ni khupacerya othaamela mapuro makina, ntoko Yehova aahimenrye awe.

Masi atthu akina khiyaamwiiwelela Yehova. Nto, yaahiiwanana ehimyaka so: ‘Nrowé niteke empa yuulupale wira nikhaleke-mo: Empa eyo ehaana okhala yoorakama ni ephiye wiirimu. Ninrowa okhala atthu oovuwa’.

Yehova khaasiveliwe ni palano ole, nto aahuupuwela omaliha muteko ole. Nyuwo munnisuwela etthu aapanke awe? Aahiwiiriha olavula mattaava oovirikana. Okhala wira khuuvo aiwa nttaava na mukhwaawe, atthu ale yaahihiya muteko ole wooteka. Empa yuulupale yaateka aya yaahisuweliwa okhala oBabeli, nsina nlo nintaphulela “Waakanyereya”. Atthu ale yaahipacerya othaamela mapuro makina oovirikana. Hata vari siiso, awo yaahivikaniha opaka itthu soohiloka. Niireke ookhala aavikaninhe omphenta Yehova? Ninrowa oweha muru onittharelana.