YOOSOMA 4

Opacerya Otthokiherya Saana Soolepa

Matheyo 22:41-45

MALAKIHERYO: Mpaceryeke olokiherya muupuwelo wa alipa-oowiriyana muhinatthi osoma yoolepa.

Muupuweleke nthowa naya munisoma anyu yoolepa eyo. Muhinatthi osoma yoolepa, muhaana opaka eyo mwa enamuna eniwiiriha alipa-oowiriyana oweha eponto yuulupale eniphavela anyu ottittimiherya yoolepa eyo.

Nvareryeke iversiikulu sikina sa mpantta yoowo wa mBiibiliyani onisoma anyu. Nvahe ephoole wira muhivirikanye nsina na mutthu olavunle masu anisoma anyu, wala nsina na mulipa-olempe eliivuru eyo ya Biibiliya.
Biibiliya okhaleke ti mathipelo a mwaha anyu. Akhala wira munilavula ni atthu animwaamini Muluku, mooniheryeke wira Biibiliya ti “Nuulumo na Muluku”, ni torina miruku soolokexa.
Nwiiriheke alipa-oowiriyana ophavela osuwela ele yoolepa enihimya aya. Mpakeke nikoho ninrowa waakhuliwa ni yoolepa eyo, muromoleke muxankiho mmosa yoolepa eyo enooniherya aya wira onoomala, ni muhimye ntakiheryo nnooniherya ovareleya waya muteko yoolepa eyo.

Muupuweleke ele alipa-oowiriyana anisuwela aya voohimya sa mwaha owo wala yoolepa eyo. Okathi onisoma anyu yoolepa esuweliwe saana, mmananiheke opaceriha mwa enamuna eniiriha okhalaka ntoko yoolepa esya.