Yesu Aahivariwa

Yesu ni arummwa awe yaahivira muttetthe woowaataleya wa Keduroni arowaka Omwaako Olivera. Waari ohiyu eriyari, nave mweeri waanaarya. Okathi yaaphiyale ojardim ya oJeseemani, Yesu aahaaleela wira: ‘Mukilaathi vaava nwehaweheke’. Nuumala-vo, Yesu aaheetta vakhaani mujardim mme, aahikokhora onalompa. Oriipiwe ene murima vanceene, aahinvekela Yehova ohimyaka so: ‘Tiithi yiireye ntoko sintthuna anyu’. Moottharelana, Yehova aahiruma nlaikha wira namulipihe Yesu. Okathi Yesu aahokolowenle awe opuro waari arummwa ale araru, aahaaphwanya erupaka. Nto aahihimya so: ‘Nvenyase! Ola khahiyo okathi woorupa. Woophiya okathi wira kivahereriwe mmatatani mwa awanani aka’.

Moohipisa Yuda Isikaryoti aahirwa ori ene ni muttitthi muulupale wa anakhotto akunxe ene ikatana ni ikopo. Owo aanisuwela opuro aarowa awe omphwanya Yesu maana aahirwa opuro ole ikwaha sinceene. Yuda aahaavaha ekanyero anakhotto, yeeyo yaarowa waasuweliha Yesu. Owo aahimwaattamela Yesu khumwiirela so: ‘Pwiya! Muhiileliwa?’ Nuumala-vo, aahimbexari. Yesu aahimwaakhula so: ‘Yuda, nyuwo munkivariha ni ebeexo?’

Yesu aahiwaattamela atthu ale ni aahaakoha so: ‘Mmurwenle pani?’ Awo yaahimwaakhula wira: ‘Nimurwenle Yesu muNazarethi’. Vano Yesu aahaahimeerya wira: ‘Ti yoomi’. Atthu ale yaahitthikela ottuli khumorela vathi. Yesu aahaakoha-tho iiraka: ‘Mmurwenle pani?’ Awosa yaahaakhula-tho wira: ‘Niirale nimurwenle Yesu muNazarethi’. Yesu aahaaleela wira: ‘Kihoohimeeryani wira ti miyo. Vano mwaahiye alopwana ala eroweke’.

Okathi Pedru aasuwenle awe etthu yaarowa awe wiirihiwa Yesu, aahikumiha ekatana khuphwata niyaru na Máliko, murumeyi a muulupale a anamukuttho. Masi Yesu aahikwata niyaru na mulopwana ole, khunvoniha. Nuumala-vo, Yesu aahimuleela Pedru wira: ‘Mwiixaathi ekatana anyu. Otheene ale anwana ni ekatana, anookhwa ekatana yeeyo’. Anakhotto yaahinvara Yesu ni yaahimutthukwa, nto arummwa yaahitthyawa. Nuumala-vo, muttitthi wa atthu waahimurowana Yesu owannyawe Hana, muhooleli a anamukuttho. Hana aahimukoha itthu sinceene Yesu, nuumala-vo aahimuroiha wa Kaifa yoowo aari Muulupale a anamukuttho. Masi exeeni yaakhumelenle arummwa?