Ana Aahivekela Okhalana Mwaana Mwaamulopwana

Aahikhala mwIsarayeli mmosa, aitthaniwa Elikana, aarina athiyana anli, Ana, ni Penina. Masi amphenta awe vanceene aari Ana. Penina aaninveeha Ana okathi wotheene maana Ana khaarina anamwane, masi Penina aahikhalana anamwane anceene. Khula eyaakha, Elikana aanikuxa emusi awe ni aanirowa otabernaakulu ya oSilo wira amukokhorele Muluku. Nihiku nimosa, vaavo yaari aya oTabernaakulu, Elikana aahiweha wira Ana aahiriipiwa murima vanceene. Nto Elikana aahimuleela wira: ‘Ana muhinleke mmaale, nyuwo mwa mwaaraka onimphenta aka vanceene’.

Muhoolo mwaya, Ana aahirowa onvekela Yehova mekhawe. Ana aaninla vanceene ni aahinvekela Yehova nikhaliheryo. Owo aavekenle wira: ‘Mwakivaha mwaana, miyo kinimoovahani mwaana owo, wira oorumeelekeni okumi awe wotheene’.

Muulupale aanamukuttho Eli, aahiweha wira iyano sa Ana saanitannyeya, nto oona wira Ana aaroohapaliwa. Ana aahihimya wira: ‘Nnaari, pwiya! Miyo nkihapaliwe. Kirina muxankiho muulupale. Nto vano kaamuleela Yehova muxankiho owo’. Eli aahoona wira aahipaka etthu yoohiloka ni aahimuleela wira: ‘Muluku oovaheeni etthu envekenle anyu’. Ana aahivenya khurowa murima omuttenle ene. Ohimanle mwaakha mmosa, owo aahikhalana mwaana mwaamulopwana khunvaha nsina na Samuweli. Nkuupuwelani moota Ana aahakalanle awe!

Ana khaaliyanle etthu aamuleihenrye awe Yehova. Samuweli ohiyakaru waamwa, Ana aahimuroiha otabernaakulu wira amurumeeleke Muluku. Ana aahimuleela Eli wira: ‘Mwaana ola ti yoole kanvekenle aka. Okumi awe wotheene onrowa omurumeelaka Yehova’. Elikana ni Ana yaanimuxukurya Samuweli khuta eyaakha ni yaanimuroihela nlaya nimosa nsya noohikhalana miyoono. Yehova aahinvaha Ana anamwane akina araru alopwana ni axithiyana anli.